Read Tzeltal 1 Reyes 10 Bible Online

1 Reyes 10 - Tzeltal bible

1 Reyes 10

¹Te ajwalil ants yu'un Sabá, c'alal la ya'iybe yutsil sc'oblal ta halel te Salomón ta scuenta yich'el ta muc' te Jehová, tal stsaj ta sjoc'obeyel chuhcul c'opetic.

²Tal ta Jerusalén, bayelic la sjoquinic tal, soc camellohetic te scuchticlanej bintic sumet yic', bayel oro soc t'ujbil tonetic. C'alal c'oht ta stojol te Salomón, la sjoc'obe spisil te bintic ay ta yo'tan.

³Te Salomón la sutbe spisil te bintic joc'obot yu'un; mayuc bin ma ba hu' yu'un sutbeyel.

⁴Te ajwalil ants yu'un Sabá, c'alal la yilbe te sp'ijil yo'tan Salomón, te na te spasoj,

⁵soc te we'elil ay ta mesa yu'un, te snahic te a'batetic yu'un, bin yilel ayic te j'a'teliletic yu'un soc te sc'u' spaq'uic, te jc'asesej-copahetic, soc te scohtol chic'bil mahtaniletic te ya yac' ta sna Jehová, mero xcham yo'tan yu'un.

⁶Hich la yalbe te ajwalil: ¡Ha melel te bin la jca'iy ta jq'uinal sc'oblal awa'tel soc ap'ijil!

⁷Pero ma ba la jch'uhun ha to c'alal talon soc te la yilix te jsite. Ma ba stahoj j'ohlil te bin ca'iyej; te ap'ijil soc te ac'ulejal c'ax hich a te bin ut'il ca'iyej.

⁸¡Bayel me yutsil te winiquetic[35] awu'un! Bayel me yutsil te a'batetic awu'un te spisil ora ayic ta atojol ta ya'iybelic te ap'ijile.

⁹Bayel yutsilal te Jehová, te Dios awu'un, te lec yo'tan awu'un soc te la yac'at ta huctajibal yu'un Israel. Te Jehová, stalel c'ux ta yo'tan te Israel, soc la yotsesat ta ajwalil scuenta yu'un yac apas te bin stojil ta pasel soc ta chahpanwanej, xchi.

¹⁰Hich la ya'be te ajwalil oxwinic (120) talento[36] oro, bayel bin sumet yic' soc t'ujbil tonetic. Mayuc yan hich yipal te bintic sumet yic' te bin ut'il a'bot te ajwalil Salomón yu'un te ajwalil-ants yu'un Sabá.

¹¹Te barcohetic yu'un Hiram te la yich' tal oro ta Ofir, ha nix la yich' tal bayel sándalo-te' soc t'ujbil tonetic.

¹²Te ajwalil la spas ta sándalo-te' te yich'o-ip sc'ab ta sna Jehová soc te sna ajwalil, soc la spas arpahetic soc salteriohetic a yu'un te jc'ayojetique. Mayuc bin ora hich yipal tal a te sándalo-te', soc mayuc hich chicnajem ta ilel c'alal ora.

¹³Te ajwalil Salomón la ya'be bahel te jayeb bintic c'ambot yu'un te ajwalil-ants yu'un Sabá, soc te jayeb bintic la yac' ta sc'anel yo'tan te Salomón. Hich te ajwalil-ants suht bahel ta slumal soc te a'batetic yu'une.

¹⁴Te yalal te oro la yich' ta scuenta jujun ha'bil te Salomón, ha waqueb schanlajunwinic scha'bahc' (666) talento[37] oro.

¹⁵Ma ba ich'bil ta cuenta stuquel te pataniletic yu'un te jchombajeletic, jmambajeletic soc spisil te ajwaliletic yu'un Arabia, soc te jcuentahinwanejetic yu'un te q'uinale.

¹⁶Te ajwalil Salomón la spas lajunwinic (200) muc'ul mahquilaletic yu'un guerra ta tembil oro, te lajunwinic scha'bahc' (600) siclo[38] oro yich'oj te jujune.

¹⁷Soc la spas ho'lajunwinic (300) mahquilaletic yu'un guerra ta tembil oro te oxeb libra[39] oro yich'oj te jujune. Te ajwalil la yac'ticlan ta na Toyemte'etic yu'un Líbano sbihil.

¹⁸Soc la spas jun muc'ul huctajibal ta marfil[40] soc la spots ta lequil oro.

¹⁹Ay wac-caj smohibal te huctajibal. Te smahquil spat, xjoyet pasbil, soc jehch ta jehch ay scajtajib c'abal; soc tey cotajtic chojetic ta jujujehch.

²⁰Ay lahchaycoht (12) chojetic te cotajtic ta cajalcaj mohel, jujucoht ta jujujehch. Mayuc yan huctajibal te hich yich'oj pasel ta yantic nacionetic.

²¹Ta spisil te vasohetic yu'un te ajwalil Salomón pasticlambil ta oro, ha nix hich spisil te bintic tuhun ta na Toyemte'etic yu'un Líbano pasticlambilic ta lequil oro. Mayuc bin pasbil ta plata, como ta yorahil Salomón mayuc sc'oblal ta o'tanil.

²²Te ajwalil ay barcohetic yu'un Tarsis[41] ta mar, soc te barcohetic yu'un Hiram. Oxoxeb to ha'bil ya xtal te barcohetic, ya yich'ic tal oro, plata, marfil, maxetic soc pavo real.

²³Te ajwalil Salomón c'ax hich sc'ulejal soc sp'ijil a te bin ut'il te yantic ajwaliletic ta bahlumilal.

²⁴Spisil te ants-winiquetic ta bahlumilal yo'tanuc ya yilic te Salomón yu'un ya ya'iybeyic te sp'ijil te a'bot yu'un Dios.

²⁵Ta jujun ha'bil ya yich'beyic tal smahtan: ha te bintic pasbil ta plata soc ta oro, c'u'uletic, a'tejibaletic yu'un guerra, bintic sumet yic', cawuhetic soc mulahetic.

²⁶Te Salomón la stsob carretahetic soc jmoheletic ta cawu. Ay j'ohlil schanbahc' (1,400) carretahetic yu'un soc j'ohlil scha'pic (12,000) jmoheletic ta cawu. Spisil la yac'ticlan ta pueblohetic yu'un carretahetic, soc ta banti ay te ajwalil ta Jerusalén.

²⁷Te ajwalil la yac' p'ohluc ta Jerusalén plata hich te bin ut'il tonetic, soc cedrohetic hich te bin ut'il higuerahetic te ayic ta tsehltsehltic.

²⁸Te cawuhetic yu'un Salomón ic'ticlambil tal ta Egipto[42] soc ta Coa,[43] como te jchombajeletic yu'un te ajwalil la smanic tal ta Coa, ha chican jayeb stojol.

²⁹Te stojol te jun carreta te la yich'ic tal ta Egipto ha lajunwinic scha'bahc' (600) ta sehp plata, soc te jcoht cawu ha lajuneb swaxacwinic (150) ta sehp plata. Spisil te yantic ajwaliletic heteohetic soc siriahetic la scha'mambeyic.