Read Tzeltal 1 Reyes 2 Bible Online

1 Reyes 2 - Tzeltal bible

1 Reyes 2

¹Te c'alal la stahix yorahil ya xcham a te David, la spas hilel ta mandar te Salomón te snich'an, hich la yal:

²Ya xbohonix te banti ya xbahtic spisil mach'atic ayic ta bahlumilal. Ac'a fuersa, pasa winiquil.

³Ch'uhuna te mandariletic yu'un Jehová te Dios awu'un, behenan ta behetic yu'un, pasa te chahpambil mandariletic soc te mandariletic, te bintic yaloj ta mandar soc te testigo c'op yu'un, hich te bin ut'il ts'ihbabil ta mandariletic yu'un Moisés, scuenta yu'un lec ya xc'oht spisil bintic yac apas soc ta bayuc ya xbahat.

⁴Soc scuenta yu'un hich me ya yac' c'ohtuc ta pasel a te Jehová te bin la yalbon, te hich la yal: Teme ya scanantaybon te be cu'un te anich'nab, teme smelelil ya xbehenic ta jtojol ta spisil yo'tanic soc ta spisil sch'uhlelic, mayuc bin ora te mayuc ats'umbal te ya xhuhcaj ta huctajibal yu'un Israel, xchi.

⁵Ana'ojix te bin la spasbon te Joab, te yal Sarvia, ha te bin la spasticlambe te cheb jtsobaw soldadohetic yu'un Israel, ha te Abner snich'an Ner, soc te Amasa snich'an Jeter, te la smilticlan, la smal ch'ich' yu'un guerra ta yorahil lamal q'uinal, la yaq'uix ch'ich' yu'un guerra ta schuhquil sch'uht soc ta step slapoj.

⁶Hich me yac apas te bin ut'il ay sp'ijil awo'tan; ma me xawac' te lamal q'uinal ya xco bahel ta muquenal.

⁷Yan te snich'nab Barzilai te talemic ta Galaad, c'uxultaya stuquelic, ha'uc me te ic'bilic awu'un ta amesa, como ha la scoltayonic te c'alal ayon ta ahnel ta stojol abanquil Absalón.

⁸Soc ha nix hich sjoquinejat te Simei snich'an Gera, sts'umbal Benjamín, te talem ta Bahurim, te la sbohlc'optaybon jc'oblal ta tulan te c'alal yacon ta bahel ta Mahanaim a. Pero ha nix co tal stahon ta Jordán, soc ho'on la jcalbe ta jamal ta stojol Jehová: Ma ba ya jmilat ta espada, xchihon.

⁹Pero ma me xawal te mayuc smul. Ay sp'ijil awo'tan, yac ana' bin yac apasbe scuenta yu'un ya xco bahel ta muquenal soc sch'ich'el te sacal sjol, xchi.

¹⁰Cham[1] te David, la yich' muquel ta Pueblo yu'un David.

¹¹Cha'winic (40) ha'bil ay ta ajwalil ta Israel te David. Huqueb ha'bil ay ta ajwalil ta Hebrón, oxlajuneb scha'winic ha'bil (33) ta Jerusalén.

¹²Huhcaj te Salomón ta shuctajib David te state, yich'oj yip ta lec te banti ay ta ajwalil.

¹³Te Adonías te yal Haguit, baht yil te Betsabé te snan Salomón. Hich joc'obot yu'un te Betsabé: ¿Scuenta bal lamal q'uinal te talate? xchi. Scuenta lamal q'uinal, xchi te Adonías.

¹⁴Soc la yal xan: Ay bin ya calbat, xchi. Halbon ca'iy, xchi te Betsabé.

¹⁵Hich la yal: Ha'at ana'oj te ho'on ay ta jcuenta te ya x'ochon ta ajwalil soc te spisil Israel tal sitic ta jtojol yu'un ha ajwalil yu'unic ya xc'ohon. Pero c'ax ta stojol te quihts'in, como ha a'bot yu'un Jehová.

