Read Tzeltal 1 Reyes 11 Bible Online

1 Reyes 11 - Tzeltal bible

1 Reyes 11

¹Te ajwalil Salomón ma ha'uc nax c'ux ta yo'tan te yantsil-nich'an faraón, c'ux la ya'iy ta yo'tan bayel jyanlum antsetic te talemic ta Moab, Amón, Edom, Sidón, soc hetea-antsetic;

²ha te hich halbot sc'oblalic yu'un Jehová te snich'nab Israel: Ma me xawic' abahic soc, como ya me yaq'uic te ya xhahch ach'uhuntayic te diosetic yu'unic, te xchihe. Pero te Salomón ha c'ux la ya'iy ta yo'tan.

³Ay ho'lajunwinic scha'bahc' (700) ta tuhl te la yihnamin, te ha yantsil-nich'anic ajwaliletic, soc ho'lajunwinic (300) ta tuhl yantic antsetic yu'un. Te antsetic yu'un la showiytesbeyic yo'tan te Salomón.

⁴Te c'alal mamalix a te Salomón, te antsetic yu'un la showiytesbeyic yo'tan ta stojol yantic diosetic, ma spisiluc yo'tan la yac' sba ta stojol te Jehová te Dios yu'un, ma hichuc te bin ut'il yo'tan te David te state.

⁵Te Salomón la st'un te Astoret te antsil-dios yu'un te sidonetic, soc te Milcom te ihlaybil loc'omba yu'un te amonetique.

⁶Ha yu'un te Salomón chopol bin la spas ta stojol Jehová, ma ba jun yo'tan la st'un te Jehová, ma hichuc te bin ut'il te David te state.

⁷Ta wits te ay ta stojol sloq'uib c'ahc'al yu'un Jerusalén te Salomón la spasbe toyol awilal te Quemos te ihlaybil loc'omba yu'un Moab, soc te Moloc te ihlaybil loc'omba yu'un te snich'nab Amón.

⁸Hich nix la spasbe spisil te jyanlum-antsetic yu'un, te ha la schiq'uic pom soc la yaq'uic milbil mahtaniletic yu'un te diosetic yu'unique.

⁹Te Jehová ilin ta stojol Salomón yu'un te la sch'ay ta yo'tan te Jehová te Dios yu'un Israel, te cheb buelta la yac' sba ta ilel ta stojol,

¹⁰soc te hich halbot yu'un te manchuc ya st'un yantic diosetique. Pero ma ba la yac' ta yo'tan te bin pasot ta mandar yu'un Jehová.

¹¹Ha yu'un te Jehová hich la yalbe te Salomón: Te bin ut'il hich ay te awo'tan, te ma ba c'oht ta pasel awu'un te chapbil-c'op cu'un soc te mandariletic cu'un te la jcalbat ta mandar, ya jpojbat te awa'tel ta ajwalil, ya ca'be te a'bat awu'une.

¹²Pero ta scuenta sc'uxul ta co'tan te atat David, ma ba ya jpas te jayeb c'ahc'al cuxulat, ha ya jloq'uesbe ta sc'ab te anich'ane.

¹³Pero ma spisiluc ya jloq'uesbe ban c'alal smacoj ta ajwalil, ya ca'be jchahp nax, ta scaj sc'uxul ta co'tan te David te a'bat cu'un, soc ta scaj sc'uxul co'tan te Jerusalén te stsahbil cu'un, xchi sc'oblal.

¹⁴Ha yu'un te Jehová la yac' hahchuc scontra te Salomón, ha te Hadad te edom-winic, sts'umbal ajwalil ta Edom.

¹⁵Como te c'alal ay ta Edom a te David, te Joab te jtsobaw yu'un soldadohetic, c'alal baht smucticlan hilel te mach'atic lajemic, la smilticlan spisil te winiquetic ta Edom.

¹⁶Waqueb u halaj te Joab soc spisil Israel tey a, ha to c'alal laj spisil te winiquetic ta Edom.

¹⁷Pero te Hadad, te querem to a, baht ta ahnel ta Egipto soc cha'oxtuhl edom-winiquetic te ayic ta a'batinel yu'un te state.

¹⁸Patil loq'uic ta Madián, c'ohtic ta Parán ta banti la yiq'uic sjoquin winiquetic. C'ohtic ta Egipto, ta stojol faraón te ajwalil yu'un Egipto, te la ya'be sna, swe'el yuch'el soc sq'uinal.

¹⁹Te Hadad mero lec ta o'tanil yu'un te faraón. Te faraón la ya'be yihnamin te yihts'in te yihnam, ha te ajwalil-ants Tahpenes.

²⁰Te yihts'in Tahpenes ayin yal, Genubat sbihil. Te Tahpenes la scoltes tey ta sna faraón. Te Genubat la sjoquin te snich'nab faraón.

²¹Pero te Hadad, te c'alal la ya'iy tey ta Egipto te chamix te David soc te chamix te Joab te jtsobaw yu'un soldadohetic, hich la yalbe te faraón: Ac'awon bahel ta jlumal, xchi.

²²La sjac' te faraón: ¿Bin yu'un? ¿Bin ya spasat falta ta jtojol te yac ac'an ya xbahat ta alumal? xchi. Mayuc, pero awocoluc, ac'awon bahel, xchi te Hadad.

