Read Tzeltal 2 Samuel 6 Bible Online

2 Samuel 6 - Tzeltal bible

2 Samuel 6

¹Te David la stsob xan spisil te tsahbil winiquetic ta Israel, oxpic soc ho'lajunbahc' (30,000) ta tuhl.

²Hahch bahel ta Baala ta Judá soc spisil te winiquetic sjoquinej, yu'un ya yich' mohel tey a te scaxahul te chapbil-c'op yu'un Dios, te banti ya yich' halbeyel sbihil te Jehová te scuentahinej spisil, te hucul ta yohlil te querubinetique.

³La scajanic ta sba yach'il carreta te scaxahul te chapbil-c'op yu'un Jehová, la yich'ic hahchel ta sna Abinadab te ay ta tsehl. Te Uza soc Ahío, snich'nab Abinadab, yacalic ta stojobtesel bahel te yach'il carreta.

⁴Te c'alal yaquic ta yich'el bahel a te scaxahul te chapbil-c'op yu'un Dios ta sna Abinadab te ay ta tsehl, te Ahío nahil baht ta stojol.

⁵Te David soc spisil te pueblo Israel yacalic ta pas-q'uin soc spisil yipic ta stojol Jehová soc spisil ta chahp bintic ya yich' tijel te pasticlambil ta te', soc arpahetic, salteriohetic, panderohetic, castañuela soc platillo-taq'uinetic.

⁶C'alal c'ohtic ta swuyojibal trigo yu'un Nacón, te Uza la shach sc'ab ta stojol te scaxahul te chapbil-c'op yu'un Dios yu'un ya c'an stsac ta scaj te la sc'ohchin yoc te j'a'tel-wacaxetic.

⁷Pero tihl yilimba Jehová ta stojol te Uza. Ehchentesot yu'un Dios scaj te ma ba la yich' ta muc'; tey cham a ta sts'ehl te scaxahul te chapbil-c'op yu'un Dios.

⁸Te David bayel la smel yo'tan yu'un te ehchentesot yu'un Jehová te Uza. Ha yu'un Pérez-uza[4] c'oht sbihil te lugar c'alal ora.

⁹Te David bayel la xi' te Jehová ta hich ora, hich la yal: ¿Bin ut'il ya xhu' ya xtal ta jtojol te scaxahul te chapbil-c'op yu'un Jehová? xchi.

¹⁰Hich te David ma ba la sc'an la yich' tal ta Pueblo yu'un David te scaxahul te chapbil-c'op yu'un Jehová, ha yu'un la yac' ta ich'el bahel ta sna Obed-edom te geteo-winic.

¹¹Te scaxahul te chapbil-c'op yu'un Jehová halaj oxeb u ta sna Obed-edom te geteo-winic. Te Jehová la ya'be bendición te Obed-edom soc spisil te mach'atic ay yu'un.

¹²Hich halbot ya'iy te ajwalil David: Te Jehová la ya'be bendición te mach'atic ay yu'un te Obed-edom soc spisil bintic ay yu'un ta scuenta te scaxahul te chapbil-c'op yu'un Dios, xchi. Ha yu'un te David, soc yutsil yo'tan la yich' hahchel ta sna Obed-edom, la yich' tal ta Pueblo yu'un David.

¹³Te c'alal behenic wacjim ta ocal te mach'atic sq'uechojic te scaxahul te chapbil-c'op yu'un Dios, te David la smil jcoht toro soc jcoht juhp'en tuminchij scuenta smahtan Dios.

¹⁴Te David slapoj efod pasbil ta lino-pac', soc yac wihlawetel ta spisil yip ta stojol Jehová.

¹⁵Hich ta scuenta aw yu'un yutsil yo'tanic soc yoq'uesinel xulubil, te David soc spisil te pueblo Israel la yich'ic tal te scaxahul te chapbil-c'op yu'un Jehová.

¹⁶Te c'alal c'oht te scaxahul te chapbil-c'op yu'un Jehová ta Pueblo yu'un David, te Mical yantsil-nich'an Saúl la yil ta ventana. C'alal la yil te ajwalil David te yac ta wihlel soc yac wihlawetel ta stojol Jehová, la sp'aj ta yo'tan.

¹⁷La yotsesic te scaxahul te chapbil-c'op yu'un Jehová ta yawil ta nahilpac' te chahpambil yu'un David. Te David la yac' scohtol chic'bil mahtaniletic soc milbil mahtaniletic scuenta lamal q'uinal ta stojol Jehová.

¹⁸Te c'alal laj yo'tan ta yaq'uel te mahtaniletic la ya'be bendición te pueblo ta scuenta sbihil Jehová te scuentahinej spisil.

¹⁹Ta patil la spucticlambe jpehch pan, jtebuc ti'bal soc jpehch pasas ta stojol spisil ants-winiquetic yu'un Israel. Patil suht ta snahic spisil te pueblo.

²⁰Te c'alal suht ta sna te David yu'un ya ya'be bendición te mach'atic ay yu'un, te Mical loc' tal ta stahel David, hich la yalbe: ¡Buen lec c'oht te ajwalil yu'un Israel te naxe! La schol sc'u' ta stojol te criadahetic yu'un te winiquetic yu'un, hich te bin ut'il ya spas te mach'a ch'ayem sq'uexlal, xchi.

²¹Ha yu'un te David la yalbe te Mical: Ha la jpas ta stojol Jehová te ha la stsahon te ho'one, ma ha'uc te atat soc spisil sts'umbal, yu'un ya x'ochon ta príncipal ta stojol te pueblo yu'un Jehová, ha te Israel. Ha yu'un ya jpas q'uin ta stojol Jehová.

²²C'ax hich ya jpehc'an jba a te bin ut'il ayon ta ora ini; peq'uel yac awilon, pero te criadahetic yac awale, ya me yich'onic ta muc' stuquelic, xchi.

²³Te Mical yantsil-nich'an Saúl, ma ba alaj c'alal cham.