Read Tzeltal 2 Samuel 19 Bible Online

2 Samuel 19 - Tzeltal bible

2 Samuel 19

¹Hich halbot te Joab: Yac ta oq'uel te ajwalil, yac ta mel-o'tan yu'un te Absalón, xchi.

²Ha yu'un te tsalaw yu'unic sutp'ij ta mel-o'tan yu'un spisil te pueblo; como la ya'iyic ta hich ora te yac ta mel-o'tan yu'un snich'an te ajwalil.

³Te soldadohetic ta hich ora muquen ochic tal ta pueblo, hich te bin ut'il muquen ya x'ochic tal soldadohetic te q'uexawic yu'un te ahnic tal ta guerra.

⁴Te ajwalil smacoj sit, tulan yac ta aw: ¡Jnich'an, Absalón, Absalón, jnich'an, jnich'an! xchi.

⁵Ha yu'un te Joab baht ta na banti ay te ajwalil, hich la yalbe: Yo'tic awac'oj ta q'uexlal te a'batetic awu'un te la scoltaybatix acuxlejal soc te queremetic, ach'ixetic awu'un, te antsetic awu'un soc te yan antsetique.

⁶Ha c'ux ta awo'tan te mach'a ya yihlayat, soc yac awihlay te mach'atic c'uxat ta yo'tanic. Como la awaq'uix ta ilel te mayuc sc'oblal ta awo'tan te príncipaletic soc te a'batetic awu'une. Yo'tic la jna'ix te ha lec ta awo'tan te ha'uc cuxul te Absalón soc te lajucotic ta jpisilcotic.

⁷Hahchan hiche, loc'an bahel, soc lec xac'opon te a'batetic awu'un. Como ya cal ta jamal ta stojol Jehová, teme ma ba ya xloc'at, mayuc jtuhluc winic ya xhil sjoquinat ta ahc'abal ini; soc c'ax hich wocol ya xc'oht ta atojol a te bin ut'il spisil yantic wocoletic c'ohemic ta atojol te c'alal queremat to a c'alal ora ini, xchi.

⁸Ha yu'un hahch te ajwalil, la shuhcan sba ta yochibal te pueblo. C'alal halbot spisil te pueblo: Ha hucul ta yochibal te pueblo te ajwalil, te xchihe, hich tal spisil te pueblo ta stojol te ajwalil. Yan te israeletic, jujutuhl ahniquix bahel ta snahic a.

⁹Spisil ta chahp sts'umbal Israel yacalic ta stijel sbahic ta c'op, hich yac yalbelic: Te ajwalil la scoltayotic loq'uel ta sc'ab te jcontratic, la scoltayotic loq'uel ta sc'ab te filisteohetic; pero ta scaj te Absalón loq'uemix bahel ta ahnel ta sq'uinal.

¹⁰Te Absalón, te la jcotsestic ta ajwalil cu'untic, lajix ta guerra. ¿Bin yu'un te ma xc'opojex yu'un te yacuc suht xan tal te ajwalil? xchihic.

¹¹Hich te ajwalil David la sticombe c'op te cheb sacerdotehetic Sadoc soc Abiatar, hich la yalbe: Halbeyahic te mamaletic ta Judá: ¿Bin yu'un te ha'ex patil yac awiq'uic suhtel tal ta sna te ajwalil, te bin ut'il ta scomon-c'op spisil Israel tal ta stojol te ajwalil yu'un yacuc suht tal ta sna?

¹²Ha'ex quermanohex, ha'ex jbaq'uetalex soc jbaquelex. ¿Bin yu'un te ha'ex patil yac awiq'uic suhtel tal te ajwalil, xchihex?

¹³Soc hich nix xawalbeyic te Amasa: ¿Ma bal ha'ucat jbaquel soc jbaq'uetalat? Dios ac'a ya'bon castigo, soc c'ax to xan hich a, teme ma ba muc'ul jtsobaw yu'un te soldadohetic cu'un ya xc'ohat yo'tic scuenta sjelol te Joab, xchi.

¹⁴Hich junax c'oht yo'tanic te winiquetic yu'un Judá, hich te bin ut'il jtuhl winic, yu'un ya sticonic ta halbeyel te ajwalil: Suhtan tal soc spisil te a'batetic awu'un, xchihic.