²³Ha nix hich Dios la ya'be scontrahin te Salomón te Rezón snich'an Eliada, te ahnem loq'uel ta stojol te yajwal, ha te Hadad-ezer te ajwalil yu'un Soba.

²⁴La stsob winiquetic, ha capitán c'oht yu'un jtsohb j'eleq'uetic te c'alal David la slajin te mach'atic ayic ta Soba. Patil bahtic ta Damasco, tey nahinic a soc tey la yotsesic ta ajwalil a te Rezón,

²⁵te la scontrahin te Israel te jayeb c'ahc'al cuxul te Salomón. Te Rezón soc Hadad la ya'beyic swocol te Salomón; como te Rezón la sp'aj te Israel soc och ta ajwalil ta Siria.

²⁶Ha nix hich te Jeroboam snich'an Nabat te efrain-winic te talem ta Sereda, ha ya'bat Salomón, te snan ha te me'ba' ants Zerua sbihil. Te Jeroboam la shach sc'ab ta scontrahinel te ajwalil.

²⁷Te bin scuentahil te la shach sc'ab ta scontrahinel te ajwalil, hich ay: Te Salomón la spas te Milo soc la smac te banti jamal te ts'ahc ta Pueblo yu'un David te state.

²⁸Te Jeroboam ay yip yo'tan soc ay bin ya xhu' spasbel. C'alal la yil te Salomón te bayel bin ya smulan spasel te quereme, la ya'be scuentahin spisil te tulan a'teliletic yu'un te sts'umbal José.

²⁹Ha yorahil a, te c'alal loc' bahel ta Jerusalén te Jeroboam la sta sba ta be soc te jalwanej Ahías te talem ta Silo, slapoj yach'il muc'ul c'u'ul; stuquelic ayic ta aquiltic.

³⁰Te Ahías la stsac te yach'il smuc'ul-c'u' slapoj, la sch'i', lahchayeb (12) loc' yu'un a.

³¹Hich la yalbe te Jeroboam: Ich'a te lajunjahts, como hich la yal te Jehová te Dios yu'un Israel: Ya jloq'uesbe ta sc'ab Salomón te ya'tel ta ajwalil, ha'at ya ca'bat lajunchahp;

³²jchahp nax ya yich' stuquel, ta scaj sc'uxul ta co'tan te ca'bat David soc scaj sc'uxul ta co'tan te Jerusalén, te pueblo te tsahbil cu'un ta yohlil spisil te jchahp yu'un Israel,

³³como la yihquitayonic soc la sch'uhuntayic Astoret te antsil-dios yu'un te sidonetic, te Quemos te dios yu'un Moab, soc Moloc te dios yu'un te snich'nab Amón. Ma ba behenic ta be cu'un ta spasel te bin lec ta jtojol, ma ba la sch'uhunic spasel te chahpambil mandariletic cu'un o te bin caloj ta mandar, ma hichuc te bin ut'il la spas te David te state.

³⁴Pero ma ba ya jloq'uesbe ta sc'ab te a'tel ta ajwalil, ya to xhil cu'un ta ajwalil te jayeb c'ahc'al cuxul, ta scaj sc'uxul ta co'tan te ca'bat David te tsahbil cu'un soc te la sch'uhun te mandariletic cu'un soc te bin caloj ta mandar.

³⁵Pero ya jloq'uesbe ta sc'ab te snich'an, ha'at ya ca'bat te lajunchahp.

³⁶Jchahp nax ya ca'be te snich'an, scuenta yu'un spisil ora ay tsumbil c'ahc' yu'un te ca'bat David ta jtojol ta Jerusalén, te pueblo te tsahbil cu'un te banti ya cac' te jbihile.

³⁷Ho'on ya quic'at, soc ya me acuentahin spisil te bintic ya sc'an awo'tan, soc ha'at ajwalilat ya xc'ohat ta Israel.

³⁸Teme yac awa'iy spisil te bin ya calbat ta mandar soc teme ya xbehenat ta be cu'un, teme yac apas te bin toj ta jtojol, te yac ach'uhun te mandariletic soc te bin caloj ta mandar, hich te bin ut'il la spas te ca'bat David, ho'on ya joquinat soc ya cac' te ya yich' yip te ats'umbal, hich te bin ut'il la jpasbe te sts'umbal David. Ya ca'bat te Israel,

³⁹soc ya ca'be swocol te sts'umbal David ta scaj ini, pero ma ba ta spisil ora, xchi te Jehová, xchi.

⁴⁰Ha scuentahil te Salomón c'an smil te Jeroboam, pero te Jeroboam baht ta ahnel ta Egipto ta stojol Sisac te ajwalil yu'un Egipto; tey halaj a ha to c'alal cham te Salomón.

⁴¹Te bintic xan sc'oblal Salomón, spisil te bintic la spas soc te sp'ijile, ts'ihbabil ta libro yu'un ya'tel Salomón.

⁴²Te Salomón ay ta ajwalil ta Jerusalén ta stojol spisil Israel cha'winic (40) ha'bil.

⁴³Cham te Salomón, la yich' muquel ta Pueblo yu'un David te state. Patil och ta sjelol ta ajwalil te Roboam te snich'ane.