Read Tzeltal 2 Samuel 16 Bible Online

2 Samuel 16 - Tzeltal bible

2 Samuel 16

¹C'axel to bahel ta ba wits a te David, loc' tal ta tahel yu'un Siba te ya'bat Mefi-boset, yic'oj cheb burrohetic te yich'ojic smonturahic soc scuchoj lajunwinic (200) ta pehch pan, ho'winic (100) ta pehch pasas, ho'winic (100) ta pehch taquijtesbil higohetic soc jun yawil vino.

²Te ajwalil la sjoc'obe te Siba: ¿Bin yu'un la awich' tal ini? xchi sc'oblal. La sjac' te Siba: Te burrohetic ha ya xmohic a te mach'atic ay yu'un te ajwalil, te panetic soc te sit awal-ts'unubiletic yu'un ha ya swe'ic te winiquetic, soc te vino ha ya yuch'ic te mach'atic ya xluhbic ta jochol taquin q'uinal, xchi.

³Hich joc'obot yu'un te ajwalil: ¿Banti ay te smam awajwal? xchi sc'oblal. Hilem ta Jerusalén, como la yal: Yo'tic te mach'atic ayic ta Israel ya me suhtbonic te ban c'alal smacoj ta ajwalil te jmamuch, xchi.

⁴Ha yu'un te ajwalil hich la yalbe te Siba: Lec ay hiche. Yo'tic ha'at awu'unix spisil te bintic ay yu'un te Mefi-boset, xchi. La snijan sba te Siba, hich la yal: Te lecucon ta asit, ajwalil cu'un, xchi.

⁵Te c'alal c'oht ta Bahurim te ajwalil David, loc' tal jtuhl sts'umbal Saúl tey a, Simei sbihil, snich'an Gera, yac ta bohlc'optaywanej,

⁶soc yac sch'ojticlambel ta ton te David soc te winiquetic joquimbil yu'un, aunque joytaybil yu'un te mach'atic sjoquinej soc te winiquetic te ay yip yo'tanic te ayic ta swa'el soc ta sq'uexam.

⁷Te Simei hich yac ta bohlc'optaywanej: ¡Loc'an bahel li'i, loc'an bahel li'i, jmilawal soc jchopol-o'tan!

⁸Te Jehová la ya'batix atojbe te sch'ich'el te mach'atic ay yu'un Saúl, te la apojbe ya'tel te ban c'alal smacoj ta ajwalil. Yo'tic te Jehová la ya'beyix ta sc'ab te anich'an Absalón. ¡Tahbilat abohlil ta scaj te jmilawat! la yut.

⁹Ha yu'un te Abisai te yal Sarvia, hich la yalbe te ajwalil: ¿Bin yu'un ya sbohlc'optay te ajwalil cu'un te chamen ts'i' ini? Awocoluc, ac'awon sohlel yu'un ya jbojbe loq'uel sjol, xchi.

¹⁰Pero la sjac' te ajwalil: ¿Bin cochelex a te ha'ex, yalatac Sarvia? Teme hich yac ta bohlc'optaywanej, yu'un hich halbot yu'un Jehová te ya sbohlc'optay te David. ¿Mach'a ya xhu' ya yalbe: Bin yu'un te hich yac apas? xchi.

¹¹Patil te David hich la yalbe te Abisai soc spisil te winiquetic yu'un: Ha nix te jnich'an te yo'tanuc ya smilon, ¿ha'uc to balix a te sts'umbal Benjamín? Ihquitayahic, ac'a sbohlc'optayon, como ha nix te Jehová te halbot yu'une.

¹²Ya wan yilbon jwocol te Jehová soc ya ya'bon bendición ta scaj te bohlc'optayel yu'une, xchi.

¹³C'alal yaquic ta behel bahel a te David soc te swinictac, yac ta behel ta jehch wits te Simei, yac ta sbohlc'optayel, yac ta sch'ojticlanel ta ton soc yac ta sbuhquilanel ts'u'lum.

¹⁴Te ajwalil soc spisil te pueblo joquimbil yu'un luhben a c'ohtic ta muc'ul-ha' Jordán, tey la scux yo'tanic a.

¹⁵Hich ora te Absalón soc spisil te winiquetic yu'un Israel ochic ta Jerusalén soc Ahitofel.

¹⁶Te c'alal Husai te arquita-winic, te yamigo te David, tal sta te Absalón, hich la yal: ¡Viva ajwalil, viva ajwalil! xchi.

¹⁷Te Absalón la sjoc'obe te Husai: ¿Hich bal te yutsil awo'tan ta stojol te awamigo? ¿Bin yu'un ma ba bahat soc te awamigo? xchi.

¹⁸Te Husai hich la yalbe te Absalón: Ma'uc, ho'on ya joquin soc ya xhilon ta stojol te mach'a tsahbil yu'un te Jehová soc te pueblo soc spisil te winiquetic yu'un Israel.

¹⁹¿Mach'a ya cac' jba ta a'batinel yu'un, ma bal ha'uc te snich'ane? Hich te bin ut'il la jcac' jba ta a'batinel yu'un te atat, ha nix hich ya cac' jba ta a'batinel awu'un, xchi.

²⁰Ha yu'un te Absalón hich la yalbe te Ahitofel: Hala ca'iycotic, ¿bin ya sc'an ya jpascotic? xchi.

²¹Te Ahitofel la yalbe te Absalón: Wayan soc te antsetic yu'un te atat te yihquitayej hilel ta canan-na, hich me ya ya'iy spisil Israel te jc'axel la awac' aba ta p'ajel yu'un te atat, hich ya yich' xan yip yo'tanic a spisil te mach'atic sjoquinejat, xchi.

²²Ha yu'un la spasbeyic snahilpac' te Absalón ta ba na, hich way soc tey a te antsetic yu'un te stat ta stojol spisil Israel.

²³Ta hich ora, te bin la yal te Ahitofel pajal c'ohem soc te ha yac ta c'op te Diose; hich ay spisil te bin la yal te Ahitofel ta stojol David soc ta stojol Absalón.