Read Tzeltal 2 Samuel 20 Bible Online

2 Samuel 20 - Tzeltal bible

2 Samuel 20

¹Ay jtuhl chopol winic tey a, Seba sbihil, snich'an Bicri, sts'umbal Benjamín, te la yoq'uesin xulubil soc hich la yal: Mayuc bin ay cu'untic ta stojol David, mayuc bin quich'ojtic yu'un te snich'an Isaí. ¡Ta jujutuhl bahan ta anahic, Israel! xchi.

²Hich spisil te winiquetic yu'un Israel la yihquitayic hilel te David, la st'unic te Seba snich'an Bicri; pero te mach'atic yu'un Judá la st'unic te ajwalil yu'unic c'alal ta muc'ul-ha' Jordán ha to ta Jerusalén.

³Te c'alal c'oht ta sna ta Jerusalén te David, la yic' tal te lajuntuhl yantic antsetic yu'un te yihquitayej hilel ta canan-na, la smacticlan ta na, tey la yac' ta mac'linel a. Pero mayuc bin ora te way xan soc. Tey macalic a, me'ba' ants hilic ha to c'alal chamic.

⁴Patil te ajwalil hich la yalbe te Amasa: Ic'bon tal te winiquetic yu'un Judá li' ta oxeb c'ahc'al, ya me xtalat soc, xchi.

⁵Hich baht te Amasa ta yiq'uel tal te mach'atic yu'un Judá, pero c'ax xan c'ahc'al a te bin ut'il halbote.

⁶Ha yu'un te David hich la yalbe te Abisai: Te Seba snich'an Bicri, c'ax xan hich ya yac' jwocoltic a te bin ut'il Absalón. Ic'a bahel hiche te a'batetic yu'un te awajwal, nutsa bahel, teme repente ay ya x'och bahel ta pueblo te joybil ta ts'ahc, tey ya scoltay sba ta jc'abtic a, xchi.

⁷Hich loq'uic bahel ta Jerusalén te winiquetic yu'un Joab, soc te cereteohetic, peleteohetic soc te winiquetic te ma xiwic, baht snutsic te Seba snich'an Bicri.

⁸Te c'alal ayic ta muc'ul ton te ay ta Gabaón, loc' tal ta tahel yu'un te Amasa. Te Joab slapoj c'u'ul scuenta soldado, soc ay espada yu'un soc sna chucul ta sch'uht, ch'ay cohel te espada yu'un c'alal nohpoj bahel ta stojol te Amasa.

⁹Te Joab la sjoc'obe te Amasa: ¿Lec bal ayat hermano? xchi. Hich te Joab la stsacbe ta swa'el-c'ab te yisim yu'un ya yuhts'uy.

¹⁰Pero ma ba la yil te Amasa te espada yich'oj ta sc'ab te Joab. La slow ta sch'uht, bosq'uij loq'uel ta lum te sbiquil, junax buelta la slow a, cham. Patil te Joab soc te yihts'in Abisai, bahtic ta snutsel te Seba snich'an Bicri.

¹¹La stehc'an sba jtuhl winic yu'un Joab ta sts'ehl te Amasa, hich la yal: Mach'ayuc a te c'ux ta yo'tan te David, ac'a st'un bahel te Joab, xchi.

¹²Te Amasa yac balawetel ta sch'ich'el ta yohl be. Spisil te mach'atic ya xc'axic tey a, ya stehc'an sbahic ta yilel. Te winic, c'alal la yil te spisil te pueblo ya stehc'an sbahic ta yilel, la sloq'uesbe te sbaq'uetal Amasa ta be, la yac' ta ha'mal soc la smuc ta c'u'ul.

¹³Te c'alal la yich'ix loq'uesel ta be a, c'axic bahel spisil te mach'atic la st'unic Joab yu'un snutsel te Seba snich'an Bicri.

¹⁴Te Seba c'ax bahel ta spisil ta chahp sts'umbal Israel c'alal ta Abel-bet-maaca, spisil te sts'umbal Barim la stsob sbahic soc la st'unic bahel.

¹⁵Te c'alal c'oht ta Abel-bet-maaca te swinictac Joab, la sjoytayic, la spasic smohibic ta sts'ahcul te pueblo, hich la sjoytayic. Spisil te pueblo te sjoquinej te Joab a'tejic ta sjinel te ts'ahque.

¹⁶Ay jtuhl ants te ay sp'ijil, hahch ta aw ta pueblo, hich la yal: ¡A'iya awa'iyic! ¡A'iya awa'iyic! Awocoluc, halbeyahic te Joab te ac'a taluc yu'un ya xc'opojon soc, xchi.

¹⁷Te c'alal nohpoj bahel te Joab ta stojol te ants, hich la yalbe: ¿Ha'at bal te Joab? xchi. Ho'on, xchi. A'iybeya awa'iy sc'op te awa'bat, xchi te antse. Ya me ca'iy, xchi te Joab.

¹⁸Hich la yal xan te antse: Ta namey hich ay ta halel: Te mach'a ay bin ya sjoc'oy, ac'a sjoc'oy ta Abel, te xchihe, hich ya xchapaj biluc c'opil.

¹⁹Ho'on lamal co'tan soc jun co'tan ta Israel. Ha'at c'an alajinix jun pueblo te ha nanil ta Israel. ¿Bin yu'un te yac alajin te bintic ay yu'un Jehová? xchi.

²⁰La sjac' te Joab: Mayuc bin ora te ya xc'oht ta pasel te ho'on ya jin soc ya jlajin.

²¹Ma hichuc ay. Pero ay jtuhl winic talem ta witsiltic yu'un Efraín, Seba sbihil, snich'an Bicri, te la shach sc'ab ta scontrahinel te ajwalil David. Ha nax me xawa'bon ta jc'ab, hich ya quihquitay hilel te pueblo, xchi. Te ants la yalbe te Joab: Ya me awich' ch'ojbeyel cohel tal sjol c'alal ta ba ts'ahc, xchi.

²²Hich te ants la sc'opon spisil te pueblo soc sp'ijil yo'tan, hich la xot'beyic sjol te Seba snich'an Bicri, la sch'ojbeyic cohel ta stojol Joab. Ha yu'un te Joab la yoq'uesin xulubil, hich la yihquitayic te pueblo, jujutuhl bahtic ta snahilpaq'uic. Te Joab suht bahel ta Jerusalén ta stojol te ajwalil.

²³Te Joab hil ta scuentahinel spisil te soldadohetic yu'un Israel; te Benaía snich'an Joiada, hil ta scuentahinel te cereteohetic soc te peleteohetic.

²⁴Te Adoram jtsobaw yu'un te mach'atic sujbilic ta a'tel; te Josafat snich'an Ahilud, ya sts'ihbay te bin c'oht ta pasel.

²⁵Te Seva ha secretario; te Sadoc soc Abiatar ha sacerdotehetic.

²⁶Te Ira te jaireo-winic ha nix sacerdote yu'un David.