Read Tzeltal 1 Reyes 19 Bible Online

1 Reyes 19 - Tzeltal bible

1 Reyes 19

¹Te Acab la yalbe Jezabel spisil te bintic la spas te Elías soc te bin ut'il la smilticlan spisil te jalwanejetique.

²Te Jezabel la sticon ta halbeyel te Elías: Hich me ac'a spasbon te diosetic, soc c'ax to xan hich a, teme pajel ta hichilan ora ma hichuc ya jpasbat te bin ut'il la apasticlambe te jalwanejetic, la yut.

³Te Elías la xi', hich baht ta ahnel ta scoltayel scuxlejal, baht ta Beerseba te ay ta sq'uinal Judá, tey la yihquitay a te ya'bate.

⁴Te Elías baht jun xan c'ahc'al ta jochol taquin q'uinal, la shuhcan sba ta ye'tal enebro-te'. Yo'tanuc ya xchamix, hich la yal: ¡Tic'uquix a, Jehová! Lajimbon te jcuxlejal; ma ho'ucon lecon xan a te bin ut'il te jme'jtate, xchi.

⁵La smehtsan sba ta ye'tal te enebro-te', och swayel. Pero c'oht ta tijel yu'un ch'ul a'bat, hich halbot: Hahchan, we'an, xchi sc'oblal.

⁶Te Elías la yil ta sjolinab te ay pimil pan te ta'ajtesbil ta ba ac'al, soc jun jarra ha'. La swe' soc la yuch', cha'way xan.

⁷Tal ta tijel yu'un schebal buelta te ch'ul a'bat yu'un Jehová, hich halbot: Hahchan, we'an, como namal to te banti ya xbahate, xchi sc'oblal.

⁸Hich hahch soc we' uch'. A'bot yip yu'un te we'elil la swe', hich behen cha'winic (40) c'ahc'al soc cha'winic (40) ahc'abal ha to c'alal c'oht ta Horeb, te wits yu'un Dios.

⁹Tey och bahel a ta ch'en te banti c'ax ahc'abal yu'un. C'oponot yu'un te Jehová, hich halbot: ¿Bin yac apas li'i, Elías? xchi sc'oblal.

¹⁰La sjac' te Elías: Mero xut'et co'tan ta stojol Jehová te Dios te scuentahinej spisil, como te snich'nab Israel la yihquitaybat te chapbil-c'op awu'un, la sjimbat te scajtajib ta chiq'uel mahtaniletic soc la smilticlanic ta espada te jalwanejetic awu'une. Jtuquel xanix hilemon, soc yac slehbelonic yu'un ya smilonic, xchi.

¹¹Hich halbot yu'un Jehová: Loc'an tal, tehc'ana aba ta wits ta stojol Jehová, xchi sc'oblal. Ta hich ora c'ax bahel te Jehová, tal mero tulan ic' te la sjaticlan te witsetic soc la stop'ticlan muc'ul tonetic ta stojol Jehová; pero te Jehová ma ba tey ay a ta ic'. C'alal c'ax te ic', tal nihquel; pero te Jehová ma ba tey ay a ta nihquel.

¹²C'alal c'ax te nihquel, tal c'ahc'; pero te Jehová ma ba tey ay a ta c'ahc'. C'alal c'ax te c'ahc', chicnaj ta a'iyel sajsaj c'op te c'un xlamet ta a'iyel.

¹³C'alal la ya'iy te Elías, la smac sit ta smehyil-pac', loc' tal ta sti'il te ch'ene. Hich hul c'op ta stojol te hich la yal: ¿Bin yac apas li'i, Elías? xchi.

¹⁴La sjac': Mero xut'et co'tan ta stojol Jehová te Dios te scuentahinej spisil, como te snich'nab Israel la yihquitaybat te chapbil-c'op awu'un, la sjimbat te scajtajib ta chiq'uel mahtaniletic soc la smilticlanic ta espada te jalwanejetic awu'une. Jtuquel xanix hilemon, soc yac slehbelonic yu'un ha nix hich ya slajimbonic jcuxlejal, xchi.

¹⁵Hich halbot yu'un te Jehová: Bahan, suhtan bahel ta be banti talat, ta sbehlal te jochol taquin q'uinal yu'un Damasco. C'alal ya xc'ohat ya me amalbe aceite te Hazael scuenta ajwalil yu'un Siria.

¹⁶Te Jehú snich'an Nimsi, ya me amalbe aceite scuenta ajwalil yu'un Israel; soc te Eliseo snich'an Safat, ta Abel-mehola, ya me amalbe aceite scuenta ajelol ta jalwanej.

¹⁷Te mach'a ya xcol ta espada yu'un Hazael, ha me ya smil te Jehú, soc te mach'a ya xcol ta espada yu'un Jehú, ha me ya smil te Eliseo.

¹⁸Hilem cu'un j'ohlil swaxac lajunbahc' (7,000) ta tuhl ta Israel te ma ba la squejan sbahic ta stojol Baal soc te ma ba la yuhts'uyic, xchi.

¹⁹Te Elías hahch bahel tey a, c'oht sta te Eliseo snich'an Safat, yac ta a'tel ta arado soc lahchaychahp j'a'tel-wacaxetic, te Eliseo yac stijbel bahel a te slahchaychahpal. Te Elías baht ta stojol Eliseo, la ya'be te smehyil-pac' ta sba.

²⁰Hich te Eliseo la yihquitay te j'a'tel-wacaxetic, baht ta ahnimal ta spat te Elías, hich c'oht yalbe: Ac'awon bahel ta yuhts'uyel hilel te jme'jtat, patil ya jt'unat bahel, xchi. Bahan, suhtan bahel; ¿bin la jpasbat? xchi te Elías.

²¹Hich suht bahel, la stsac te cheb j'a'tel-wacaxetic, la smil; te ste'el te arado la swo a te ti'bal, la ya'be swe' te pueblohe. Patil baht st'un bahel te Elías, la yac' sba ta a'batinel yu'un.