Read Tzeltal 1 Reyes 16 Bible Online

1 Reyes 16 - Tzeltal bible

1 Reyes 16

¹Tal te sc'op Jehová ta stojol Jehú snich'an Hanani ta scontrahinel te Baasa, hich la yal:

²Ho'on la jtamat hahchel ta ts'ubil lum, la jcotsesat ta jcuentahinwanej yu'un te jpueblo Israel. Pero ha nix la apas te bin la spas te Jeroboam, la awa'be sta smul te Israel te pueblo cu'un, te hich la ahachbon quilimba yu'un te amulique.

³Ha yu'un jc'axel me ya jlajin te Baasa soc spisil mach'atic ay yu'un, ya cac' te hich ya xc'oht te sts'umbal te bin ut'il te sts'umbal Jeroboam snich'an Nabat.

⁴Te mach'a yu'un Baasa te ya xcham ta yutil te pueblo ya xti'ot ta ts'i'etic; soc te mach'a ya xcham ta aquiltic ya xti'ot ta mutetic ya xwihlic ta toyol, xchi.

⁵Te bintic xan sc'oblal te Baasa soc te bintic la spas soc te bintic hu' yu'un spasel, ts'ihbabil ta libro yu'un te ya'tel ajwaliletic yu'un Israel.

⁶Cham te Baasa, baht sjoquin ta muquenal te chawinic sme'stat, la yich' muquel ta Tirsa. Ha och ta sjelol ta ajwalil te Ela te snich'ane.

⁷Ta scuenta te jalwanej Jehú snich'an Hanani te sc'op Jehová la scontrahin te Baasa soc te mach'atic ay yu'un ta scaj spisil te bintic chopol la spas ta stojol Jehová, te la yac' ilinuc yu'un te bintic la spasticlan, te hich pajal c'oht soc te sna Jeroboam, soc te la slajin ta jc'axel te mach'atic ayic yu'un.

⁸Ta waqueb scha'winic (26) ha'bil yochel ta ajwalil yu'un Judá a te Asa, te Ela snich'an Baasa och ta ajwalil yu'un Israel ta Tirsa; cheb ha'bil ay ta ajwalil.

⁹Pero te Zimri, jtuhl ya'bat te ha jcuentahinwanej yu'un j'ohlil te carretahetic yu'un guerra, la schapbe sc'oblal ta milel. Te c'alal ay ta Tirsa soc yac ta yacubel ta sna Arsa a te mayordomo yu'un ta Tirsa,

¹⁰tal te Zimri, la yehchentes soc la smil, ha och ta sjelol ta ajwalil. Ha te huqueb scha'winic (27) ha'bil yochel ta ajwalil yu'un Judá a te Asa.

¹¹Te c'alal ochel to ta ajwalil soc te huhcajel to ta huctajibal, la smilticlambe spisil te mach'atic ay yu'un te Baasa, mayuc jtuhluc winic te cuxul hilel, o smohlol sts'ahquil o yamigotac.

¹²Hich te Zimri jc'axel la slajimbe spisil te mach'atic ay yu'un Baasa, hich te bin ut'il halbot sc'oblal yu'un Jehová ta scuenta te jalwanej Jehú ta scontrahinel Baasa,

¹³ta scaj spisil te muliletic yu'un Baasa soc Ela te snich'an te la spasic soc te la ya'beyic sta smul a te Israel, te la yac' ilinuc te Jehová te Dios yu'un Israel ta scaj te loc'ombahetic yu'unique.

¹⁴Te bintic xan sc'oblal te Ela soc spisil bintic la spasticlan, ts'ihbabil ta libro yu'un te ya'tel ajwaliletic yu'un Israel.

¹⁵Ta huqueb scha'winic (27) ha'bil yochel ta ajwalil yu'un Judá a te Asa, och ta ajwalil te Zimri; huqueb nax c'ahc'al te ay ta ajwalil ta Tirsa. Te soldadohetic ayic ta campamento a ta scontrahinel Gibetón, jun pueblo yu'un te filisteohetique.

¹⁶Te soldadohetic te ayic ta campamento hich la ya'iyic: Te Zimri la schapbe sc'oblal ta milel soc la smilix te ajwalil, te xchihe. Ha yu'un spisil Israel ta sc'ahc'alel nix la yotsesic ta ajwalil te Omri te jtsobaw yu'un soldadohetic tey nix ta campamento yu'un guerra.

