Read Tzeltal 1 Reyes 5 Bible Online

1 Reyes 5 - Tzeltal bible

1 Reyes 5

¹Te Hiram ajwalil yu'un Tiro la sticon a'batetic yu'un ta stojol Salomón c'alal la ya'iy te och ta ajwalil ta sjelol te state; como te Hiram spisil ora lec yo'tan ta stojol David.

²Ha yu'un te Salomón hich la sticon ta halbeyel te Hiram:

³Ana'oj te jtat David ma ba hu' yu'un spasbeyel na ta scuenta yich'el ta muc' te sbihil Jehová te Dios yu'un ta scaj te joytayot ta guerrahetic, ha to c'alal a'bot yu'un Jehová ta ye'tal yoc te scontratac.

⁴Pero yo'tic te Jehová te Dios cu'un ya'beyejon lamal q'uinal ta bayuc, mayuc contra soc mayuc bin chopol ay ta xi'el.

⁵Ha yu'un jnopoj te ya jpas na yo'tic yu'un te sbihil te Jehová te Dios cu'un, hich te bin ut'il halbot yu'un Jehová te jtat David, te hich la yal: Te anich'an te ya cac' huhcajuc ta ahuctajib ta ajelol, ha ya spas na ta scuenta yich'el ta muc' te jbihile, te xchihe.

⁶Pasa mandar hiche te ya sts'etbonic cedrohetic yu'un Líbano. Te a'batetic cu'un ya sjoquinic te a'batetic awu'une, soc ho'on ya jtojbat te a'batetic awu'un te jayeb yac awal. Como ha'at ana'oj te mayuc mach'a ya sna' sts'etel te' hich te bin ut'il te sidonetique, xchi.

⁷Te Hiram, c'alal la ya'iy bin la yal te Salomón, buen tse'el yo'tan yu'un, hich la yal: Bayel yutsil yo'tic te Jehová, te la ya'be snich'an te David te ay sp'ijil yo'tan ta scuentahinel te muc'ul pueblo ini, xchi.

⁸Te Hiram hich la sticombe ta halbeyel te Salomón: La jca'iyix te bin la aticombon ta halbeyel. Ya jpas spisil te bin ya sc'an awo'tan ta scuenta te cedro soc te ciprés.

⁹Te a'batetic cu'un ya yich'ic hahchel te trozohetic ta Líbano c'alal ta mar. Ya jticombat bahel ta poy ta mar, ya xc'oht ta banti yac awalbon. Tey ya yich' tilel a, hich yac awich' bahel. Ha'at yac awac' te bin ya sc'an co'tan te yac awa'be we'eliletic te mach'atic ay cu'un, xchi.

¹⁰Hich te Hiram la ya'be te Salomón spisil te cedro soc ciprés te la sc'ane.

¹¹Te Salomón la ya'be Hiram j'ohlil yoxpic (20,000) coro[5] trigo yu'un swe'elic te mach'atic ay yu'un, soc j'ohlil yoxpic (20,000) coro lequil aceite. Hich la ya'be te Hiram ta jujun ha'bil te Salomón.

¹²Te Jehová la ya'be sp'ijil yo'tan te Salomón, hich te bin ut'il halbot yu'une. Lamal q'uinal te Hiram soc Salomón, la schap sc'opic ta schebalic.

¹³Te ajwalil Salomón la yal mandar ta spisil Israel te ay sujel ta a'tel, ha oxpic soc ho'lajunbahc' (30,000) ta tuhl winiquetic c'oht.

¹⁴Ha la sticon bahel ta Líbano ta chahpalchahp ta jpic soc ho'bahc' (10,000) ta tuhl ta jujun u. Hich jun u ayic ta Líbano, cheb u ayic ta snahic. Te Adoniram la scuentahin te mach'atic sujbilic ta a'tel.

¹⁵Te Salomón ay xan waxacpic soc ho'lajunbahc' (70,000) jcuch-ihcatsiletic soc lajunpic (80,000) jtop'-tonetic ta witsiltic.

¹⁶Ma ba ochem ta ahtayel waxacbahc' soc ho'winic (3,300) ta tuhl jcuentahinwanejetic yu'un Salomón te la scuentahinic te a'tel soc te la scuentahinic te mach'atic la spasic te a'tele.

¹⁷Te ajwalil la sticon ta loq'uesel tal lequil muc'ul tonetic scuenta yich'o-ip te Na pasbil ta walubil tonetic.

¹⁸Te albañiletic yu'un Salomón soc yu'un Hiram, soc te winiquetic yu'un Gebal, la sts'etic soc la schahpanic te te' soc walubil ton yu'un spasel te Nahe.