Read Tzeltal 1 Reyes 18 Bible Online

1 Reyes 18 - Tzeltal bible

1 Reyes 18

¹C'axix bayel c'ahc'al a, c'oponot yu'un Jehová te Elías ta yoxebal ha'bil ma ba tal ha'al, hich la yalbe: Bahan ta stojol te Acab, yu'un ya cac' taluquix ha'al ta bahlumilal, xchi.

²Hich baht te Elías ta stojol te Acab. Mero tulan te wi'nal ta Samaria.

³Te Acab la yic' tal te Abdías, te cuentahimbil sna yu'un. Te Abdías yich'oj ta muc' te Jehová.

⁴Como te c'alal te Jezabel hahch smilticlan te jalwanejetic yu'un Jehová, te Abdías la yic' bahel ho'winic (100) ta tuhl jalwanejetic, lajlajuneb yoxwinic (50) ta tuhl la snac'ticlan ta ch'en, soc la yac'ticlambe pan soc ha'.

⁵Te Acab hich la yalbe te Abdías: Bahan ta spahmal te q'uinal ta spisil sloq'uib-ha'etic soc ta spisil uc'umetic ta yilel teme ya jtahtic ha'mal te hich ya xcuxajic a te cawuhetic soc te mulahetic, scuenta yu'un hich ma ba ya xlaj a te chambahlametic cu'untic, xchi.

⁶Cha'chahp loq'uic ta sbehentayel te q'uinale. Te Acab baht ta yan be, te Abdías yan be ta banti baht.

⁷Yac ta bahel ta be a te Abdías, la sta sba soc te Elías. C'alal la sna'be sba, la squejan sba ta stojol, hich la yal: ¿Ha'at bal Eliasat, cajwal? xchi.

⁸Ho'on, xchi te Elías. Bahan, halbeya te awajwal: Li' ay te Elías, xchihan me, xchi.

⁹Pero la yal te Abdías: ¿Bin mulil jtahoj te yac awac' ta sc'ab Acab te awa'bat yu'un ya smilon?

¹⁰¡Yiloj Jehová, te Dios awu'un! mayuc junuc nación o te ban c'alal scuentahinej ajwalil, te banti ma ba sticonejon te cajwal ta slehbelat. Teme hich la yalic: Ma ba li' ayi, teme xchihique, la yac' te ya yalic ta jamal te ma ba la stahat.

¹¹¿Yo'tic bal yac awal: Bahan, halbeya te awajwal: Li' ay te Elías, te xchihone?

¹²Te c'alal yacon ta bahel a, ma jna' banti ya yic'at bahel te espíritu yu'un Jehová. Te c'alal ya calbe ya'iy te Acab, teme ma ba ya stahat, hich ya smilon. Pero te a'bat awu'un yich'oj ta muc' te Jehová c'alal ta squeremil.

¹³¿Ma bal ayuc awa'iyej te bin la jpas te c'alal hahch smilticlan te jalwanejetic yu'un Jehová te Jezabel, te la jquic' bahel ho'winic (100) ta tuhl jalwanejetic yu'un Dios, lajlajuneb yoxwinic (50) la jnac'ticlan ta ch'en, soc te la jcac'ticlambeyic pan soc ha'?

¹⁴Yo'tic hich yac awal: Bahan, halbeya te awajwal: Li' ay te Elías, xchihat. ¡Ya me smilon! xchi.

¹⁵Hich la yal te Elías: ¡Yiloj Jehová te scuentahinej spisil, te ayon ta a'batinel yu'un! yo'tic ya cac' jba ta ilel yu'un, xchi.

¹⁶Hich te Abdías baht sta sba soc te Acab, la yalbe ya'iy; hich te Acab tal sta sba soc te Elías.

¹⁷C'alal la yil te Elías, hich la yalbe: ¿Ha'at bal te yac awa'bebel swocol te Israel? la yut.

¹⁸La sjac' te Elías: Ho'on ma ba yac ca'bebel swocol te Israel; ha'at soc te mach'atic ay yu'un te atate. La awihquitayic te mandariletic yu'un Jehová, la at'unic te baaletique.

¹⁹Yo'tic ticona ta tsobel spisil Israel ta wits Carmelo, soc te jbahc' soc lajuneb yoxwinic (450) ta tuhl jalwanejetic yu'un Baal soc te jbahc' (400) ta tuhl jalwanejetic yu'un Asera te ya xwe'ic ta smesa Jezabel, la yut.

²⁰Te Acab la sticonlan ta iq'uel spisil te snich'nab Israel, soc la stsob te jalwanejetic ta wits Carmelo.

²¹Te Elías nohpoj tal ta stojol te pueblo, hich la yal: ¿Jayeb xan ora te xyahl xmo awo'tanic te cheb bin anopojic? Teme ha Dios te Jehová, t'unahic; teme ha te Baal, t'unahic bahel hiche, xchi. Ma ba la sjaq'uic te pueblo.

²²Te Elías la yalbe xan te pueblo: Ho'on xanix jtuquel hilemon ta jalwanej yu'un Jehová; yan te jalwanejetic yu'un Baal ay jbahc' soc lajuneb yoxwinic (450) stuquelic.

²³A'botcotic cheb torohetic. Ac'a stsahic jcohtuc soc ac'a sesenic, ac'a yaq'uic ta sba si', pero ma ba ya ya'beyic sc'ahc'al. Te ho'one ya jchahpan te yan toro, ya cac' ta sba si', ha nix hich ma ba ya ca'be sc'ahc'al.

