Read Tzeltal 2 Samuel 5 Bible Online

2 Samuel 5 - Tzeltal bible

2 Samuel 5

¹Spisil ta chahp yu'un Israel talic ta stojol David ta Hebrón, hich la yalbeyic: Ilawil, junax jbaquel soc jbaq'uetaltic.

²Ta nahilal, te c'alal ay ta ajwalil cu'untic a te Saúl, ha'at la aloq'ues ta guerra te Israel soc la awic' suhtel tal. Soc hich yalbeyejat te Jehová: Ha'at yac acanantaybon soc ha'at príncipal ya xc'ohat yu'un te pueblo Israel cu'un, xchi.

³Hich spisil te mamaletic yu'un Israel tal ta stojol te ajwalil David ta Hebrón. Te ajwalil David la schap sc'op soc te pueblo ta Hebrón ta stojol Jehová. La smalic ta aceite te David scuenta ajwalil yu'un Israel.

⁴Ay lajuneb scha'winic (30) ya'bilal a te David te c'alal och ta ajwalil. Halaj ta ajwalil cha'winic (40) ha'bil.

⁵Huqueb ha'bil soc waqueb u ay ta ajwalil yu'un Judá ta Hebrón. Ta Jerusalén ay ta ajwalil yu'un spisil Israel soc Judá oxlajuneb scha'winic (33) ha'bil.

⁶Te ajwalil soc te winiquetic yu'un bahtic ta Jerusalén, la ya'beyic guerra te jebuseohetic te nahinemic tey a, hich halbot yu'unic: Ma xhu' ya x'ochat li'i, como te ts'o'sitetic soc coxo'etic ya xhu' ya stenat loq'uel, xchihic. La scuyic te ma xhu' ya x'och te David.

⁷Pero te David la yu'untay te tulan ahnibal ts'ahc ta Sión, ha te Pueblo yu'un David.

⁸Te David yalojix ta hich ora: Te mach'atic ya sc'an ya ya'beyic guerra te jebuseohetic, ac'a ochuc bahel ta jotbil be-ha' ta yutil te lum yu'un ya smilic te ts'o'sitetic soc coxo'etic te ihlaybilic yu'un David, xchi. Tey hahchem a te hich halbil: Ma ba ya x'och ts'o'sit o coxo' ta sna Jehová, te xchihe.

⁹Te David nahin ta tulan ahnibal ts'ahc, ha Pueblo yu'un David sbihil c'oht yu'un. La spasbe sts'ahcul ta sjoyobal, c'alal Milo ha to c'alal ta yutil.

¹⁰Te David behbe yich'bel yip, como joquimbil yu'un Jehová te Dios te scuentahinej spisil.

¹¹Te Hiram ajwalil yu'un Tiro la sticon bahel winiquetic ta stojol David, soc la sticon bahel cedro, carpinterohetic soc albañiletic te la spasbeyic sna te David.

¹²Hich la sna' te David te smelelil otsesot yu'un Jehová ta ajwalil yu'un Israel, soc te a'bot yich' yip ta a'tel ta ajwalil ta scuenta sc'uxul yo'tan ta stojol Israel te pueblo yu'une.

¹³Te David la yic' xan antsetic ta Jerusalén te c'alal loq'uemix tal ta Hebrón. Ayin yan snich'nab queremetic soc ach'ixetic.

¹⁴Hich ay sbihilic te ayinic ta Jerusalén: Samúa, Sobab, Natán, Salomón,

¹⁵Ibhar, Elisúa, Nefeg, Jafía,

¹⁶Elisama, Eliada soc Elifelet.

¹⁷Te c'alal la ya'iyic te filisteohetic te ochix ta ajwalil yu'un Israel te David, spisilic baht slehic yu'un ya ya'beyic guerra. C'alal hich la ya'iy te David, co bahel ta tulan ahnibal.

¹⁸Talic te filisteohetic, la spuc sbahic ta spamlej yu'un Refaim.

¹⁹Ha yu'un te David la sjoc'obe te Jehová: ¿Ya bal ca'be guerra te filisteohetic? ¿Ya bal awa'bon ta jc'ab? xchi. Te Jehová la sjac'be sc'op te David: Bahan, como ya ca'bat ta ac'ab te filisteohetic, xchi sc'oblal.

²⁰Te David tal ta Baal-perazim. Tey la stsalticlan a te filisteohetic, hich la yal: Te Jehová, la sjambon jbe hich te bin ut'il be-ha' ta stsalel te jcontra, xchi. Ha yu'un Baal-perazim[2] sbihil la ya'be te lugare.

²¹Te filisteohetic la yihquitayic hilel tey a te loc'ombahetic yu'unic, te David soc te winiquetic yu'un la schic'ticlanic.

²²Pero te filisteohetic cha'suhtic tal, la spuc sbahic ta spamlej yu'un Refaim.

²³Ha yu'un te David la sjoc'obe te Jehová, hich halbot yu'un: Ma me tojuc xmohat bahel, ya me ajoyic talel ta spatic, tey yac awochintayic a ta banti ay te bálsamo-te'etic.

²⁴Te c'alal yac awa'iybe sc'op ta sni'il te balsamo-te'etic hich te bin ut'il ay mach'atic yac ta behel, hahchan ta ora, como te Jehová ya xnahilij bahel awu'un ta yehchentesel te campamento yu'un te filisteohetic, xchi sc'oblal.

²⁵Te David hich la spas te bin ut'il halbot yu'un te Jehová. La stsal te filisteohetic c'alal ta Gabaón[3] ha to ta Gezer.