¹⁶Yo'tic ay bin ya jc'ambat, ma me xamucbon ta awo'tan, xchi. C'opojan, xchi te Betsabé.

¹⁷Hich la yal te Adonías: Awocoluc a, c'opombon te ajwalil Salomón (como ha'at ma ba ya smucbat ta yo'tan) te yacuc ya'bon quihnamin te Abisag te talem ta Sunem, xchi.

¹⁸Lec ay, ya jc'opombat te ajwalil, xchi te Betsabé.

¹⁹Hich te Betsabé baht sc'opon te ajwalil Salomón ta scuenta te Adonías. Te ajwalil la stehc'an sba, la yic' ta stojol soc la snijan sba ta stojol te snane, la shuhcan xan sba ta shuctajib, la yac' ta ich'beyel tal silla yu'un ya xhuhcaj a te snan ta swa'el-c'ab.

²⁰La yal te snane: Ay bin ya jc'ambat jtebuc; ma me xamucbon ta awo'tan, xchi. Jnan, c'ambon, ma ba ya jmucbat ta co'tan, xchi te ajwalil.

²¹A'beya yic' yihnamin te abanquil Adonías te Abisag te talem ta Sunem, xchi te Betsabé.

²²Hich la sjac'be te snan te ajwalil Salomón: ¿Bin yu'un yac ac'ambe yihnamin te Adonías te Abisag te talem ta Sunem? Hich c'ohem te yac ac'ambon te ya x'och ta ajwalil, como ha banquilal cu'un soc jun ay soc te sacerdote Abiatar soc Joab te yal Sarvia, xchi.

²³Te ajwalil Salomón jamal la yal ta stojol Jehová: ¡Hich ac'a spasbon Dios, soc c'axuc to xan hich a, teme ma ba ya xlaj te Adonías yu'un te bin la yal!

²⁴¡Yiloj Jehová! te la ya'bon quip soc te la yac'on ta shuctajib te jtat David, te la yac' te ma xch'ay jts'umbal ta jna hich te bin ut'il yaloj, ya me xlaj yo'tic te Adonías, xchi.

²⁵Ha yu'un te ajwalil Salomón la sticon bahel te Benaía snich'an Joiada, te baht smil te Adonías.

²⁶Te ajwalil la yalbe te sacerdote Abiatar: Bahan ta aq'uinal ta Anatot, ya sc'an te ya xlajat, pero ma ba ya jmilat yo'tic como awich'beyej bahel te scaxahul te chapbil-c'op yu'un Jehová ta stojol te jtat David, soc pajal c'ax awocol soc te jtate, xchi sc'oblal.

²⁷Hich te Salomón la sloq'ues ta sacerdotehil ta stojol Jehová te Abiatar, scuenta yu'un ya xc'oht ta pasel a te bin la yal te Jehová ta Silo sc'oblal te mach'atic ay yu'un te Elí.

²⁸Hich c'oht ta halbeyel te Joab, te jun yac'oj sba soc Adonías, pero ma ba jun la yac' sba soc stuquel te Absalón, hich baht ta ahnel ta nahilpac' templo yu'un Jehová, c'oht stsac te xulubiletic yu'un te scajtajib ta chiq'uel mahtanil.

²⁹Halbot te Salomón te baht ta ahnel ta nahilpac' templo te Joab soc te ay ta sts'ehl te scajtajib ta chiq'uel mahtanil. Ha yu'un te Salomón la sticon bahel te Benaía snich'an Joiada, hich la yalbe: Bahan, mila, xchi.

³⁰Te Benaía och bahel ta nahilpac' templo yu'un Jehová, hich la yalbe: Te ajwalil la yal te ya me xloc'at, la yut. Ma'uc, li' ya xlajoni, xchi te Joab. Hich suht bahel te Benaía, baht yalbe te ajwalil te bin halbot yu'un te Joab.

