Read Tzeltal 1 Reyes 7 Bible Online

1 Reyes 7 - Tzeltal bible

1 Reyes 7

¹Te Salomón la spas sna, oxlajuneb (13) ha'bil a hu' yu'un.

²Soc la spas te na Bosque yu'un Líbano sbihil, ha ho'winic (100) xuhc'ubil[14] snahtil, lajuneb yoxwinic (50)[15] sjamalil, soc lajuneb scha'winic (30) xuhc'ubil[16] stoyolil. Yich'oj yip ta chanchohl oyetic yu'un cedro, cajajtic ta sba ts'amte'etic yu'un cedro tey a.

³Macal ta tablahetic ta sba te ts'amte'etic te yich'oj yipic ta ho'eb yoxwinic (45) oyetic; ta jujuchohl ay ho'lajuneb (15) oyetic.

⁴Ay oxchohl ventanahetic, oxoxeb snuhp'usitayej sbahic.

⁵Spisil te puertahetic soc oyetic chanxuhc ayic, te ventanahetic oxoxeb snuhp'usitayej sbahic.

⁶Ha nix hich la spas cholol yoyal te ay lajuneb yoxwinic (50) xuhc'ubil snahtil, soc lajuneb scha'winic (30) xuhc'ubil sjamalil. Soc ay schebal cholol yoyal te snuhp'usitayej sba te ay smuhquil.

⁷Soc la spas yan cholol yoyal yu'un shuctajib te banti ya ya'iy chahpanwanej, ha cholol yoyal yu'un chahpanwanej. La smac ta cedro ta lum c'alal ta smuhquil.

⁸Te na te banti nahin te Salomón te ay ta yan amac' ta yutil te cholol yoyal, hich nix yilel pasbil. Soc te Salomón la spasbe sna te yantsil-nich'an faraón te yic'oj yihnamin, pajal yilel soc te cholol yoyal.

⁹Spisil te nahetic, c'alal ta shahchibal yich'o-ip c'alal ta stoyolil, soc ta spat c'alal ta muc'ul amaq'uil, pasbil ta tonetic te bayel stojol te lec p'isticlambil ta set'el ta sierra ta yutil soc ta spat.

¹⁰Te yich'o-ip pasbil ta muc'ul tonetic te bayel stojol, ha lajuneb xuhc'ubil[17] snahtil soc ay yantic te ha waxaqueb xuhc'ubil.[18]

¹¹Te sts'ahcul mohel ha nix hich pasbil ta tonetic te bayel stojol soc lec p'isbil ta wahluyel, soc te'etic yu'un cedro.

¹²Ta sjoyobal te muc'ul amac' ay oxchohl walubil tonetic soc jchohl ts'amte'etic yu'un cedro, hich te bin ut'il te yutil amac' ta sna Jehová soc te yochibale.

¹³Te ajwalil Salomón la sticon ta iq'uel tal te Hiram ta Tiro.

¹⁴Te Hiram, yal jtuhl me'ba' ants, sts'umbal Neftalí, yan te state, ha slumal te Tiro, la sna' a'tel ta bronce. Te Hiram ay sp'ijil yo'tan, ay snopojibal yu'un, soc ya sna' spisil a'tel ta bronce. Tal ta stojol te ajwalil Salomón, la spasbe spisil te ya'tele.

¹⁵La spas cheb oyetic ta uhltesbil bronce, ha waxaclajuneb (18) xuhc'ubil[19] snahtil te jujune soc lahchayeb (12) xuhc'ubil[20] smuc'ul ta sjoyobal.

¹⁶Soc la spas cheb wolajtic sjol pasbilic ta uhltesbil bronce, yu'un la ya'be ta jujun sni'il te bahlal bronce. Ha ho'eb xuhc'ubil[21] snahtil te jujune.

¹⁷Ay lop'taybil chejchej taq'uin soc lazohetic hich te bin ut'il cadena te la ya'be ta jujun wolajtic sjol te ay ta sni'il te bahlal bronce; huqueb ta jujun wolajtic sjol.

¹⁸Soc la spas cha'chohl granada ta sjoyobal te jujun loc'taybil chejchej taq'uin scuenta sch'ahlel te sjol te bahlal taq'uinetique. Ha nix hich la spasbe te yan wolajtic sjole.

