Read Tzeltal 1 Reyes 13 Bible Online

1 Reyes 13 - Tzeltal bible

1 Reyes 13

¹Te c'alal yac ta schiq'uel pom ta scajtajib a te Jeroboam, c'oht ta Bet-el jtuhl winic yu'un Dios te talem ta Judá, ha ticombil yu'un te Jehová.

²Ta scuenta smandar Jehová tulan c'opoj ta scontrahinel te scajtajib ta chiq'uel pom, hich la yal: Scajtajib, scajtajib ta chiq'uel pom, hich ya yalbat te Jehová: Ta sts'umbal David ya x'ayin jtuhl querem Josías sbihil, ha me ya smilticlan ta aba te sacerdotehetic yu'un te toyol awilaletic te ya schiq'uic pom ta aba, soc ta aba ya yich' schiq'uel sbaquel winiquetic, xchi te Jehová, xchi.

³Ha nix ta yorahil a la spasbe seña, hich la yal: Ha ini te seña te halbil sc'oblal yu'un Jehová: Te scajtajib ta chiq'uel pom ya me xwuy, soc te tan ay ta sba ya me xbusq'uij cohel, xchi.

⁴Te c'alal la ya'iy te ajwalil Jeroboam te bin la yal te winic yu'un Dios ta scontrahinel te scajtajib ta chiq'uel pom ta Bet-el, tey ta scajtajib a la shach sc'ab, hich la yal: ¡Tsacahic! xchi. Pero te sc'ab te la shach ta stojol te winique, taquij, ma ba la sc'anix cuts'el yu'un.

⁵Wuy te scajtajib, busq'uij cohel te stanul, hich te bin ut'il te seña la yac' te winic yu'un Dios ta scuenta sc'op te Jehová.

⁶Ha yu'un te ajwalil la yalbe te winic yu'un Dios: Awocoluc, c'opombon te Jehová te Dios awu'un, scuenta yu'un ya xlecub a te jc'abe, xchi. Hich te winic yu'un Dios la sc'opon te Jehová, hich lecub te sc'ab te ajwalil, hich c'oht te bin ut'il ay ta nahil to.

⁷Te ajwalil la yalbe te winic yu'un Dios: La', conic ta jna, ya me xwe'at soc ya ca'bat amahtan, xchi.

⁸Pero te winic yu'un Dios hich la yalbe te ajwalil: Aunque yac awa'bon j'ohlil te bintic ay awu'un, ma ba ya joquinat bahel, ma ba ya xwe'on soc ma ba ya cuch' ha' ta lugar ini,

⁹como hich spasojon ta mandar te Jehová, hich la yalbon: Ma me xwe' x'uch'at, soc ma teyuc ya suhtat ta be te banti talate, xchi.

¹⁰Ha yu'un yan be ta banti suht bahel a, ma teyuc suhtix bahel a te banti tal ta Bet-el.

¹¹Ta hich ora ay jtuhl mamal jalwanej te nahinem ta Bet-el. Tal ta halbeyel yu'un snich'nab spisil bintic la spas ta Bet-el te winic yu'un Dios; soc la yalbeyic ya'iy te bin la yalbe te ajwalile.

¹²Hich joc'obotic yu'un te static: ¿Banti behil baht? xchi. Te snich'nab la ya'beyic yil te banti behil suht bahel te winic yu'un Dios te talem ta Judá.

¹³Hich la yalbe te snich'nab: Chahpambonic jburro, xchi. Hich la schahpambeyic burro, mo a,

¹⁴baht sle te winic yu'un Dios. Hucul ta ye'tal jihte' a c'oht sta, hich la sjoc'obe: ¿Ha'at bal te winicat yu'un Dios te talemat ta Judá? xchi. Ho'on, xchi.

¹⁵La', conic ta we'el ta jna, xchi.

¹⁶Pero hich la sjac': Ma xhu' ya suhton, ma xhu' ya joquinat, soc ma ba ya joquinat ta we'el uch'el ta lugar ini.