¹⁵Hich suht tal te ajwalil, hul ta muc'ul-ha' Jordán. Te Judá tal ta Gilgal ta stahel bahel te ajwalil soc ta scoltayel sohlel ta Jordán.

¹⁶Te Simei snich'an Gera, te sts'umbal Benjamín te talem ta Bahurim, ora baht soc te winiquetic yu'un Judá, baht sta tal te ajwalil David.

¹⁷Sjoquinej tal lajunwinic yoxbahc' (1,000) ta tuhl winiquetic yu'un Benjamín. Ha nix hich te Siba, te ya'bat te mach'atic ay yu'un te sna Saúl, soc te ho'lajuntuhl (15) snich'nab soc jtahb (20) ta tuhl ya'bat, ora co bahel ta Jordán ta stojol te ajwalil.

¹⁸Sohlic bahel ta banti ya xhu' ta teq'uel ha', yu'un ya yiq'uic sohlel tal te mach'atic ay yu'un te ajwalil soc yu'un ya spasic te bin ya sc'an yo'tan. Te c'alal sohl bahel ta jehch ha' Jordán te ajwalil, te Simei snich'an Gera c'oht squejan sba ta stojol,

¹⁹hich la yalbe: ¡Te cajwal ma me xyich'bon ta cuenta te falta cu'un! Ma me xana'bon xan bintic chopol la spas te a'bat awu'un te bin ora loc' bahel ta Jerusalén te ajwalil cu'un; ma me sq'uej ta yo'tan te ajwalil.

²⁰Como ho'on, te a'baton awu'un, jna'oj te jtahoj jmul; pero ho'on nahil talon yu'un spisil te mach'atic ay yu'un José ta stahel bahel te ajwalil cu'une, xchi.

²¹Hich te Abisai te yal Sarvia la yal: ¿Ma bal yacuc xlaj te Simei yu'un te la sbohlc'optay te mach'a tsahbil yu'un Jehová? xchi.

²²La sjac' te David: ¿Bin cochelex a, yalatac Sarvia, yu'un te jcontra ya xc'ohex yo'tic? ¿Ya bal sc'an te ay mach'a ya xlaj yo'tic ta Israel? ¿Ma bal jna'oj te yo'tic ya xcha'ochon ta ajwalil yu'un Israel? xchi.

²³Patil te ajwalil hich la yalbe te Simei: Ma ba ya xlajat, xchi. Te ajwalil hich la yal ta jamal.

²⁴Ha nix hich te Mefi-boset snich'an Saúl, loc' ta stahel te ajwalil, ma ba spocoj yoc, ma ba set'oj yisim, soc ma ba sac'oj sc'u' spac' a te bin ora loc' bahel te ajwalil ha to c'alal lec suht tal.

²⁵Te c'alal tal ta Jerusalén ta stahel te ajwalil, hich halbot yu'un te ajwalil: Mefi-boset, ¿bin yu'un ma ba la ajoquinon bahel? xchi sc'oblal.

²⁶Ha la sjac': Ajwalil cu'un, la slo'loyon te a'bat cu'un, como hich la yal te a'bat awu'une: Chahpambon burro yu'un ya xmohon a, ya xbohon ta ban ay te ajwalil, xchihon, como coxo' te a'bat awu'un.

²⁷Pero la slehix ta c'op te a'bat awu'un ta stojol te ajwalil cu'un. Pero te ajwalil cu'un hich ay te bin ut'il ch'ul a'bat yu'un Dios. Pasa hiche te bin lec yac awa'iy.

²⁸Como spisil te mach'atic ay yu'un ta sna te jtat ayic ta scuenta lajel ta stojol te ajwalil cu'un, pero ha'at la awac' te a'bat awu'un ta yohlil te mach'atic ic'bilic ta we'el ta amesa. ¿Bin yan ya xhu' ya jc'ambe ta stojol te ajwalile? xchi.

²⁹Hich halbot yu'un te ajwalil: ¿Bin xan yan c'op? Ho'on la jnopix te ha'at soc te Siba ya me apasic ta ohlil te q'uinale, xchi.