¹⁷Te Omri soc spisil Israel loq'uic bahel ta Gibetón, la sjoytayic ta guerra te Tirsa.

¹⁸C'alal la yil te Zimri te tsalbilix te pueblo, och bahel ta sna ajwalil, la ya'be sc'ahc'al te snahe. Tey laj a

¹⁹ta scaj te smul stahoj, ha te la spas te bintic chopol ta stojol Jehová, la st'umbe te be yu'un Jeroboam soc te smul stahoj te la ya'be sta smul a te Israel.

²⁰Te bintic xan sc'oblal te Zimri soc te bin la schapbe sc'oblal ta milel yan, ts'ihbabil ta libro yu'un te ya'tel ajwaliletic yu'un Israel.

²¹Ha yu'un te pueblo Israel cha'chahp la yac' sbahic. Jchahp la yac' sba ta scuenta Tibni snich'an Ginat yu'un ya yotsesic ta ajwalil; te jchahp xan la yac' sbahic ta scuenta Omri.

²²Pero ha hu' yu'unic te mach'atic la st'unic te Omri, ha ma ba hu' yu'unic te mach'atic la st'unic te Tibni snich'an Ginat. Laj te Tibni, ha och ta ajwalil te Omri.

²³Ta bulucheb scha'winic (31) ha'bil yochel ta ajwalil yu'un Judá a te Asa, och ta ajwalil ta stojol Israel te Omri, lahchayeb (12) ha'bil halaj ta ajwalil; waqueb ha'bil ay ta ajwalil ta Tirsa.

²⁴Ha la smambe te Semer te wits yu'un Samaria, cheb talento[48] plata la stoj. Tey la spas pueblo a, la ya'be sbihil Samaria te ha sbihil te Semer te yajwal te witse.

²⁵Te Omri chopol bin la spas ta stojol Jehová, c'ax hich chopol la spas a te bin ut'il spisil te yantic ajwaliletic nahil c'axique.

²⁶La st'umbe spisil ya'tel te Jeroboam snich'an Nabat soc te bin mulil te la ya'be sta smul a te snich'nab Israel, te la yac' ilinuc te Jehová te Dios yu'un Israel.

²⁷Te bintic xan sc'oblal te Omri, spisil te bintic la spas soc te bintic muc' hu' yu'un spasel, ts'ihbabil ta libro yu'un te ya'tel ajwaliletic yu'un Israel.

²⁸Cham te Omri, baht sjoquin ta muquenal te chawinic sme'stat, la yich' muquel ta Samaria. Ha och ta sjelol ta ajwalil te Acab te snich'ane.

²⁹Ta waxaclajuneb scha'winic (38) ha'bil yochel ta ajwalil yu'un Judá a te Asa, och ta ajwalil yu'un Israel te Acab snich'an Omri; cheb scha'winic (22) ha'bil ay ta ajwalil ta stojol Israel ta Samaria.

³⁰Te Acab snich'an Omri chopol bin la spas ta stojol Jehová, c'ax hich a te bin ut'il spisil te yantic ajwaliletic te nahil c'axique.

³¹Ma tic'uc la ya'iy a te la st'un te muliletic yu'un te Jeroboam snich'an Nabat, ha nuhpun soc Jezabel yantsil-nich'an Et-baal ajwalil ta Sidón. Hich baht yac' sba ta a'batinel ta stojol Baal soc la sch'uhuntay.

³²La spasbe scajtajib ta chiq'uel mahtanil te Baal ta templo te la spasbe ta Samaria.

³³Soc la spasbe sloc'omba Asera. Ha yu'un c'ax hich la yac' ilinuc te Jehová te Dios yu'un Israel te bin ut'il spisil te yantic ajwaliletic te nahil c'axic yu'une.

³⁴Ta yorahil Acab, te Hiel te talem ta Bet-el la scha'pas xan te Jericó. Ta scuenta stojol scuxlejal te Abiram te sba-nich'an la ya'be yich'o-ip; soc ta scuenta stojol scuxlejal Segub te slajibal squerem-nich'an la yotsesbe te puertahetic, hich te bin ut'il yaloj te Jehová ta scuenta Josué snich'an Nun.