Read Tzeltal Génesis 38 Bible Online

Génesis 38 - Tzeltal bible

Génesis 38

¹Ha yorahil a te Judá la yihquitay hilel te sbanquil yihts'inab, baht sjoquin jtuhl adulam-winic, Hira sbihil.

²Te Judá la yil tey a te yantsil-nich'an jtuhl cananeo-winic Súa sbihil; la yic' soc la sta sba soc.

³Hahch yal, ayin squerem-al, Er sbihil.

⁴Cha'hahch yan yal, ayin squerem-al, Onán sbihil.

⁵Cha'hahch yan yal, ayin squerem-al, Sela sbihil. Ay ta Quezib a te c'alal ayin te yoxebal yale.

⁶Patil te Judá la slehbe yihnam te Er te sba-nich'an, Tamar sbihil.

⁷Te Er te sba-nich'an Judá, ma lecuc ilot yu'un Jehová, hich lajimbot scuxlejal yu'un.

⁸Ha yu'un te Judá la yalbe te Onán: Taha aba soc te yihnam chawinic abanquil, pasa te bin ya sc'an pasel te ha'at amu', ayuc me sts'umbal ya xc'oht te abanquile, xchi.

⁹Pero la sna' te Onán te ma ha'uc sts'umbal nix ya xc'oht, ha yu'un te jujun buelta te ya xway soc te yihnam te chawinic sbanquil ya smal cohel ta lum te snich'an te winique, scuenta yu'un ma ba ya xchicnaj sts'umbal a te sbanquile.

¹⁰Te Jehová ma lecuc yo'tan yu'un te hich la spas, ha nix hich la smil.

¹¹Hich te Judá la yalbe te Tamar te yalib: Me'ba' ants me x'ayinat ta sna te atate. Mahliya ya xmuc'ub te jnich'an Sela, xchi, yu'un hich la yal: Teme repente ya xcham hich te bin ut'il te sbanquiltac. Hich baht te Tamar, ayin ta sna stat.

¹²Bayel c'ahc'al ta patil cham yihnam te Judá, ha te yantsil-nich'an Súa. C'alal ch'ay smel-o'tan, baht ta Timnat ta banti ay te mach'atic yac ta sloq'uesbeyel stsotsel te tuminchijetic yu'une. Sjoquinej bahel te Hira te adulam-winic, te smohlol sba soque.

¹³Hich c'oht ta halbeyel te Tamar: Ya xtal ta sloq'uesbeyel stsotsel stuminchij ta Timnat te awalibmamal, xchihic.

¹⁴Ha yu'un te Tamar la sloq'ues te sc'u' slapoj scuenta me'ba' ants, la smuc sit ta pac' soc la smey sba ta rebozo, scuenta yu'un ma xna'bot sba a, baht shuhcan sba ta yochibal Enaim ta sbehlal Timnat; yu'un yilojix te muq'uix te Sela pero ma x'a'bot yic' sba soc.

¹⁵C'alal ilot yu'un te Judá, la scuy ta j'antsinel-ants, yu'un smucoj sit yelaw.

¹⁶Hich loc' ta be soc la yalbe: Ya jc'an ya joquinat ta wayel, xchi. Ma ba la sna'be sba teme ha te yalibe. Halbot yu'un te antse: ¿Bin yac awa'bon a teme yac ajoquinon ta wayele? xchi.

¹⁷Ya jticombat tut tentsun, xchi. Hich halbot xan yu'un te antse: Ayuc bin yac awa'bon hilel a ha to c'alal yac aticombon tal te bin la awal, xchi.

¹⁸¿Bin a te ya ca'bat hilel? xchi te Judá. Ha te sello soc te bin awuhanej, soc anahbate' te ay ta ac'ab, xchi te antse. Hich te Judá la ya'be hilel te bintic c'ambot, la sjoquin ta wayel, hich hahch yal yu'un.

¹⁹Patil loc' bahel te Tamar, la sloq'ues te pac' smucoj sit a, la scha'lap xan te sc'u' slapoj scuenta me'ba' ants.

²⁰Patil te Judá la sticon bahel te tut tentsun ta scuenta te smohlol, ha te adulam-winic, scuenta yu'un ya suhtbot te bin hilem yu'un. Pero ma ba la sta te antse.

²¹La sjoc'obe te winiquetic te tey ayic a: ¿Banti ay te j'antsinel-ants ta Enaim te hucul ta ti'be? xchi. Mayuc xquilojcotic j'antsinel-ants li'i, xchihic te winiquetique.

²²Ha yu'un suht bahel, baht yalbe te Judá: Ma ba la jta; soc la yalbonic te winiquetic te nahinemic tey a: Mayuc j'antsinel-ants li'i, xchihic.

²³La yal te Judá: Ac'a yich' hiche te bin yich'oj scuenta yu'un ma ba ya stse'layotic, como la jticombe te tut tentsun, pero ma ba la ata te antse, xchi.

²⁴Oxeb wan u ta patil c'oht ta halbeyel te Judá: La yac' sba ta antsinel te awalib Tamar; hahchemix yal, xchi sc'oblal. Hich la yal te Judá: ¡Tsacahic loq'uel tal, ac'a yich' chiq'uel! xchi.

²⁵Pero c'alal yac ta tsaquel loq'uel tal a te antse, hich la sticombe c'op te yalibmamal: Te winic te ha yu'un te biluquetic ini, ha yu'un te alal jwoloje, xchi. Soc la yal xan: Na'beya sba mach'a yu'un ini: te sello soc te bin yuhanej a, soc te nahbate'el, xchi te antse.

²⁶Ha yu'un te Judá la sna'be sba mach'a yu'un, hich la yal: Ha toj xan stuquel a te bin ut'il te ho'one, ta scaj te ma ba la jca'be yic' sba soc te jnich'an Sela, xchi. Te Judá mayuc bin ora la sta xan sba soc.

²⁷C'alal la sta yorahil te ya x'ayin yal te Tamar, lo-alal te swoloje.

²⁸C'alal yac ta ayinel a, loc' tal sc'ab te jtuhle. Te jtam-alal la schucbe tsajal hilera ta sc'ab, soc hich la yal: Ha nahil ayin ini, xchi.

²⁹Pero cha'och te sc'ab, ha nahil ayin te yane, ha yu'un la yal te jtam-alal: ¡Mero la alom loq'uel! xchi. Ha yu'un Fares[69] c'oht te sbihile.

³⁰Patil ayin te yan alal te chucbil tsajal hilera ta sc'ab, Zara sbihil c'oht.