³⁰Te Mefi-boset la yalbe te ajwalil: Ha ac'a yich' hilel spisil, como te ajwalil cu'un lec suht tal ta sna, xchi.

³¹Ha nix hich te Barzilai te galaad-winic, co tal ta Rogelim, sohl bahel ta Jordán soc te ajwalil, yu'un ya sjoquin bahel ta jehch ha' Jordán.

³²Mamalix te Barzilai, ayix chanwinic (80) ya'bilal. Ya'beyejix biluquetic te ajwalil te c'alal ay ta Mahanaim, como mero jc'ulej winic.

³³Te ajwalil hich la yalbe te Barzilai: Conic ta Jerusalén, tey ya jcuentahinat a, xchi.

³⁴Pero te Barzilai la yalbe te ajwalil: ¿Jayeb xan ha'bil ya xcuxajon yu'un ho'on ya xmohon bahel soc te ajwalil?

³⁵Ayix chanwinic (80) ca'bilal. ¿Ya bal xhu' cu'un stsahtayel te bin ay yutsil soc te bin mayuc yutsil? ¿Ya bal ya'iybe sbuhts' te awa'bat te bin ya swe' o ya yuch'? ¿Ya bal ca'iybeyix sc'ayojic te winiquetic soc te antsetic? ¿Bin yu'un ya ya'be xan swocol te ajwalil cu'un te a'bat awu'une?

³⁶Te a'bat awu'un ya me sjoquinat jts'ihnuc xan bahel ta jehch ha' Jordán. ¿Bin yu'un ya ya'bon hich jmuc'ul mahtan te ajwalil?

³⁷Ya calbat wocol te yacuc awac' suhtel te a'bat awu'un, te yacuc xchamon ta slumal te banti mucul te jme'jtate. Pero li' ay te awa'bat Quimam. Ac'a sohluc bahel soc te ajwalil cu'un, pasbeya te bin lec yac awa'iy, xchi.

³⁸La sjac' te ajwalil: Ac'a sjoquinon bahel te Quimam. Ya jpasbe te bin lec yac awa'iy. Spisil te bin yac ac'ambon ya jpas, xchi.

³⁹Spisil te pueblo sohlic bahel ta Jordán. Te c'alal sohlix bahel a te ajwalil, la yuhts'uy hilel te Barzilai, la ya'be bendición. Hich te Barzilai suht bahel ta sna.

⁴⁰Hich te ajwalil c'ax bahel ta Gilgal, sjoquinej bahel yu'un Quimam. Spisil te pueblo yu'un Judá la sjoquinic bahel te ajwalil soc j'ohlil te pueblo yu'un Israel.

⁴¹Spisil te winiquetic yu'un Israel bahtic ta stojol te ajwalil, hich la yalbeyic: ¿Bin yu'un te quermanotactic ta Judá la yajwalinat stuquelic, te la yiq'uic sohlel tal ta Jordán te ajwalil soc te mach'atic ay yu'un, soc spisil te a'batetic yu'un David? xchihic.

⁴²Spisil te winiquetic yu'un Judá hich la sjac'beyic sc'op te winiquetic yu'un Israel: Como ha jmolol-ts'ahquilcotic te ajwalil. ¿Bin yu'un te ya x'ilinex yu'un? ¿Yu'un bal ay bin la jwe'becotiquix te ajwalil? ¿Ay bal bin quich'beyejcotic ta mahtanil yu'un? xchihic.

⁴³Te winiquetic yu'un Israel hich la sjac'beyic te winiquetic yu'un Judá: Te ho'otcotic lajunchahp ayotcotic ta stojol te ajwalil, yan te ha'exe jchahp nax, ha yu'un c'ax to xan hich cu'uncotic a te David. ¿Bin yu'un te mayuc lec jc'oblalcotic awu'unic? ¿Ma bal ho'otcotic nahil la jcalcotic te ac'a suhtuc tal te ajwalil cu'untique? xchihic. Pero ha tulan xan c'oht a te c'opetic yu'un te winiquetic yu'un Judá te bin ut'il te winiquetic yu'un Israel.