Read Tzeltal Génesis 5 Bible Online

Génesis 5 - Tzeltal bible

Génesis 5

¹Hich ay te sbihilic te sts'umbal Adán. C'alal Dios la spas te winic, pajal yilel soc Dios la spas.

²Winic soc ants la spas, soc la yac'ticlambe bendición. C'alal pasbilic yu'un la ya'be sbihilin ants-winic.

³Ay lajuneb shucwinic (130) ya'bilal a te Adán, ayin snich'an te pajal yilel soc, Set la ya'be sbihilin.

⁴C'alal ayin te Set, cha'bahc' (800) xan ha'bil cuxul te Adán, soc ayin yan queremetic soc ach'ixetic yu'un.

⁵Te c'alal ayix lajuneb shucwinic yoxbahc' (930) ya'bilal a te Adán, cham.

⁶Ay ho'eb swacwinic (105) ya'bilal a te Set ayin snich'an, Enós sbihil.

⁷Te c'alal ayin te Enós, huqueb yoxbahc' (807) xan ha'bil cuxul te Set, soc ayin yan queremetic soc ach'ixetic yu'un.

⁸C'alal ayix lahchayeb swacwinic yoxbahc' (912) ya'bilal a te Set, cham.

⁹Ay lajuneb yo'winic (90) ya'bilal a te Enós ayin snich'an, Cainán sbihil.

¹⁰C'alal ayin Cainán, ho'lajuneb yoxbahc' (815) xan ha'bil cuxul te Enós, soc ayin yan queremetic soc ach'ixetic yu'un.

¹¹C'alal ayix ho'eb swacwinic yoxbahc' (905) ya'bilal a te Enós, cham.

¹²Ay lajuneb schanwinic (70) ya'bilal a te Cainán ayin snich'an, Mahalaleel sbihil.

¹³C'alal ayin ta Mahalaleel, cha'winic yoxbahc' (840) xan ha'bil cuxul te Cainán, soc ayin yan queremetic soc ach'ixetic yu'un.

¹⁴C'alal ayix ho'eb swacwinic yoxbahc' (905) ya'bilal a te Cainán, cham.

¹⁵Ay ho'eb schanwinic (65) ya'bilal a te Mahalaleel ayin snich'an, Jared sbihil.

¹⁶C'alal ayin te Jared, lajuneb scha'winic yoxbahc' (830) xan ha'bil cuxul te Mahalaleel, soc ayin yan queremetic soc ach'ixetic yu'un.

¹⁷C'alal ayix ho'lajuneb yo'winic yoxbahc' (895) ya'bilal a te Mahalaleel, cham.

¹⁸Ay cheb sbalunwinic (162) ya'bilal a te Jared ayin snich'an, Enoc sbihil.

¹⁹C'alal ayin te Enoc, cha'bahc' (800) xan ha'bil cuxul te Jared, soc ayin yan queremetic soc ach'ixetic yu'un.

²⁰C'alal ayix cheb sbalunwinic yoxbahc' (962) ya'bilal a te Jared, cham.

²¹Ay ho'eb schanwinic (65) ya'bilal a te Enoc ayin snich'an, Matusalén sbihil.

²²Ta patil te ayin te Matusalén, te Enoc behen soc Dios ho'lajunwinic (300) ha'bil, soc ayin yan queremetic soc ach'ixetic yu'un.

²³Hich te jayeb ha'bil cuxul te Enoc, ha ho'eb sbalunlajunwinic (365) ha'bil.

²⁴Te Enoc behen soc Dios; patil ma ba chicnaj, yu'un ic'ot bahel yu'un Dios.

²⁵Ay huqueb slajunwinic (187) ya'bilal a te Matusalén ayin snich'an, Lamec sbihil.

²⁶C'alal ayin te Lamec, cheb sbalunlajunwinic scha'bahc' (782) xan ha'bil cuxul te Matusalén, soc ayin yan queremetic soc ach'ixetic yu'un.

²⁷C'alal ayix baluneb sbalunwinic yoxbahc' (969) ya'bilal a te Matusalén, cham.

²⁸Ay cheb slajunwinic (182) ya'bilal a te Lamec ayin snich'an;

²⁹la ya'be sbihil Noé[9] yu'un hich la yal: Ha te ya ya'botic lecubuc q'uinal ca'iytic yu'un te jwocoltic ta a'tel ta scaj te lumq'uinal te la yac' bohlobuc te Jehová, xchi sc'oblal yu'un.

³⁰C'alal ayin Noé, ho'lajuneb slajunwinic scha'bahc' (595) ha'bil cuxaj xan te Lamec, soc ayin yan queremetic soc ach'ixetic yu'un.

³¹C'alal ayix huclajuneb sbalunlajunwinic scha'bahc' (777) ya'bilal a te Lamec, cham.

³²Ay ho'winic scha'bahc' (500) ya'bilal a te Noé ayin te snich'nab: Sem, Cam, soc Jafet.