Read Tzeltal 2 Samuel 7 Bible Online

2 Samuel 7 - Tzeltal bible

2 Samuel 7

¹Te c'alal ayix ta sna a te ajwalil, soc a'bot scux yo'tan yu'un Jehová yu'un spisil te scontratac ta sjoyobal,

²te ajwalil hich la yalbe te jalwanej Natán: Ilawil, ho'on nahinemon ta na te pasbil ta cedro, yan te scaxahul te chapbil-c'op yu'un Dios ay ta nahilpac', xchi.

³Te Natán la yalbe te ajwalil: Bahan, pasa spisil te bintic anopoj ta awo'tan, como sjoquinejat te Jehová, xchi.

⁴Ha nix ta yorahil ta ahc'abal a te Jehová la sc'opon te Natán, hich la yalbe:

⁵Bahan halbeya te ca'bat David: Hich la yal te Jehová: ¿Yu'un bal ha'at yac apasbon jna te banti ya xnahinon?

⁶Mayuc bin ora nahinon ta na c'alal la jloq'ues tal ta Egipto te snich'nab Israel c'alal ora, bayuc nax nahinon ta nahilpac' te tuhun yu'un ch'ul awilal.

⁷Ta bayuc te behenon soc te snich'nab Israel ¿ay bal hich la jcalbe jchahpuc yu'un Israel, te la jpas ta mandar te ya scuentahin te pueblo Israel cu'un: ¿Bin yu'un ma ba la apasbonic na ta cedro? te xchihone?

⁸Ha yu'un hich xawalbe te ca'bat David: Hich yaloj te Jehová te scuentahinej spisil: Ho'on la jquic'at loq'uel tal ta scanantayel tuminchijetic ta aquiltic, yu'un ya x'ochat ta príncipal yu'un te jpueblo Israel.

⁹Joquinejat ta bayuc behenat, la jlajimbat ta atojol spisil te acontratac, soc la jtoybe sc'oblal abihil, hich te bin ut'il sbihilic te mach'atic muc' sc'oblalic ta bahlumilal.

¹⁰Soc ya ca'be jun lugar te Israel te pueblo cu'un soc ya cac' te jc'axel ya xnahinic tey a, mayuc bin ora ya x'uts'inotic yu'un te mach'atic chopol ya'telic, hich te bin ut'il ta shahchibal

¹¹te c'alal la jcotses juecetic ta stojol te jpueblo Israel. Soc te ha'ate ya ca'bat acux awo'tan yu'un spisil acontratac. Soc te Jehová ya ya'bat ana' te ha ya spasbat ana stuquel.[5]

¹²Te c'alal ya xc'oht aworahil te ya xchamat,[6] ho'on ya jachbat jtuhl ta ats'umbal ta patil, ha te ya xloc' tal ta mero ats'umbal, ya ca'be yich' yip te ya'tel ta ajwalil.

¹³Ha ya spasbon na yu'un te jbihile, soc ho'on ya ca'be yich' yip sbahtel q'uinal te shuctajib te ban c'alal scuentahinej.

¹⁴Ho'on staton ya xc'ohon soc ha jnich'an ya xc'oht. Teme ay bin chopol ya spas, ya ca'be castigo ta xul yu'un winiquetic soc ta majel yu'un winiquetic.

¹⁵Pero ma ba ya jloq'ues te sc'uxul co'tan ta stojol hich te bin ut'il la jloq'ues ta stojol Saúl, te ha la jloq'ues ta atojol.

¹⁶Te ats'umbal soc te awa'tel ta ajwalil sbahtel q'uinal ya xhil ta atojol;[7] stalel ya xhil te ahuctajib, xchi.

¹⁷Te Natán la yalbe ya'iy spisil te David, hich te bin ut'il la yil soc te la ya'iye.

¹⁸Ha yu'un te ajwalil David och bahel ta stojol Jehová, hich la yal: Cajwal Jehová, ¿mach'ahon a, soc mach'a a te mach'atic ay cu'un, te li' c'alali la awic'on tal?

¹⁹Soc mayuc bayel sc'oblal c'ohem awu'un ini, Cajwal Jehová, la to awalbe sc'oblal te bin ya xc'oht ta pasel ta patil ta stojol te sts'umbal te a'bat awu'une. ¿Hich bal ay ta pasel awu'un ta stojol ants-winic, Cajwal?

²⁰¿Bin xan c'an yalbat David ta atojol? Ha'at ana'beyej sba te a'bat awu'un, Cajwal Jehová.

²¹Spisil te bintic bayel yutsil ini apasojix ta scuenta ac'op soc te hich la sc'an awo'tan, soc la awa'be sna' te a'bat awu'une.

²²¡Ha yu'un c'ax muc' Diosat, Jehová! Mayuc yan mach'a hich ay te bin ut'il te ha'ate, mayuc yan Dios ay, hich te bin ut'il la jca'iycotic ta jchiquincotic.

²³¿Soc mach'a pajal soc te pueblo Israel awu'un, te jun nación te muc' sc'oblal ta bahlumilal? Como te Dios c'oht sloq'ues ta mosohil scuenta pueblo yu'un ya xc'oht, te hich ya stohytesbe sbihil a, yu'un ya spas muc'ul a'teliletic ta scuentahic soc ya spas bintic xiweltic sba ta aq'uinal, ta scuenta sc'uxul awo'tan ta stojol te pueblo awu'un te la aloq'ues ta Egipto ta stojol yantic nacionetic soc te diosetic yu'unique.

²⁴Como la awac' te ha pueblo ya xc'oht awu'un te Israel scuenta sbahtel q'uinal; soc ha'at, Jehová, Diosat c'ohat yu'unic.

²⁵Ha yu'un, Jehová Dios, stalel ac'a hiluc sbahtel q'uinal te bin la awalbeyix sc'oblal te a'bat awu'un soc te sts'umbale, ac'a c'ohtuc ta pasel te bin awaloj.

²⁶Ac'a ich'otuc ta muc' ta sbahtel q'uinal te abihil, te hich ya yich' halel: Te Jehová te scuentahinej spisil, ha te Dios yu'un Israel, te xchihe. Soc te sts'umbal te awa'bat David ac'a yich'ic yip ta atojol.

²⁷Como ha'at, Jehová te acuentahinej spisil, te ha Diosat yu'un Israel, hich la awa'be sna' te a'bat awu'un: Ho'on ya jpasbat ana, te xchihate. Ha scuentahil te la sta yip yo'tan te a'bat awu'un ta sc'anel ta atojol te bin ay ta c'anel ini.

²⁸Ta ora ini, Jehová Dios, ha'at Diosat, mero smelelil te ac'op, soc la awalbeyix te a'bat awu'un te yac awa'be te bin lec ini.

²⁹Yo'tic, awocoluc, a'beya bendición te mach'atic ay yu'un te a'bat awu'un, scuenta yu'un stalel me ya xhilic ta atojol, como ha'at, Jehová Dios, hich awalojix, soc ta scuenta te bendición awu'un ya me yich' bendición te sna te a'bat awu'un sbahtel q'uinal, xchi.