¹⁹Te wolajtic te ayic ta sni'il te jujun bahlal bronce ta sjamalil yochibal, sjel ta lirio-nichim, ha chaneb xuhc'ubil[22] stoyolil.

²⁰Ta sjol ta schebal te bahlal bronce ay lajunwinic (200) sloc'omba granadahetic te cha'chohl ta pasel te ay ta sba te banti muc' jamal, joytaybil ta loc'taybil chejchej taq'uin.

²¹Ha la stehc'anlan te bahlal bronce ta sjamalil yochibal te templo. C'alal la stehc'an te bahlal bronce ta wa'el, la ya'be sbihilin Jaquín;[23] c'alal la stehc'an te bahlal bronce ta q'uexam, la ya'be sbihilin Boaz.[24]

²²Te sni'il te bahlal bronce hich yilel ta pasel te bin ut'il lirio-nichim. Hich hu' ta pasel te bahlal bronce.

²³Soc la spas ta uhltesbil bronce jun muc'ul yawil ha' te buen sepel, ha lajuneb xuhc'ubil[25] te smuc'ul soc ho'eb xuhc'ubil te stoyolil; te sjoylejal te sti'il ha lajuneb scha'winic (30) xuhc'ubil[26]

²⁴Ta ye'tal sti'il te muc'ul yawil ha', ta sjoyobal ay wolajtic hich te bin ut'il ch'um, lajlajuneb ta jujun xuhc'ubil, cha'cholol te junax pasbil soc te muc'ul yawil ha'.

²⁵Ha cajal ta spat lahchayeb (12) torohetic, oxeb yac yilbelic bahel ta stojol norte, oxeb ta stojol sur, oxeb ta stojol banti ya xloc' tal c'ahc'al, soc oxeb ta stojol smahlib c'ahc'al. Tey yich'oj yip a te muc'ul yawil ha', ochemic scubic bahel ta ye'tal.

²⁶Chanc'ab[27] te spimil te muc'ul yawil ha', soc te sti'il ch'albil hich te bin ut'il copa o lirio-nichim. Ya x'och tey a ho'bahc' (2,000) bato[28] ha'.

²⁷Soc la spas lajuneb scajtajib ha' pasbil ta bronce, chaneb xuhc'ubil jujun xuhc, soc oxeb xuhc'ubil[29] stoyolil te jujune.

²⁸Hich yilel ta pasel te scajtajib ha': ay lehchel taq'uinetic te yich'oj yipic ta ste'el.

²⁹Tey ta lehchel taq'uinetic te yich'ticlanej yip ta ste'el, ay sloc'omba chojetic, torohetic soc querubinetic. Ta ste'el, ta sba soc ta ye'tal te chojetic soc te torohetic, ha ch'albil ta sepbil nichimetic.

³⁰Te jujun scajtajib ha' ay chaneb ruedahetic pasbilic ta bronce soc te ste'el te banti stselet, pasbil ta bronce. Ta schanxuhcul ay yich'o-ip yawil ha' te banti pasbil sepbil nichimetic te jujune.

³¹Ta yutil te sti'il te banti ya xc'oht te yawil ha', ha xuhc'ubil stoyolil. Xjoyet te sti'il, hich pasbil te bin ut'il yich'o-ip, ha j'ohlil scheb xuhc'ubil stoyolil. Ay sch'ahlel ta sti'il; te lehchel taq'uinetic chanxuhc ay, ma ba xjoyet.

³²Schanebal te ruedahetic ayic ta ye'tal te lehchel taq'uinetic, soc te ste'el te banti xjoyet tey ipajem a ta carreta. Te stoyolil te jujun rueda ha j'ohlil scheb xuhc'ubil.

³³Te ruedahetic hich yilelic te bin ut'il sruedahul carreta yu'un guerra. Te ste'el te banti xjoyet, te smuc'ul sti'il, staq'uinal yich'o-ip, soc te hotol banti ochem te ste'el, spisil pasbilic ta bronce.

³⁴Ay chaneb yich'o-ip ta schanxuhcul ta scajtajib, te yich'o-ip junax ay soc te scajtajibe.

