Read Tzeltal 2 Samuel 12 Bible Online

2 Samuel 12 - Tzeltal bible

2 Samuel 12

¹Te Jehová la sticon bahel Natán ta stojol David. C'alal c'oht ta stojol, hich la yalbe: Ay cheb winiquetic ta jun pueblo, jc'ulej te jtuhle, pobre te yane.

²Te jc'ulej ay bayel tuminchijetic soc wacaxetic yu'un.

³Pero te pobre ha nax jcoht antsil tuminchij te smanoj soc te la scoltes, te pajal muc'ub soc te snich'nab. Ha nix ya swe'elimbe te swe'el soc ya yuch' ha' ta svaso, soc ya xway ta stahn. Hich c'oht te bin ut'il yantsil-nich'an.

⁴Ay tal ta behel jtuhl winic ta stojol te jc'ulej winic. Te jc'ulej winic ma ba la sc'an la stsac te stuminchij o swacax yu'un ya spasbe swe'el te yula'. Ha la spojbe te tuminchij yu'un te pobre, la schahpan yu'un ya ya'be swe' te yula', xchi te Natán.

⁵Bayel ilin yu'un te David ta stojol te jc'ulej winic. Hich la yalbe te Natán: ¡Yiloj Jehová, ya sc'an ya xlaj te mach'a hich spasoj!

⁶Soc ya me stoj chaneb buelta te bin ut'il stojol te tuminchij yu'un te hich la spas, te ma ba la sna'be yo'bolil sba, xchi.

⁷Ha yu'un te Natán hich la yalbe te David: Ha'at abi. Hich yaloj te Jehová te Dios yu'un Israel: Ho'on la jtsahat ta ajwalil yu'un Israel, la jcoltayat ta sc'ab Saúl.

⁸La jca'bat te sna soc te antsetic yu'un te awajwal, soc la jca'bat acuentahin te Israel soc te Judá. Teme ma ba bayel yac awa'iy, ay to bayel xan ya ca'bat te hichuque.

⁹¿Bin yu'un te mayuc sc'oblal ta awo'tan te sc'op te Jehová te la apas te bin chopol ta stojol? La awac' ta milel ta espada te Urías te heteo-winic soc la awic'be te yihname. La awac' ta milel ta scuenta te espada yu'un te amonetique.

¹⁰Ha yu'un mayuc bin ora ya yihquitayat te espada ta ana, como la ap'ajon soc la awic' awihnamin te yihnam Urías te heteo-winique.

¹¹Hich yaloj te Jehová: Tey nix ta mero ana ya cac' te ya xhahch awocol. Ta asit ni me ya quic'bat te antsetic awu'un, ya ca'be te mach'a ma yanuc parte awu'un, ha ya xway soc ta jamal ta c'ahc'alel.

¹²Como ha'at la apas ta muquen; pero ho'on ya cac' c'ohtuc ta pasel ta stojol spisil Israel, xchi.

¹³Te David hich la yal ta stojol te Natán: La jta jmul ta stojol Jehová, xchi. Te Natán la yalbe te David: Te Jehová la spasbatix perdón yu'un te amule, ma ba ya xlajat yu'un.

¹⁴Pero te bin ut'il hich la ap'aj a te Jehová,[9] te alal te ayinemix ya me xcham, xchi.

¹⁵Hich suht bahel ta sna te Natán. Te Jehová la ya'be tulan chamel te snich'an David te alatayot yu'un te yihnam Urías.

¹⁶Te David tulan la sc'opon Dios yu'un te alale, la scom swe'el, och ta sna, metsel ta lum a c'ax yu'un te ahc'abal.

¹⁷Te mamaletic te ayic ta sna, baht yalbeyic wocol te yacuc xhahch te wayal ta lum, pero ma ba la sc'an hahch soc ma ba la sjoquinic ta we'el.

¹⁸Ta shuquebal c'ahc'al cham te alale, pero te a'batetic yu'un David xiwic ta yalbeyel ya'iy te chamix te alale. Hich la yalbe sbahic: Te c'alal cuxul to a te alale, la jc'opontic, ma ba la yich'otic ta cuenta. ¿Bin ut'il ya calbetiquix a te chamix te alale? ya wan yuts'in sba yu'un, xchihic.

¹⁹Pero te David, c'alal la yil hich yac yalbebel sbahic te a'batetic yu'un, la sna' te chamix te alale. La sjoc'obe te a'batetic yu'un: ¿Yu'un bal chamix te alale? xchi. Chamix, xchihic.

²⁰Hich te David hahch ta lum, atin, la ya'be sba perfume, la sjeltay sc'u' spac', och bahel ta sna te Jehová soc la sch'uhuntay. Patil baht ta sna, la sc'an swe'el, hich we'.

²¹Hich joc'obot yu'un te a'batetic yu'un: ¿Bin a te la apase? Te c'alal cuxul to a te alal, la acom awe'el soc oc'at. Pero te c'alal cham hahchat soc we'at, xchihic.

²²Hich la sjac': Te c'alal cuxul to a te alale, la jcom jwe'el soc oc'on, yu'un la jcal: Ma jna' teme ya sna'bon yo'bolil jba te Jehová, te ya xcuxaj te alale.

²³Pero yo'tic te bin ut'il chamix ¿bin yu'un ya jcom xan jwe'el? ¿Ya bal xhu' cu'un suhtesel tal? Ho'on ya xbohon ta banti ay, yan stuquel ma ba ya xtalix ta ban ayon, xchi.

²⁴Te David la smuc'ubtesbe q'uinal ya'iy te Betsabé te yihnam, la sjoquin xan ta wayel. Cha'ayin xan yal, Salomón sbihil c'oht yu'un. C'ux ta o'tanil yu'un Jehová.

²⁵Te Jehová la sticombe c'op ta scuenta te jalwanej Natán; hich la ya'be sbihilin Jedidías[10] te alale, hich te bin ut'il yaloj te Jehová.

²⁶Te Joab la ya'be guerra te Rabá yu'un te snich'nab Amón, la yich' te pueblo yu'un ajwalil.

²⁷Ha yu'un te Joab la sticon bahel winiquetic ta stojol David, hich la yal: Ho'on la jca'be guerra te Rabá, la jquich'ix te lugar yu'un te ha'etic.

²⁸Ha yu'un tsoba te soldadohetic hilemic, la', a'beya guerra te pueblo, tsala, repente ho'on ya quich', hich ya yich'bon te jbihile, xchi.

²⁹Hich te David la stsob spisil te soldadohetic, baht ta Rabá, la ya'be guerra, hich la yich'.

³⁰La sloq'uesbe ta sjol te scorona te ajwalil, jun talento[11] oro te yalal soc yich'oj t'ujbil tonetic; a'bot ta sjol David, te bayel biluquetic la spoj ta pueblo.

³¹Soc la yic'ticlan loq'uel te mach'atic tey ayic a, la yac'ticlan ta a'tel ta sierra, ta smajojibal trigo pasbil ta taq'uin soc ta echej, soc la yac'ticlan ta a'tel ta hornohetic yu'un ladrillo. Hich nix la spasbe spisil te pueblohetic yu'un te amonetique. Patil suht xan bahel ta Jerusalén te David soc spisil te soldadohetic yu'une.