Read Tzeltal Génesis 50 Bible Online

Génesis 50 - Tzeltal bible

Génesis 50

¹Te José la smech' te stat, la yoq'uetay soc la yuhts'uy.

²Patil la yalbe mandar te a'batetic yu'un, ha te jpoxtaywanejetic, te ya spoxtaybeyic sbaq'uetal te stat scuenta yu'un hich ma xc'a' a. Hich te jpoxtaywanejetic la spoxtaybeyic sbaq'uetal te Israel;

³cha'winic (40) c'ahc'al halajic, yu'un hich tiempo ya sc'an poxtayel scuenta yu'un ma xc'a' a. Te egipciohetic lajuneb schanwinic (70) c'ahc'al la yoq'uetayic.

⁴C'alal laj yo'tanic ta yoq'uetayel, te José hich la yalbe te mach'atic ayic ta sna faraón: Teme lecon ta awo'tan, awocoluc c'opombonic te faraón, hich me xawalbeyic:

⁵Hich la yac'on ta yalel ta jamal te jtate: Ya xchamonix; te muquenal ch'en te la jchahpan yu'un ho'on cu'un ta sq'uinal Canaán, tey me xamucon a, xchi. Awocoluc, ac'awon bahel yu'un ya jmuc hilel te jtate, patil ya suhton tal, xchihex, xchi.

⁶Hich la yal te faraón: Bahan, muca te atate, hich te bin ut'il la yac'at ta yalel ta jamal, xchi.

⁷Ha yu'un te José mo bahel ta smuquel te state. Joquinot bahel yu'un spisil te a'batetic yu'un faraón, te mamaletic te ayic ta sna soc te mamaletic te ayic ta spahmal sq'uinal Egipto,

⁸soc spisil mach'atic ay yu'un José, te yermanotac soc spisil mach'atic ay yu'un te state. Ha xanix la yihquitay hilel ta sq'uinal Gosén te alaletic, stuminchijic soc swacaxic.

⁹Soc joquinot yu'un carretahetic soc mach'atic cajajtic ta cawu; mero tsobol bahtic.

¹⁰C'alal c'ohtic ta sq'uiyojibal trigo yu'un Atad, te ay ta sjehchelul te Jordán, mero tulan la yoq'uetayic soc mel-o'tan tey a. Te José huqueb c'ahc'al la yoq'uetay te state.

¹¹Te cananeohetic te nahinemic tey a, c'alal la ya'iyic te tulan oq'uel ta sq'uiyojibal trigo yu'un Atad, la yalic: Mero tulan oq'uel ay yu'un te egipciohetic, xchihic. Ha yu'un Abel-mizraim[84] sbihil c'oht yu'unic te lugar te ay ta sjehchelul Jordán.

¹²Te snich'nab Jacob hich la spasbeyic te bin ut'il pasotic hilel ta mandar:

¹³la yich'beyic bahel sbaq'uetal ta sq'uinal Canaán, la smuquic hilel ta muquenal ch'en ta sq'uinal Macpela te ay ta stojol banti ya xloc' tal c'ahc'al yu'un Mamre, ha te ch'en soc te q'uinal te Abraham la smambe te Efrón te heteo-winic scuenta muquenal.

¹⁴C'alal laj yo'tan ta muquenajel, suhtic bahel ta Egipto te José, te yermanotac soc spisil mach'atic mohic bahel soc ta smuquel te state.

¹⁵C'alal la yilic te sbanquiltac José te chamix te static, hich la yalic: Ya wan xhahch yilintayotic te José, ya wan sutbotic spacol spisil te bin chopol la jpasbetic, xchihic.

¹⁶Ha yu'un la sticombeyic c'op te José, hich la yalic: Te c'alal ma to xcham a te atat, hich la yal:

¹⁷Hich me yac awalbeyic te José: Ya calbat wocol te yacuc apasbe perdón yu'un te bin chopol spasojic te abanquiltac soc te smulic ta atojol, te bin ut'il la yuts'inat, xchi. Ha yu'un, awocoluc pasbeya perdón yu'un te bin chopol spasojic te a'batetic yu'un te Dios yu'un te atate, xchihic. Te José bayel oc' yu'un te c'alal hich halbot.

¹⁸Soc tal te sbanquiltac, c'oht squejan sbahic ta stojol, hich la yalbeyic: Li' ayotcotiqui, a'batotcotic awu'un, xchihic.

¹⁹Pero la sjac' te José: Ma xiwex, ¿yu'un bal ho'on ya xhilon ta lugar yu'un te Diose?

²⁰Te ha'exe la ac'anic te yac apasbonic te bin chopol, pero lec c'oht yu'un stuquel te Diose scuenta yu'un ya xc'oht ta pasel te bin ya quiltic ta ora ini, ha te ya xcuxajic tsobol ants-winiquetic a.

²¹Ha yu'un ma me xiwex; ho'on ya jmac'linex ta apisilic soc awal-anich'anic, xchi sc'oblalic. Hich la smuc'ubtesbe q'uinal ya'iyic soc la yutsil-c'optaylan.

²²Te José nahin ta Egipto soc te mach'atic ay yu'un te state. Lajuneb swacwinic (110) ha'bil cuxaj te José.

²³La to yil te snich'nab Efraín c'alal ta yoxcajal sts'umbal. Soc te snich'nab Maquir te snich'an Manasés, coltesotic yu'un ta sjol yacan te José.[85]

²⁴Te José hich la yalbe ya'iyic te yermanotac: Te ho'one ya xchamonix; pero Dios me ya xtal scoltayex, ya me yiq'uex loq'uel li' ta q'uinal ini, ya me yiq'uex bahel tey ta q'uinal te yaloj ta jamal te ya ya'be te Abraham, te Isaac soc te Jacob, xchi.

²⁵Te José hich la yac'ticlan ta yalel ta jamal te snich'nab Israel: Dios me ya xtal scoltayex, ha yu'un ya me awich'bonic bahel te jbaquele, xchi.

²⁶Lajuneb swacwinic (110) ya'bilal a te cham te José. La yich' poxtayel te sbaq'uetal scuenta yu'un ma ba ya xc'a' a, soc la yich' otsesel ta caja ta Egipto.