³⁵Ta yahc'olal te scajtajib ay jun xjoyet te j'ohlil xuhc'ubil stoyolil. Ta sba te scajtajib, te yich'o-ip soc te lehchel taq'uinetic junax ay soc.

³⁶La spasticlambe sloc'ombahil querubinetic, chojetic soc xahnetic ta stablahul yich'o-ip soc ta lehchel taq'uinetic, chican te bin yilel te sjamalil ta jujune, soc sepbil nichimetic ta sjoyobal.

³⁷Hich la spasticlan te lajuneb scajtajib ha', pajal yilel ta pasel ta uhltesbil taq'uin, junax sp'isol soc pajal yilel ta pasel.

³⁸Soc te Hiram la spasticlan xan lajuneb yawil ha' ta bronce. Te jujune ya x'och cha'winic (40) bato[30] ha' a, soc ho'eb xuhc'ubil sjamalil. Ta jujun scajtajib ha' la ya'be yawil ha'.

³⁹La yac' ho'eb scajtajib ha' ta wa'el, ta stojol sur yu'un te na soc ho'eb ta q'uexam, ta stojol norte. La yac' te muc'ul yawil ha' ta wa'el yu'un te na, ta stojol sloq'uib c'ahc'al soc ta stojol sur.

⁴⁰Ha nix hich te Hiram la spasticlan oxometic, palahetic soc muc'ul tazahetic. Hich hu' yu'un spisil te a'tel a'bot spas yu'un Salomón yu'un te sna te Jehová:

⁴¹ha te cheb bahlal bronce soc te wolajtic ta sni'il te cheb bahlal broncehetic, te cheb jalbil-taq'uin te macbil yu'un a te wolajtic ayic ta sni'il te bahlal broncehetic;

⁴²te jbahc' (400) sloc'omba granadahetic yu'un te cheb loc'taybil chejchej taq'uin, cha'chohl ta jujun jalbil-taq'uin, te la yich' ch'alel ta schebal a te wolajtic te ayic ta sni'il te bahlal broncehetic;

⁴³te lajuneb scajtajib ha', soc te lajuneb yawil ha'etic te ayic ta scajtajibetic;

⁴⁴te muc'ul yawil ha' soc te lahchayeb (12) torohetic ta ye'tal te muc'ul yawil ha';

⁴⁵soc te oxometic, te palahetic soc te muc'ul tazahetique. Spisil te bintic tuhun ta sna Jehová, te a'bot spas yu'un Salomón te Hiram, pasbilic ta huxbil bronce.

⁴⁶Te ajwalil la yac' ta pasel spisil ta uhltesbil taq'uin ta moldehetic ta ch'uyuy lum ta spamlej yu'un Jordán, ta ohlil yu'un Sucot soc Saretán.

⁴⁷Te Salomón ma ba la sp'isbe yalal te bronce te pasbilic a spisil te bintic tuhun, ta scaj te bayele.

⁴⁸Hich te Salomón la spas spisil bintic ya xtuhun ta sna Jehová: ha te scajtajib ta chiq'uel pom pasbil ta oro, jun mesa pasbil ta oro te banti ya xc'oht te pan ac'bil ta stojol Dios;

⁴⁹te scajtajib c'ahq'uetic pasticlambil ta puro oro, ho'eb ta wa'el soc ho'eb ta q'uexam, ta stojol te Mero Ch'ul Awilal, soc sloc'ombahil nichimetic, yawil aceite yu'un c'ahc', soc tenazahetic pasticlambil ta oro;

⁵⁰copahetic, set'ojbil yac'alel mecha, muc'ul tazahetic, muc'ul cucharahetic soc schic'ojibal pom te spisil pasticlambil ta puro oro. Soc ha nix oro te hotbil banti ya sut sba te puertahetic yu'un te yutil na, ta Mero Ch'ul Awilal, soc nix te puertahetic yu'un te templo.

⁵¹Hich hu' spisil te a'tel la yac' ta pasel te ajwalil Salomón yu'un te sna Jehová. Soc la yich' tal te bintic parte yac'oj hilel te David te stat, ha te plata, oro soc yantic biluquetic; la yac' ta yawil c'ulejalil ta sna Jehová.