Read Tzeltal Génesis 46 Bible Online

Génesis 46 - Tzeltal bible

Génesis 46

¹Hich loc' bahel te Israel soc spisil sbiluc, c'oht ta Beerseba, tey c'oht ya'be milbil smahtan a te Dios yu'un Isaac te state.

²Ta swayich c'oponot yu'un Dios ta ahc'abal te Israel, hich halbot: Jacob, Jacob, xchi. Li' ayoni, xchi te Jacob.

³La yal te Diose: Ho'on Dioson, te Dioson yu'un te atate. Ma me xaxi' te ya xcohat bahel ta Egipto, yu'un tey ya cac' a te muc'ul nación ya xc'ohat.

⁴Ya joquinat bahel ta Egipto soc ya cac' te ya suhtat talel; soc ha ya smacbat asit te sc'ab José, xchi sc'oblal.

⁵Hahch bahel ta Beerseba te Jacob. Te snich'nab Israel la yiq'uic bahel te static, ha te Jacob, te yal-snich'nabic soc te yihnamic ta carretahetic te ticombilic tal yu'un faraón.

⁶Soc la smaquic bahel te schansbahlamic soc la yich'ic bahel spisil sbiluquic te stahojic ta sq'uinal Canaán, hich c'ohtic ta Egipto te Jacob soc spisil sts'umbal,

⁷ha te snich'nab soc smamatac queremetic soc ach'ixetic, spisil sts'umbal la yic' sjoquin ochel ta Egipto.

⁸Hich ay sbihilic te snich'nab Israel te ochic ta Egipto, ha te Jacob soc te snich'nab: Te Rubén te sba-nich'an Jacob.

⁹Te snich'nab Rubén: ha te Hanoc, Falú, Hezrón soc Carmi.

¹⁰Te snich'nab Simeón: ha te Jemuel, Jamín, Ohad, Jaquín, Zohar, soc Saúl te yal cananea-ants.

¹¹Te snich'nab Leví: ha te Gersón, Coat soc Merari.

¹²Te snich'nab te Judá: ha te Er, Onán, Sela, Fares soc Zara. Pero te Er soc Onán chamic ta sq'uinal Canaán. Te snich'nab Fares: ha te Hezrón soc Hamul.

¹³Te snich'nab Isacar: ha te Tola, Fúa, Job soc Simrón.

¹⁴Te snich'nab Zabulón: ha te Sered, Elón soc Jahleel.

¹⁵Ha'ic ini te yalatac Lea, te la yalataybe te Jacob, te ayinic ta Padan-aram, soc Dina te yantsil-nich'an. Oxlajuneb scha'winic (33) ta spisilic soc queremetic soc ach'ixetic.

¹⁶Te snich'nab Gad: ha te Zifión, Hagui, Ezbón, Suni, Eri, Arodi soc Areli.

¹⁷Te snich'nab Aser: ha te Imna, Isúa, Isúi, Bería soc Sera te yantsilelic. Te snich'nab Bería: ha te Heber soc Malquiel.

¹⁸Ha'ic ini te yal-snich'nab Jacob te alatayot yu'un Zilpa, te criada te Labán la ya'be te yantsil-nich'an Lea; waclajuntuhl (16) ta spisilic.

¹⁹Te yalatac Raquel, te yihnam Jacob: ha te José soc Benjamín.

²⁰Te José ayin cheb snich'nab ta Egipto: ha te Manasés soc Efraín, te yalatac Asenat yantsil-nich'an Potifera te sacerdote ta On.

²¹Te snich'nab Benjamín: ha te Bela, Bequer, Asbel, Gera, Naamán, Ehi, Ros, Mupim, Hupim soc Ard.

²²Ha'ic ini te yalatac Raquel te la yalataybe te Jacob; chanlajuntuhl (14) ta spisilic.

²³Te snich'an Dan: ha Husim.

²⁴Te snich'nab Neftalí: ha te Jahzeel, Guni, Jezer soc Silem.

²⁵Ha'ic ini te yal-snich'nab Jacob te alatayot yu'un Bilha, te criada te Labán la ya'be te yantsil-nich'an Raquel; huctuhl ta spisilic.

²⁶Ta spisil te mach'atic ochic soc Jacob ta Egipto, te ha sts'umbal, ta spisil ay waqueb schanwinic (66) ta tuhl, ma ba la yich' ahtayel stuquel te yihnamic te snich'nabe.

²⁷Ay cha'tuhl snich'nab José te ayinic ta Egipto. Ta spisil te mach'atic ayic yu'un Jacob te ochic ta Egipto ha lajuneb schanwinic (70) ta tuhl.

²⁸Te Jacob nahil la sticon bahel te Judá ta stojol te José te yacuc xtal ta ilel yu'un ta Gosén; hich c'ohtic ta sq'uinal Gosén.

²⁹Te José la yac' ta chahpanel te scarreta, baht sta ta Gosén te Israel te state. C'alal la yil te stat la spet smey, bayel halaj ta oq'uel.

³⁰Te Israel hich la yalbe te José: Jun co'tan ya xchamon, yu'un la jquilbatix asit awelaw, ya jna' te cuxulat, xchi.

³¹Te José hich la yalbe te sbanquiltac soc te mach'a ay yu'un te state: Ya xmohonix bahel, ya ca'be sna' te faraón, hich ya calbe: Te jbanquiltac soc te mach'atic ay yu'un te jtat te nahinemic ta sq'uinal Canaán, talemiquix ta jtojol.

³²Te winiquetic ha jcanan-tuminchijetic, ya scanantayic schansbahlamic; yic'ojic tal stuminchijic, swacaxic, soc spisil bintic ay yu'unic, xchi ya xc'ohon.

³³C'alal ya sticonex ta iq'uel te faraón soc te ya sjoc'obeyex: ¿Bin awa'telic? teme xchihe,

³⁴hich me yac awalbeyic: Ca'telinejcotic scoltesel chambahlametic ta jqueremilcotic to c'alal ora, ho'otcotic soc jme'jtatcotic, xchihex, scuenta yu'un tey ya xnahinex a ta sq'uinal Gosén, como te egipciohetic ilobtic sba ya ya'iyic te jcanan-tuminchijetic, xchi.