Read Tzeltal 1 Reyes 17 Bible Online

1 Reyes 17 - Tzeltal bible

1 Reyes 17

¹Te Elías te talem ta Tisbe, te nahinem ta Galaad, hich la yalbe te Acab: ¡Yiloj Jehová, te Dios yu'un Israel, te yacon ta a'batinel yu'un, ma ba ya xtal ha'al o ts'ujul ta ha'biletic bahel, ha to teme ho'on ya cal! la yut.

²C'oponot yu'un Jehová te Elías, hich halbot:

³Loc'an bahel li'i, bahan ta stojol banti ya xloc' tal c'ahc'al, nac'a aba ta uc'um Querit te ay ta stojol banti ya xloc' tal c'ahc'al yu'un te muc'ul-ha' Jordán.

⁴Tey yac awuch' ha' ta uc'um a, soc la jpasix ta mandar te jojetic te tey ya yich'bat bahel awe'el a, xchi.

⁵Hich la spas te bin halbot yu'un Jehová, tey baht ta nahinel a ta uc'um Querit ta stojol banti ya xloc' tal c'ahc'al yu'un te Jordán.

⁶Te jojetic la yich'be tal pan soc ti'bal ta jujun sab soc ta jujun tibiltic; tey la yuch' ha' ta uc'um.

⁷Pero c'alal c'ax bahel c'ahc'al, tup' te ya'lel te uc'um, como ma ba la yac' ha'al ta q'uinal.

⁸C'oponot yu'un Jehová, hich halbot:

⁹Hahchan, bahan ta Sarepta te ay ta sq'uinal Sidón, tey ya xnahinat a. La jpasix ta mandar jtuhl me'ba' ants te ya ya'bat awe'el, xchi sc'oblal.

¹⁰Ha yu'un hahch bahel, baht ta Sarepta. C'alal c'oht ta yochibal te pueblo, ay jtuhl me'ba' ants yac ta stsobel si'. Te Elías la yic' tal, hich la yalbe: Awocoluc, ich'bon tal jtebuc ha' ta vaso yu'un ya cuch', xchi.

¹¹Yaquix ta bahel ta yich'el tal a te ha'e, te Elías la yic' xan tal, hich la yalbe: Awocoluc, ich'bon tal soc jpehchuc pan, xchi.

¹²La sjac' te ants: ¡Yiloj Jehová, te Dios awu'un, mayuc pan ta'ajem cu'un! Ha xanix johp harina ay cu'un ta oxom soc jteb xan aceite ta jarra. Yacon ta tsobel jtebuc si', ya xbaht jpas pan yu'un ya jwe' soc te cal, patil ya xchamotcotic, xchi.

¹³Hich halbot yu'un te Elías: Ma xiwat. Bahan, chahpana te bin la awalixe. Pero ha nahil pasbon jpehchuc tut pimil pan a te harina ay awu'un, ich'bon tal, patil yac apas te awu'un soc yu'un te awale.

¹⁴Como hich yaloj te Jehová te Dios yu'un Israel: Ma ba ya xlaj te harina ay ta oxom soc ma ba ya xlaj te aceite ay ta jarra, ha to c'alal te Jehová ya yac' xan tal ha'al ta bahlumilal, xchi.

¹⁵Hich te me'ba' ants baht spas te bin halbot yu'un te Elías. Hich bayel c'ahc'al we' te Elías, te ants soc te mach'a ay yu'un.

¹⁶Ma ba laj te harina ay ta oxom soc te aceite ay ta jarra, hich te bin ut'il halbot yu'un Jehová ta scuenta te Elías.

¹⁷Ta patil tsacot ta chamel te yal te ants te ha yajwal te nahe. Mero tulan te chamel, tup' yic' yu'un.

¹⁸Te ants hich la yalbe te Elías: ¿Bin awochelon a, winicat yu'un Dios? ¿Tal bal awa'bon jna' te muliletic cu'un soc te yac awac' chamuc te cale? xchi.

¹⁹A'bon tal te awale, xchi te Elías. Hich la spet hahchel ta sc'ab, la yic' mohel ta cuarto te banti nahinem, la yac' ta swayib.

²⁰Hich la yawtay te Jehová: Jehová, Dios cu'un ¿Ha ni bal hich yac awa'be swocol te me'ba' ants te hulemon ta sna, te la awac' chamuc te yale? xchi.

²¹La spahcan sba oxeb buelta ta sba te alal soc la yawtay te Jehová: Jehová, Dios cu'un, ya calbat wocol, ac'a cha'cuxajuc te alale, xchi.

²²Te Jehová la ya'iybe sc'op te Elías, la yac' cha'cuxajuc te alale.

²³Hich te Elías la spet, la yic' hahchel tey ta scuarto, la yic' cohel tal, la ya'be te snan, hich la yalbe: Ilawil, cuxulix te awale, xchi.

²⁴Te ants la yalbe te Elías: Yo'tic la jna'ix te ha'at winicat yu'un Dios, soc te bin yac awal, ha smelelil sc'op te Jehová, xchi.