²⁴Ya me ac'oponic te diosetic awu'unic, ho'on ya jc'opon te Jehová. Te mach'a dios te ya sjac', te ya sticon tal c'ahc', ha me te mero Dios abi, xchi. Lec te bin yac awal, xchihic spisil te pueblo.

²⁵Te Elías hich la yalbe te jalwanejetic yu'un Baal: Tsahahic jcohtuc toro, chahpanahic ha'ex primero, como ha'ex bayelex. C'oponahic te dios awu'unic, pero ma me xawa'beyic sc'ahc'al, xchi.

²⁶Hich la yiq'uic tal te toro te a'botic, la schahpanic, soc la sc'oponic te Baal c'alal ta sab ha to ta ohlil c'ahc'al, hich yac yalbelic: ¡Baal, jac'a jc'opcotic! xchihic. Pero mayuc chicnaj sc'op, mayuc mach'a la sjac'.

²⁷Ta ohlil c'ahc'al te Elías hahch slaban, hich la yal: Awtayahic ta tulan, melel ha dios; ay wan bin yac snopilambel, ay wan ya'tel, o ay wan ta behel; repente wayal, ya sc'an tijel, xchi.

²⁸Hahchic xan ta tulan aw, soc hahch yehchentes sbaq'uetalic ta cuchillo soc lanza, hich te bin ut'il scostumbrehic, ha to c'alal la yatin sch'ich'elic.

²⁹C'ax ta ohlil c'ahc'al, tey noc'olic ta aw a c'alal ta yorahil yaq'uel te milbil mahtanil, pero mayuc chicnaj sc'op, mayuc mach'a la sjac', mayuc mach'a la yich' ta cuenta.

³⁰Ha yu'un te Elías hich la yalbe spisil te pueblo: Nohpojanic tal ta jtojol, xchi. Spisil te pueblo nohpojic tal ta stojol. Te Elías la schahpan xan te scajtajib ta chiq'uel mahtanil yu'un Jehová te jihneme.

³¹La stsac lahchayeb tonetic, hich te bin ut'il yahtalul te jaychahp te snich'nab Jacob, te hich halbot yu'un Jehová: Israel abihil ya xc'oht, te xchihe.

³²Te tonetic ha la spas a te scajtajib ta chiq'uel mahtanil ta scuenta sbihil te Jehová. Patil la spasbe sch'acomal ta sjoyobal te scajtajib te ya xhu' ya x'och cha'p'is[49] awalil a.

³³Patil la schahpan te si', la sesen te toro, la yac' ta ba si',

³⁴hich la yal: Nojesahic chaneb q'uib ha', malbeyahic ta sba te ti'bal soc si'il, xchi. La yalbe xan: Pasahic yan buelta, xchi. Hich la spasic yan buelta. La yalbe yan buelta: Pasahic scuenta yoxebal buelta, xchi. Hich la spasic ta yoxebal buelta.

³⁵Oquin te ha' ta sjoyobal te scajtajib soc noj ta ha' te sch'acomal.

³⁶C'alal la sta yorahil te ya yich' aq'uel te scohtol chic'bil mahtanil, te jalwanej Elías nohpoj bahel, hich la yal: ¡Jehová, Dios yu'un Abraham, Isaac soc Israel, ac'a ta na'el yo'tic te ha'at Diosat ta Israel soc te ho'on awa'baton, soc te ta scuenta amandar te hich yacon ta spasel!

³⁷Jac'bon jc'op, Jehová, jac'bon jc'op scuenta yu'un hich ya sna'ic a te pueblo ini te ha'at Diosat, Jehová, soc te yacuc asuhtesbe yo'tanic ta atojol, xchi.

³⁸Hich co tal c'ahc' ta stojol Jehová, la schic' te mahtanil, te si', te tonetic, ts'ubil lum soc la slajin te ha' ay ta sch'acomal.

³⁹C'alal la yilic spisil te pueblo, la squejan sbahic c'alal ta lum, soc la yalic: ¡Ha Dios te Jehová, ha Dios te Jehová! xchihic.

⁴⁰Ha yu'un hich halbotic yu'un te Elías: Tsacahic te jalwanejetic yu'un Baal, ma me xcol jtuhluc, xchi. Hich la stsaquic. Te Elías la yic'ticlan bahel ta uc'um Cisón, tey c'oht smilticlan a.

⁴¹Patil te Elías hich la yalbe te Acab: Bahan ta we'el uch'el, como ya xchicnajix sc'op tulan ha'al, xchi.

⁴²Te Acab baht ta we'el uch'el. Te Elías mo bahel ta ba wits Carmelo, c'oht squejan sba, la snijan cohel sjol c'alal ta sjol yacan.

⁴³Patil la yalbe te ya'bat: Bahan, ilawil bahel ta stojol mar, xchi. Hich baht yil, hich la yal: Mayuc bin chican, xchi. Pero hich cha'halbot xan yu'un te Elías: Bahan huquebuc buelta, xchi sc'oblal.

⁴⁴Ta shuquebal buelta sbahel a te a'bat, hich la yal: Yac ta mohel tal ta mar tut tocal hich smuc'ul te bin ut'il tahn c'abal, xchi. Te Elías hich la yal: Bahan, halbeya te Acab: Chahpana acarreta, cohan bahel scuenta yu'un ma ba ya smacat te ha'ale, xchi.

⁴⁵C'alal hich yac spasbel a, mahc ta tocal te ch'ulchan soc tulan ic', buen tulan ha'al la yac'. Te Acab mo ta scarreta, baht ta Jezreel.

⁴⁶Te sc'ab Jehová ay ta stojol te Elías te la schuc sch'uht soc ha nahil baht ta ahnimal yu'un Acab c'alal ta Jezreel.