Read Tzeltal Génesis 36 Bible Online

Génesis 36 - Tzeltal bible

Génesis 36

¹Hich ay sbihilic te sts'umbal Esaú, te Edom yan sbihile.

²Te Esaú la yic' yihnamin te yantsil-nich'nab te cananeohetic: ha te Ada te yantsil-nich'an Elón te heteo-winic, soc Aholibama te yantsil-nich'an Aná te snich'an Zibeón te heveo-winic;

³soc te Basemat te yantsil-nich'an Ismael, te yihts'in Nebaiot.

⁴Te Ada la yalatay Elifaz ta scuenta Esaú; te Basemat la yalatay Reuel.

⁵Te Aholibama la yalatay te Jeús, Jaalam soc Coré. Hich ay te snich'nab Esaú te ayinic ta sq'uinal Canaán.

⁶Te Esaú la yic'ticlan bahel te antsetic yu'un, te yal-snich'nab, spisil mach'atic ay yu'un, schansbahlam soc spisil sbiluc la sta ta sq'uinal Canaán, baht ta yan q'uinal te namal yiloj sba soc te yihts'in Jacob,

⁷como bayel sbiluquic schebalic, ma ba hu' la sjoquin sbahic, soc te q'uinal ta banti ayic ma tic'uc ya xwe'ic a te schansbahlamique.

⁸Hich c'oht nahinuc ta witsiltic yu'un Seir te Esaú, te Edom yan sbihile.

⁹Hich ay te sts'umbal Esaú te stat te edometic te ayic ta witsiltic yu'un Seir.

¹⁰Hich ay te sbihilic te snich'nab Esaú: ha Elifaz te yal Ada te yihnam Esaú; soc Reuel te yal Basemat te yihnam Esaú.

¹¹Te snich'nab Elifaz: ha Temán, Omar, Zefo, Gatam soc Cenaz.

¹²Ay yan ants la yic' te Elifaz te snich'an Esaú, Timna sbihil, ha Amalec te yale. Hich ay te yalatac Ada te yihnam Esaú.

¹³Te snich'nab Reuel: ha Nahat, Zera, Sama soc Miza. Hich ay te yalatac Basemat te yihnam Esaú.

¹⁴Hich ay te yalatac te Aholibama te yihnam Esaú, te ha yantsil-nich'an Aná te snich'an Zibeón: ha Jeús, Jaalam soc Coré, ha snich'nab te Esaú.

¹⁵Hich ay sbihilic te jtsobawetic yu'un te snich'nab Esaú: Te sts'umbal Elifaz te sba-nich'an te Esaú: ha Temán, Omar, Zefo, Cenaz,

¹⁶Coré, Gatam soc Amalec. Ha'ic te jtsobawetic yu'un te sts'umbal Elifaz ta sq'uinal Edom; ha'ic te yalatac Ada.

¹⁷Hich ay te snich'nab Reuel te snich'an Esaú: ha te jtsobawetic Nahat, Zera, Sama soc Miza. Ha'ic te jtsobawetic yu'un te sts'umbal Reuel ta sq'uinal Edom; ha'ic te yalatac Basemat te yihnam Esaú.

¹⁸Hich ay te yalatac Aholibama te yihnam Esaú: ha te jtsobawetic Jeús, Jalam soc Coré. Ha'ic te jtsobawetic yu'un Aholibama te yihnam Esaú, te yantsil-nich'an Aná.

¹⁹Ta spisilic ini ha te sts'umbal Esaú, te Edom te yan sbihil, soc te jtsobawetic yu'unique.

²⁰Hich ay te snich'nab Seir te horeo-winic, te nahinemic tey a: ha Lotán, Sobal, Zibeón, Aná,

²¹Disón, Ezer soc Disán. Ha'ic te jtsobawetic yu'un te horeohetic te snich'nab Seir, te nahinemic ta sq'uinal Edom.

²²Te snich'nab Lotán: ha Hori soc Hemam; soc Timna ha ants te jun static soc Lotán.

²³Te snich'nab Sobal: ha Alván, Manahat, Ebal, Sefo soc Onam.

²⁴Te snich'nab Zibeón: ha Aja soc Aná. Te Aná ha te la sta banti ya xloc' tal ha'etic ta jochol taquin q'uinal te c'alal yac scanantaybel burrohetic yu'un te stat, ha te Zibeón.

²⁵Te snich'nab Aná: ha Disón soc Aholibama te yantsil-nich'an Aná.

²⁶Hich ay te snich'nab Disón: ha Hemdán, Esbán, Itrán soc Querán.

²⁷Hich ay te snich'nab Ezer: ha Bilhán, Zaaván soc Acán.

²⁸Hich ay te snich'nab Disán: ha Uz soc Arán.

²⁹Hich ay te jtsobawetic yu'un te horeohetic: ha Lotán, Sobal, Zibeón, Aná,

³⁰Disón, Ezer soc Disán. Ha'ic te jtsobawetic yu'un te horeohetic ta chahpalchahp te nahinemic ta sq'uinal Seir.

³¹Hich ay te ajwaliletic ta Edom te c'alal ma to ayuc ajwalil yu'unic a te snich'nab Israel:

³²Te Bela snich'an Beor och ta ajwalil ta Edom; Dinaba sbihil te pueblo yu'une.

³³Cham te Bela, ha la sjelolin ta ajwalil te Jobab snich'an Zera, talem ta Bosra.

³⁴Cham te Jobab, ha la sjelolin ta ajwalil te Husam te talem ta sq'uinal Temán.

³⁵Cham te Husam, ha la sjelolin ta ajwalil te Hadad snich'an Bedad, ha te la stsal te Madián ta sq'uinal Moab; Avit sbihil te pueblo yu'une.

³⁶Cham te Hadad, ha la sjelolin ta ajwalil te Samla te talem ta Masareca.

³⁷Cham te Samla, ha la sjelolin ta ajwalil te Saúl te talem ta Rehobot te nopol yiloj sba soc te muc'ul-ha' Éufrates.

³⁸Cham te Saúl, ha la sjelolin ta ajwalil te Baal-Hanán snich'an Acbor.

³⁹Cham te Baal-hanán snich'an Acbor, ha la sjelolin ta ajwalil te Hadar; Pau sbihil te pueblo yu'une. Mehetabel sbihil te yihnam te ha yantsil-nich'an Matred, te snich'an Mezaab.

⁴⁰Hich ay sbihilic te jtsobawetic yu'un Esaú ta jujuchahp sts'umbalic soc ta jujun sq'uinalic: ha Timna, Alva, Jetet,

⁴¹Aholibama, Ela, Pinón,

⁴²Cenaz, Temán, Mibzar,

⁴³Magdiel soc Iram. Ha'ic te jtsobawetic yu'un Edom ta jujun lugar te banti nahinic ta q'uinal te yich'ojique. Te Edom ha nix te Esaú te yan sbihil, ha stat te edometique.