Read Tzeltal 1 Reyes 12 Bible Online

1 Reyes 12 - Tzeltal bible

1 Reyes 12

¹Te Roboam baht ta Siquem, como spisil Israel baht tey a yu'un ya yotsesic ta ajwalil.

²Hich la ya'iy te Jeroboam snich'an Nabat, te ay to ta Egipto a te banti bahem ta ahnel ta stojol te ajwalil Salomón.

³Te israeletic la sticonic ta iq'uel; hich te Jeroboam soc spisil te pueblo Israel baht sc'oponic te Roboam, hich la yalbeyic:

⁴Te atat la ya'botcotic al ihcatsil, pero ha'at pehc'ana jtebuc te tulan mosohinel yu'un te atate, pehc'ana te al ihcatsil la ya'botcotic, hich ya cac' jbahcotic ta a'batinel awu'un, xchihic.

⁵Te Roboam hich la yalbe: Bahanic, ta yoxebal c'ahc'al ya me suhtex tal ta jtojol, xchi. Hich bahtic te pueblo.

⁶Ha yu'un te ajwalil Roboam la sjoc'obe te mamaletic te la sjoquinic ta a'tel te Salomón te c'alal cuxul to a, hich la yal: ¿Bin yac awalic te ha'exe, bin ya sc'an ya jsutbe a te pueblo ini? xchi.

⁷Hich la sjaq'uic: Teme yac awac' aba ta a'batinel yu'un te pueblo ini, soc teme lec yac asutbe te sc'opique, ya me yac' sbahic ta a'batinel awu'un spisil ora, xchihic.

⁸Pero te Roboam ma ba la yich'be ta cuenta te sc'opic te mamaletique, baht sjoc'obe te jcolel winiquetic te pajal scolelic soc, te ayic ta a'batinel yu'une.

⁹Hich la yalbe: ¿Bin yac awalbonic ha'ex, bin ya calbetic te pueblo ini te hich la yalbonic: Pehc'ana jtebuc te yalal te ihcatsil te la ya'botcotic te atat, te xchihique? xchi.

¹⁰Ha yu'un te jcolel winiquetic te pajal scolelic soc, hich la yalic: Hich yac awalbe te pueblo ini te hich la yalbat: La ya'botcotic al ihcatsil te atate, pero ya me apehc'ambotic yalal, te xchihique, hich yac awalbe: Te xutul yal jc'ab c'ax hich smuc'ul a te bin ut'il te sch'uyomba te jtate.

¹¹La ya'beyex al ihcatsil te jtate, ho'on ya jtohytesbeyex xan yalal. Te jtat la smajex ta nuhcul, ho'on ya jmajex ta tsec, xchihat me, xchihic.

¹²Ta yoxebal c'ahc'al tal te Jeroboam soc spisil te pueblo ta stojol te Roboam, hich te bin ut'il la yal te ajwalil: Suhtanic tal ta jtojol ta yoxebal c'ahc'al, te xchihe.

¹³Te ajwalil tulan la sutbe sc'op te pueblo, ma ba la yich' ta cuenta te bin halbot yu'un te mamaletique;

¹⁴ha la yal te bin halbot yu'un te jcolel winiquetic; hich la yalbe: Te jtat la ya'beyex al ihcatsil, ho'on ya jtohytesbeyex xan yalal. Te jtat la smajex ta xul, ho'on ya ca'beyex castigo ta tsec, xchi.

¹⁵Hich te ajwalil ma ba la yich' ta cuenta te pueblo, como hich la sc'an te Jehová te hich ya xc'oht ta pasel a te bin la yalbe te Jeroboam snich'an Nabat ta scuenta te Ahías te talem ta Silo.

¹⁶Te c'alal la yilic spisil te pueblo Israel te ma ba ich'otic ta cuenta yu'un te ajwalil, hich la yalbeyic: ¿Bin cocheltic a te David? Mayuc bin ay cu'untic ta scuenta te snich'an Isaí. ¡Bahanic ta anahic, Israel! ¡Cuentahina ana atuquel, David! xchihic. Hich bahtic ta snahic te Israel.

¹⁷Pero te Roboan la scuentahin xan te snich'nab Israel te nahinemic ta pueblo yu'un Judá.