¹⁷Como hich halbilon yu'un Dios: Ma me xwe' x'uch'at, soc ma me teyuc nix ya suhtat a te banti talate, xchi.

¹⁸Pero la sjac' te yane: Ha nix hichon jalwanejon yu'un Dios, hich te bin ut'il ha'at. Ay ch'ul a'bat te hich la yalbon ta scuenta smandar Jehová: Ic'a bahel ta we'el uch'el ta ana, xchi ta lot.

¹⁹Ha yu'un suht bahel, c'oht ta we'el uch'el ta sna.

²⁰Pero te c'alal ayic ta we'el ta mesa a, tal sc'op Jehová ta stojol te jalwanej te la yic' suhtel te winic yu'un Dios.

²¹Hich la yawtay te winic yu'un Dios talem ta Judá: Hich la yal te Jehová: La ac'axuntaybe smandar te Jehová soc ma ba la acanantay te mandar te la ya'bat te Jehová, te Dios awu'une,

²²suhtat tal ta we'el ta uch'el te banti la yalbat mandar te Jehová te ma me xwe' x'uch'at, hich ma ba ya xmuhc abaq'uetal ta banti smuquenal ame'atat, xchi.

²³Te c'alal laj yo'tan ta we'el uch'el, te jalwanej te la yic' suhtel tal, la schahpambe sburro.

²⁴C'alal yac ta bahel a, la sta choj ta be, milot yu'un. Te sbaq'uetal pujul hilel ta be, te burro soc te choj tey ayic a ta sts'ehl te schamen-baq'uetal.

²⁵Te mach'atic c'axic tey a la yilic te schamen-baq'uetal te pujul ta be soc te choj te ay ta sts'ehl. Hich c'oht yalic ta pueblo banti nahinem te mamal jalwanej te bin la yilique.

²⁶C'alal hich la ya'iy te jalwanej te la yic' suhtel tal ta be, hich la yal: Ha te winic yu'un Dios te la sc'axuntaybe smandar te Jehová. Ha yu'un te Jehová la yac' ta stojol te choj te ha ehchentesot soc milot yu'un, hich te bin ut'il halbot yu'un te Jehová, xchi.

²⁷Hich la yalbe te snich'nab: Chahpambonic jburro, xchi. Hich la schahpambeyic burro,

²⁸hich baht. La sta te schamen-baq'uetal soc te burro soc te choj ayic ta sts'ehl. Te choj ma ba swe'beyej te schamen-baq'uetal soc mayuc bin spasbeyej te burro.

²⁹Ha yu'un te jalwanej la shachbe sbaq'uetal te winic yu'un Dios, la smohtes ta burro, la yich' suhtel tal ta pueblo yu'un ya yoq'uetay soc ya smuc.

³⁰La smucbe sbaq'uetal ta smuquenal soc la yoq'uetay, hich la yal: Ay, hermano, xchi.

³¹Te c'alal laj smucbelic a, hich la yalbe te snich'nab: Te c'alal ya xchamon, tey me yac amuconic a te banti muhc te winic yu'un Dios, tey me yac awa'bonic jbaquel a te banti ay te sbaquele.

³²Como ya me xc'oht ta pasel te bin la yal ta scuenta smandar te Jehová ta scontrahinel te scajtajib ta chiq'uel pom ta Bet-el soc ta scontrahinel spisil te nahetic ta toyol awilaletic te ayic ta pueblohetic ta Samaria, xchi.

³³Aunque hich c'oht ta pasel, te Jeroboam ma ba la yihquitay hilel te schopol a'tel, pero la stsa loq'uel xan ta yohlil te pueblo sacerdotehetic yu'un te toyol awilaletic. Te mach'atic la sc'anic, la ya'be ya'tel ta sacerdotehil yu'un te toyol awilaletic.

³⁴Ha mulil c'oht yu'un te sts'umbal Jeroboam, te ha ta scuenta te la yich' tup'el soc lajinel ta bahlumilal.