Read Tzeltal Génesis 9 Bible Online

Génesis 9 - Tzeltal bible

Génesis 9

¹Dios la ya'be bendición te Noé soc te snich'nab, hich la yalbe: Sitinan, p'ohla abahic, nojesahic te q'uinale.

²Ya me xnihquic soc ya me xiwic ta atojolic spisil chambahlametic ayic ta q'uinal, spisil mutetic ayic ta sjamalil ch'ulchan, spisil bintic ya xbehenic ta lumq'uinal, soc spisil te chayetic ayic ta mar; ay ta ac'abic.

³Ya xhu' yac awe'ic spisil bintic cuxul soc te ya xbehenic, hich te bin ut'il te itaj soc te yaxal ha'mal. La jca'beyexix spisil.

⁴Yan te ti'bal te yich'oj to sch'ich'el, te ha scuxlejal, ma me xawe'ic stuquel,

⁵como ya me xc'opojon yu'un ach'ich'el te ya yich' malel, ya ca'be stoj spisil chambahlam soc spisil winic; ya ca'be stoj ta jujutuhl te ya smalbe sch'ich'el te spat-xuhque.

⁶Te mach'a ya smalbe sch'ich'el winic, winic nix ya xmalbot sch'ich'el yu'un; como pajal yilel soc Dios la yich' pasel te winique.

⁷Te ha'exe sitinan soc p'ohla abahic, al-nich'anajanic, nojesahic te bahlumilal, xchi te Diose.

⁸Te Dios la yalbe xan te Noé soc te snich'nab:

⁹Ya jchap jc'op ta atojol soc ta stojol ats'umbal te patil ya xtal,

¹⁰soc spisil bintic cuxajtic te sjoquinejex: ha te mutetic, chambahlametic, soc spisil alaq'uil chambahlametic ta bahlumilal te sjoquinejex, spisil te chambahlametic te loq'uic ta barco.

¹¹Ya jchap jc'op ta atojolic, ma ba ya caq'uix xan ta lajel ta puhlel spisil bintic cuxajtic, ma xtalix yan puhlel te ya sjin te bahlumilale, xchi.

¹²Soc la yal te Diose: Hich ay te seña yu'un te chapbil-c'op te ma xlaj sc'oblal te ya cac' ta jtojol soc ta atojolic soc spisil bintic cuxajtic:

¹³Cac'oj ta tocal te xojob cu'un, ha seña ya xc'oht yu'un te jc'op la jchap soc te bahlumilale.

¹⁴Te c'alal ya cac' tal tocal ta sba te bahlumilal, ya me xchicnaj te xojob cu'un ta tocal.

¹⁵Hich ya jna' a te jc'op la jchap ta atojol soc ta stojol spisil te bintic cuxajtic, ma ba ya xtal xan puhlel te ya slajin spisil te bintic cuxajtique.

¹⁶C'alal ya xchicnaj te xojob ta yohlil te tocal, ya me quil soc ya me jna' te chapbil-c'op te ma xlaj sc'oblal ta stojol Dios soc ta stojol spisil bintic cuxajtic ta bahlumilal, xchi.

¹⁷Te Dios la yalbe te Noé: Ha seña yu'un te chapbil-c'op ini te la jchap soc ha'at soc spisil bintic cuxajtic ta q'uinal, xchi.

¹⁸Te snich'nab Noé te loq'uic ta barco, ha te Sem, Cam soc Jafet. Ha stat Canaán te Cam.

¹⁹Ha'ic te oxtuhl snich'nab te Noé, ha ta scuentahic te noj xan te bahlumilale.

²⁰Patil te Noé hahch schahpan te lumq'uinal, la sts'un sts'usubil.

²¹La yuch'be ya'lel te ts'usube, yacub yu'un, la schol sc'u' spac' ta yutil snahilpac'.

²²Te Cam, te ha stat te Canaán, la yil te mayuc sc'u' spac' te state; la yalbe ya'iy te sbanquil soc yihts'in te ayic ta fuera.

²³Hich te Sem soc te Jafet la stsaquic jlihc c'u'ul, la yac' bahel ta snehquelic, walac'pat behenic ochel, la smuquic a te static te mayuc sc'u' spac', hich ma ba la yilic a te mayuc sc'u' spac' te statique.

²⁴C'alal cux yo'tan ta yacubel te Noé soc te la sna' te bin pasbot yu'un te squerem-nich'an,

²⁵hich la yal: ¡Bohlubuc me sc'oblal te Canaán! ¡A'bat yu'un a'batetic ac'a c'ohtuc ta stojol te yermanotac! xchi sc'oblal.

²⁶Soc la yal xan: ¡Te Jehová te Dios cu'un, ac'a ya'be bendición te Sem, yan te Canaán ha ya'bat ac'a c'ohtuc!

²⁷¡Ac'a tohyuc sc'oblal yu'un Dios te Jafet, ac'a snahimbe snahilpac' Sem, yan te Canaán ha ya'bat ac'a c'ohtuc! xchi sc'oblal.

²⁸Te c'alal c'axemix a te puhlel, lajuneb swaxaclajunwinic (350) xan ha'bil cuxul te Noé.

²⁹C'alal ayix lajuneb swaxacwinic yoxbahc' (950) ya'bilal a te Noé, cham.