¹⁸Te ajwalil Roboam la sticon bahel te Adoram te scuentahinej te tulan-a'tel, pero spisil Israel la sch'ojic ta ton, hich laj. Ha yu'un te ajwalil Roboam ora mo ta scarreta, baht ta ahnel ta Jerusalén.

¹⁹Hich te Israel la stoy sbahic ta stojol te sts'umbal David c'alal ora.

²⁰C'alal la ya'iyic spisil te Israel te suhtemix tal te Jeroboam, la sticonic ta iq'uel tal ta stojol te pueblo, la yotsesic ta ajwalil ta stojol spisil Israel. Mayuc mach'a la st'un te sts'umbal David, ha nax te jchahp yu'un Judá.

²¹C'alal tal ta Jerusalén te Roboam, la stsob spisil te sts'umbal Judá soc te jchahp yu'un Benjamín, j'ohlil yoxeb scha'winic ta pic (180,000) tsahbil soldadohetic scuenta yu'un ya ya'be guerra te Israel, yu'un ya suht xan tal ta stojol Roboam snich'an Salomón te cuentahinele.

²²Pero c'oponot yu'un Jehová te Semaías, te winic yu'un Dios, hich halbot:

²³Halbeya te Roboam snich'an Salomón, te ajwalil yu'un Judá, soc spisil te sna Judá soc Benjamín, soc te yantic ta pueblo:

²⁴Hich yaloj te Jehová: Ma me xawa'be guerra te awermanotac, te snich'nab Israel. Jujutuhl suhtanic bahel ta anahic, como ho'on jpasoj ini, xchi. C'alal la ya'iybeyic sc'op te Diose suhtic bahel hich te bin ut'il halbotic yu'un te Jehová.

²⁵Te Jeroboam la spas xan te Siquem ay ta witsiltic yu'un Efraín, nahin tey a. Patil loc' bahel tey a, la spas xan te Penuel.

²⁶Hich la yal ta yo'tan te Jeroboam: Yo'tic ya me xc'oht xan ta stojol te sts'umbal David te pasaw ta mandar

²⁷teme ya xmohic bahel ta Jerusalén ta ya'beyel milbil mahtaniletic ta sna Jehová te pueblo ini, como te yo'tan te pueblo ini ya me suht xan bahel ta stojol te yajwalic Roboam ajwalil yu'un Judá; ya me smilonic soc ya me suhtic xan ta stojol Roboam te ajwalil yu'un Judá, xchi.

²⁸Te c'alal la ya'iybe sc'op te j'ac'-o'taniletic, la spas cheb jcolel torohetic ta oro, soc hich la yalbe te pueblo: Tic'aniquix a te ya xmohex bahel ta Jerusalén. Li' ay te diosetic awu'unic, Israel, te la sloq'uesex tal ta sq'uinal Egipto, xchi.

²⁹Jun la yac' ta Bet-el, yan la yac' ta Dan.

³⁰Tey chicnaj mulil a, como te pueblo ya xbahtic ta sch'uhuntayel ta Bet-el soc c'alal ta Dan.

³¹Soc la spas nahetic ta ba tsehletic, soc la stsa loq'uel sacerdotehetic ta yohlil te pueblo te ma ha'uc snich'nab Leví.

³²Te Jeroboam la shach spasel q'uin ta ho'lajuneb (15) c'ahc'al ta swaxaquebal u, hich te bin ut'il te q'uin ya yich' pasel ta Judá, soc la yac' milbil mahtaniletic ta scajtajib ta chiq'uel mahtanil. Hich nix la spas ta Bet-el, la ya'be milbil mahtaniletic te jcolel torohetic te spasoje. Soc la ya'be ya'tel sacerdotehetic ta toyol awilaletic te pasbilic yu'une.

³³Ta yo'lajunebal (15) c'ahc'al ta swaxaquebal u la yac' milbil mahtaniletic ta scajtajib ta chiq'uel mahtanil te spasoj ta Bet-el, ha te bin uhil te stuquel la snop te ya yich' pasele. Hich la shach spasel q'uin yu'un te snich'nab Israel, soc mo ta scajtajib ta chiq'uel mahtanil ta schiq'uel pom.