Read Tzeltal Génesis 7 Bible Online

Génesis 7 - Tzeltal bible

Génesis 7

¹Patil te Jehová hich la yalbe te Noé: Ochan ta barco soc spisil mach'atic ay awu'un, como ta spisil te mach'atic ayic ta q'uinal, quiloj te ha'at nax atuquel te toj awo'tan ta jtojol.

²Te chambahlametic te lec sc'oblalic, ya me awic'ticlan ochel huqueb stat soc huqueb yantsilel ta jujuchahp. Yan te chambahlametic te ma lecuc sc'oblalic ya me awic'ticlan ochel jcoht stat soc jcoht yantsilel ta jujuchahp.

³Ha nix hich te mutetic, huqueb stat soc huqueb yantsilel ta jujuchahp, scuenta yu'un hich ma xlaj sts'umbal ta bahlumilal a.

⁴Huqueb c'ahc'al ta patil ya cac' tal ha'al ta bahlumilal cha'winic c'ahc'al soc cha'winic ahc'abal; ya jlajin spisil bintic cuxajtic te pasbil cu'un ta sba te bahlumilale, xchi.

⁵Te Noé la spas spisil hich te bin ut'il pasot ta mandar yu'un te Jehová.

⁶Ay lajunwinic scha'bahc' (600) ya'bilal a te Noé c'alal tal puhlel ta bahlumilal.

⁷Ta scaj te puhlel och ta barco te Noé soc snich'nab, te yihnam soc yihnam te snich'nabe.

⁸Te chambahlametic te lec sc'oblalic soc te chambahlametic te ma lecuc sc'oblalic, te mutetic soc spisil bintic staslajan ya xbehen ta lumq'uinal,

⁹ochic ta barco soc te Noé, jcoht stat soc jcoht yantsilel te jujuchahp, hich te bin ut'il pasot ta mandar yu'un Dios te Noé.

¹⁰Ta shuquebal c'ahc'al tal puhlel ta bahlumilal.

¹¹C'alal ay lajunwinic scha'bahc' (600) ya'bilal a te Noé, ta shuclajunebal (17) c'ahc'al ta schebal u, ta hich ora t'ohm loq'uel tal ha'etic ta muc'ul xahab soc jahm talel tulan ha'al ta ch'ulchan.

¹²Cha'winic (40) c'ahc'al soc cha'winic ahc'abal la yac' tal ha'al ta bahlumilal.

¹³Ha yorahil a te ochic ta barco te Noé soc te snich'nab, Sem, Cam soc Jafet, soc te yihnam Noé soc yihnam te oxtuhl snich'nab,

¹⁴soc spisil te ha'mal chambahlametic, alaq'uil chambahlametic ta jujuchahp, soc spisil bintic staslajan ya xbehen ta lumq'uinal ta jujuchahp, soc spisil ta chahp te mutetique.

¹⁵Ochic soc Noé ta barco cha'cha'coht ta jujuchahp ta spisil bintic cuxajtic ta q'uinal.

¹⁶Ta spisil bintic cuxajtic, stat soc yantsilel, ochic soc, hich te bin ut'il pasot ta mandar yu'un Dios. Te Jehová la smacbe spuertahul te barco.

¹⁷Cha'winic (40) c'ahc'al halaj te puhlel ta bahlumilal, tohy mohel te ha'e, la sta te barco, lichot mohel yu'un.

¹⁸Bayel tohy te ha' ta bahlumilal, cajaj ta ba ha' te barco.

¹⁹Te ha'e bayel tohy ta bahlumilal, spisil toyol witsiltic te ayic ta ye'tal ch'ulchan muhc ta ha'.

²⁰Ho'lajuneb (15) xuhc'ubil[14] muhc ta ha' spisil te witsiltic.

²¹Hich laj spisil bintic cuxajtic ta bahlumilal: mutetic, alaq'uil chambahlametic soc ha'mal chambahlametic, spisil bintic staslajan ya xbehen ta lumq'uinal, soc spisil ants-winiquetic.

²²Laj spisil te bintic cuxajtic, spisil bintic ay ta lumq'uinal te ya yich'ic ic'.

²³Hich laj spisil bintic cuxajtic ta sba te bahlumilal: ants-winiquetic, chambahlametic, chanetic, soc mutetic lajic ta bahlumilal, stuquel xanix cuxul hilel te Noé soc te mach'atic sjoquinej ta barco.

²⁴Lajuneb swaxacwinic (150) c'ahc'al halaj te ha' ta bahlumilal.