Read Tzeltal 1 Reyes 14 Bible Online

1 Reyes 14 - Tzeltal bible

1 Reyes 14

¹Ta hich ora te Abías snich'an Jeroboam tahot ta chamel.

²Te Jeroboam hich la yalbe te yihnam: Bahan, lapa yan c'u'ul te ma xna'ot aba yu'un, scuenta yu'un hich ma ba ya xna'ot a te ha'at yihnamat Jeroboam, bahan ta Silo; como tey ay a te jalwanej Ahías te la yalbon te ho'on ya x'ochon ta ajwalil yu'un te nación.

³Ich'a bahel lajunpehch pan, pimil pan soc jun jarra chab, bahan ta stojol scuenta yu'un ya yalbat te bin ya xc'oht ta stojol te alale, xchi.

⁴Hich la spas te yihnam Jeroboam, baht ta Silo. Te Ahías ma ba ya yilix q'uinal scaj te mamalix.

⁵Pero halbot yu'un Jehová te Ahías: Ya xtal te yihnam Jeroboam ta sjoc'oyel te bin ya xc'oht ta stojol te yal te ay ta chamel. Ya calbat te bin yac awalbe. Te c'alal ya xtal, scuyoj sba ta yan ants, xchi.

⁶Te c'alal la ya'iy te Ahías te yac ta ochel tal ta ti'nahil te antse, hich la yalbe: Ochan tal, yihnam Jeroboam. ¿Bin yu'un acuyoj aba ta yan ants? Ticombilon ta atojol ta yalbelat tulan c'op.

⁷Bahan, halbeya te Jeroboam: Hich yaloj te Jehová te Dios yu'un Israel: Ho'on la jtsahat loq'uel ta yohlil te pueblo, la jcotsesat ta ajwalil ta stojol te jpueblo Israel.

⁸La jloq'ues ta a'tel ta ajwalil te sts'umbal David, la jca'bat ha'at. Pero ma hichucat te bin ut'il te ca'bat David te la sch'uhumbon te mandariletic cu'un soc te spisil yo'tan la st'unon, ha nax la spas te bin toj ta jtojol.

⁹Yan te ha'ate, c'ax hich chopol la apas a te bin ut'il spisil te yantic nahil ay awu'un. La apasticlan yantic diosetic soc loc'ombahetic te pasbilic ta uhltesbil taq'uin, te la ahachbon quilimba a soc la awalac'patiyon.

¹⁰Ha yu'un ya cac' taluc wocol ta stojol te sts'umbal Jeroboam. Ya jlajimbe spisil te sts'umbal Jeroboam ta Israel, mosohetic soc te libre ayique. Ya jmes ta jc'axel te sts'umbal Jeroboam hich te bin ut'il ya yich' mesel loq'uel tsa', ha to c'alal ya xlajic.

¹¹Te mach'a ya xcham yu'un Jeroboam ta pueblo ya xti'otic ta ts'i'; te mach'a ya xcham ta aquiltic ya xti'ot ta mutetic te ya xwihlic ta toyol; como hich yaloj te Jehová, xchi.

¹²Te ha'at, hahchan, bahan ta ana. C'alal yac atec' ochel te pueblo ya me xcham te alale.

¹³Spisil Israel ya me yoq'uetayic soc ya me smuquic. Ta spisil mach'atic ayic yu'un Jeroboam, ha nax stuquel te ya yich' muquel, como ta spisil mach'atic ayic yu'un Jeroboam, ha nax stuquel ay bin lec tahbot ta stojol yu'un Jehová te Dios yu'un Israel.

¹⁴Te Jehová ya me yotses jtuhl ajwalil ta Israel te ya slajimbe te sts'umbal Jeroboam yo'tic. Ya me spas ta ora.

¹⁵Te Jehová ya syuq'uilan te Israel hich te bin ut'il ya xyuc'ot jalal ay ta ha'. Ya sbul loq'uel te Israel li' ta lequil q'uinal te a'bot te sme'static, ya spucticlan bahel ta jehch muc'ul-ha' Éufrates, yu'un te la spasbeyic loc'ombahetic yu'un Asera, te hich la yac' ilinuc te Jehová.

¹⁶Ya me yihquitay hilel Israel ta scaj smul te Jeroboam, te la sta smul soc te la ya'be sta smul te Israel, xchi.

¹⁷Hich te yihnam Jeroboam hahch ta behel, baht ta Tirsa. Te c'alal la stec' ochel te sti'il te sna, cham te alale.

¹⁸La smuquic, soc spisil Israel la yoq'uetayic, hich te bin ut'il la yal te Jehová ta scuenta te ya'bat, ha te jalwanej Ahías.

¹⁹Te bintic xan sc'oblal te Jeroboam, ha te guerra la yac' soc te bin ut'il a'tej scuenta ajwalil, spisil ts'ihbabil ta libro yu'un te ya'tel te ajwaliletic yu'un Israel.

²⁰Te Jeroboam ay ta ajwalil cheb scha'winic (22) ha'bil. Te c'alal cham,[44] ha la sjelolin ta ajwalil te Nadab te snich'ane.

²¹Te Roboam snich'an Salomón ay ta ajwalil ta Judá. Ay jun yoxwinic (41) ya'bilal a te c'alal och ta ajwalil, halaj huclajuneb (17) ha'bil ta ajwalil ta Jerusalén, ha te pueblo yu'un Jehová te la stsa ta yohlil spisil te chahp yu'un Israel te banti ya yac' te sbihile. Naama sbihil te snan, ha amon-ants.

²²Te Judá chopol bin la spas ta stojol Jehová. C'ax hich ilin yu'un a te Jehová te bin ut'il ilin yu'un smulic te sme'static.

²³Ha nix hich la spasbeyic toyol awilaletic, la stehc'anic hahchel tonetic soc sloc'omba Asera ta spisil tsehletic soc ta ye'tal spisil te'etic te bayel ya'binal.

²⁴Ha nix hich ay sodoma-winiquetic[45] ta q'uinal. La spasic spisil ta chahp muliletic te ilobtic sba te la spasic te nacionetic te tenotic loq'uel yu'un Jehová ta stojol Israel.

²⁵Ta yo'ebal ha'bil yochel ta ajwalil a te Roboam, te Sisac ajwalil ta Egipto baht ya'be guerra te Jerusalén.

²⁶Ha la spoj te c'ulejaliletic ta sna Jehová soc ta sna ajwalil, spisil la spoj bahel. Soc la yich'ticlan bahel spisil te mahquilaletic yu'un guerra te pasbilic ta oro yu'un Salomón.

²⁷Te ajwalil Roboam la spasbe scuenta sjelol mahquilaletic ta bronce, la ya'be te capitanetic yu'un te jcanantaywanej soldadohetic te ya scanantayic te yochibal te sna ajwalil.

²⁸C'alal ya x'och ta sna Jehová te ajwalil, te jcanantaywanej soldadohetic ya yich'ic bahel te mahquilaletic, patil ya yaq'uic xan ta sna te jcanantaywanej soldadohetique.

²⁹Te bintic xan sc'oblal te Roboam soc spisil te bintic la spas, ts'ihbabil hilel ta libro yu'un te ya'tel ajwaliletic ta Judá.

³⁰Te Jeroboam soc te Roboam spisil ora la ya'be sbahic guerra.

³¹Cham te Roboam, baht sjoquin ta muquenal te chawinic sme'stat, la yich' muquel soc ta Pueblo yu'un David. Naama sbihil te snane, ha amon-ants. Patil och ta sjelol ta ajwalil te Abiam te snich'ane.