Read Tzeltal 2 Samuel 10 Bible Online

2 Samuel 10 - Tzeltal bible

2 Samuel 10

¹Ta patil cham te ajwalil yu'un te snich'nab Amón; hil ta sjelol ta ajwalil te Hanún te snich'ane.

²La yal te David: Ya me jc'uxultay te Hanún snich'an Nahas, hich te bin ut'il la sc'uxultayon te state, xchi. Ha yu'un te David la sticon bahel a'batetic scuenta yu'un ya smuc'ubtesbe q'uinal ya'iy yu'un cham te state. Te c'alal c'ohtic te a'batetic yu'un David ta sq'uinal te snich'nab Amón,

³te príncipaletic yu'un la yalbeyic te Hanún te ajwalil yu'unic: ¿Hich bal ach'uhunej te ta scuenta yich'el ta muc' atat te David la sticon tal te mach'atic ya smuc'ubtesbat q'uinal yac awa'iy? ¿Ma bal ha'uc la sticon tal te a'batetic yu'un ya stsahtayic te pueblo yu'un ya slajinic? xchihic.

⁴Ha yu'un te Hanún la stsac te a'batetic yu'un David, la sloq'uesbe j'ohlil te yisimic soc la set'be ta ohlil te sc'u'ic c'alal ta scho yitic, hich la sticon suhtel.

⁵C'alal hich a'bot sna' te David, la sticon ta halbeyel, como ayic ta bayel q'uexlal. Hich la yal te ajwalil: Hilanic ta Jericó ha to c'alal ya xcha'col te awisimic, hich ya suhtex talel a, xchi.

⁶Te c'alal la yilic te snich'nab Amón te ihlintaybil c'ohtic ta stojol David, la stojic j'ohlil yoxpic (20,000) ta tuhl siriohetic ta Bet-rehob soc ta Soba, lajunwinic yoxbahc' (1,000) ta tuhl winiquetic yu'un te ajwalil ta Maaca, soc j'ohlil scha'pic (12,000) ta tuhl winiquetic yu'un Is-tob.

⁷Te c'alal hich la ya'iy te David la sticon bahel Joab soc spisil te soldadohetic te ay yipic te ma xiwic.

⁸Loq'uic tal te amonetic, la schol sbahic yu'un guerra ta yochibal te pueblo. Pero te siriohetic yu'un Soba soc Rehob, soc te swinictac te Is-tob soc Maaca parte la yac' sbahic ta aquiltic.

⁹Te Joab c'alal la yil te scholoj sbahic ta sit soc ta spat, la stsa te mero lequil soldadohetic ayic ta Israel, la ya'be schahpan sbahic ta ya'beyel guerra te siriohetique.

¹⁰Te jayeb xan hil te soldadohetic la ya'be ta scuenta te yermano Abisai, la ya'be schahpan sbahic ta ya'beyel guerra te amonetique.

¹¹Hich la yal: Teme ha yac stsalbelon te siriohetic, ya me xtal acoltayon. Ha nix hich teme yac stsalbelat te amonetic, ho'on ya xtal jcoltayat.

¹²Ac'a me fuersa, ya me jpastic tulan ta scuenta te pueblo cu'untic soc te pueblohetic yu'un te Dios cu'untique. Ac'a spas te bin lec ta pasel ya yil te Jehová, xchi.

¹³Te Joab soc te soldadohetic sjoquinej nohpojic bahel ta ya'beyel guerra te siriohetic; pero loq'uic ta ahnel ta stojol.

¹⁴Te c'alal la yilic te amonetic te yaquic ta ahnel te siriohetic, ha nix hich loq'uic ta ahnel ta stojol te Abisai, ochic bahel ta yutil te pueblo. Te Joab la squehchan ta ya'beyel guerra te snich'nab Amón, suht bahel ta Jerusalén.

¹⁵Te c'alal la yil te siriohetic te tsalotiquix yu'un te snich'nab Israel, la stsob xan sbahic.

¹⁶Te Hadad-ezer la sticon ta iq'uel tal te siriohetic te ayic ta jehch muc'ul-ha' Éufrates. Hich talic ta Helam, ha jtsobaw yu'un spisil te soldadohetic yu'un Hadad-ezer te Sobac.

¹⁷C'alal hich la ya'iy te David, la stsob spisil Israel, c'axic bahel ta Jordán, c'ohtic ta Helam. Te siriohetic la schahpan sbahic, la ya'beyic guerra te David.

¹⁸Pero loq'uic ta ahnel ta stojol Israel. Te David la smil ho'lajunwinic scha'bahc' (700) ta tuhl winiquetic ta carreta yu'un guerra soc ho'pic (40,000) ta tuhl winiquetic te cajajtic ta cawu. Ha nix hich la yehchentes te Sobac te jtsobaw yu'un te soldadohetic, tey laj a.

¹⁹Spisil te ajwaliletic te la scoltayic te Hadad-ezer, c'alal la yilic te tsalotic yu'un Israel, la sc'anic lamal q'uinal soc Israel, soc la yac' sbahic ta a'batinel ta stojolic. Ta hich ora bahel te siriohetic la xi'ic te ya scoltayic te amonetique.