³¹Hich la yal te ajwalil: Pasa te bin ya yal. Mila soc muca, loq'uesbon ta jtojol soc ta stojol te sna jtat te sch'ich'el te mach'a mayuc smul te milot yu'un te Joab.

³²Te Jehová ha me ya sutbe spacol te ch'ich' ta stojol, como la smil te cheb winiquetic te c'ax hich toj soc lec ta winiquil a te bin ut'il te Joab; la smilticlan ta espada te ma ba la sna' te jtat David: ha te Abner snich'an Ner, te jtsobaw yu'un soldadohetic yu'un Israel, soc te Amasa te snich'an Jeter, te jtsobaw yu'un soldadohetic yu'un Judá.

³³Te sch'ich'elic ac'a c'ohtuc ta scuenta Joab soc ta scuenta sts'umbal sbahtel q'uinal. Yan te David soc te sts'umbal, ta sna soc ta shuctajib, spisil me ora lamal q'uinal ta stojol yu'un te Jehová, xchi.

³⁴Hich te Benaía snich'an Joiada mo bahel, baht smil te Joab; la yich' muquel ta sna ta jochol taquin q'uinal.

³⁵Te ajwalil la yotses ta jtsobaw yu'un soldadohetic te Benaía scuenta sjelol te Joab, soc te sacerdote Sadoc scuenta sjelol te Abiatar.

³⁶Patil te ajwalil la sticon ta iq'uel tal te Simei, hich la yalbe: Pasa ana ta Jerusalén, tey ya xnahinat a. Pero ma me xloc'at bahel ta yan lugar,

³⁷como te bin c'ahc'alil ya xloc'at bahel, te ya sohlat bahel ta jehch uc'um Cedrón, ya me xlajat. Ha'at nix yac amulin te ach'ich'el, xchi.

³⁸Te Simei hich la yalbe te ajwalil: Lec te bin yac awale; te bin la yal te ajwalil cu'un, hich me ya spas te a'bat awu'une, xchi. Hich te Simei halaj ta nahinel ta Jerusalén.

³⁹Pero oxeb ha'bil ta patil, loc' ta ahnel cheb ya'bat te Simei, bahtic ta stojol Aquis snich'an Maaca, ajwalil yu'un Gat. Hich halbot te Simei: Te a'batetic awu'un ayic ta Gat, xchi.

⁴⁰Ha yu'un te Simei la schahpan sburro, baht ta Gat ta banti ay Aquis ta slehel tal te a'batetic yu'une. Hich baht te Simei, la yic' suhtel tal ta Gat te a'batetic yu'une.

⁴¹Patil halbot te Salomón te loq'uemix bahel ta Jerusalén te Simei, baht ta Gat soc suhtix talel.

⁴²Ha yu'un te ajwalil la sticon ta iq'uel tal te Simei, hich la yalbe: ¿Ma bal lajuc cac'at ta yalel ta jamal ta stojol Jehová soc te hich la jca'bat ana': Te bin c'ahc'alil ya xloc'at bahel, bayuc ya xbahat, ya me ana' te ya xlajat yu'un, ma bal xhihon? Soc ha'at la awalbon: Lec te bin yac awal, ya jch'uhun, te xchihate.

⁴³¿Bin yu'un ma ba la acanantaybon hiche te bin la awal ta jamal ta stojol Jehová, soc te mandar te la jcalbate? xchi.

⁴⁴Soc hich la yal xan te ajwalil ta stojol Simei: Ana'oj ta lec spisil bintic chopol la apasbe te jtat David. Ha yu'un te Jehová la yaq'uix suhtuc ta atojol te bin chopole.

⁴⁵Yan te ajwalil Salomón ya me yich' bendición stuquel soc te shuctajib David, stalel me ya xhil ta stojol Jehová, xchi.

⁴⁶Hich te ajwalil la spas ta mandar te Benaía snich'an Joiada, hich loc' bahel, baht smil te Simei. La yich' yip te a'tel ta ajwalil ta sc'ab te Salomón.