Read Tzeltal 1 Reyes 9 Bible Online

1 Reyes 9 - Tzeltal bible

1 Reyes 9

¹Te c'alal hu' ta pasel yu'un Salomón te sna Jehová, te na yu'un ajwalil, soc spisil te bintic la sc'an la spas te Salomón,

²te Jehová chicnaj xan scuenta schebal buelta ta stojol, hich te bin ut'il chicnaj ta stojol ta Gabaón.

³Hich halbot yu'un te Jehová: La jca'iybatix ac'op soc te bin la awalbon wocol ta jtojol. La jch'ultesix te Na te ha'at la apas scuenta yu'un tey ya x'ayin spisil ora a te jbihile. Tey ya cac' jsit soc co'tan ta spisil ora a.

⁴Teme hich ya xbehenat ta jtojol te bin ut'il behen te atat David, teme jun awo'tan soc toj awo'tan yac apas spisil te bin la jpasat ta mandar, soc teme yac ach'uhun te mandariletic soc te bin caloj ta mandare,

⁵ho'on ya ca'be yich' yip te ahuctajib scuenta ajwalil ta stojol Israel, hich te bin ut'il la jcalbe te atat David: Mayuc bin ora ya spas falta jtuhl ats'umbal ta huctajibal yu'un Israel, te xchihone.

⁶Yan teme ha'at soc awal-anich'nab yac apit abahic ta jtojol, teme ma ba yac ach'uhumbonic te mandariletic soc te bin caloj ta mandar te la jca'beyex ta atojolic, teme yac awac' abahic ta a'batinel ta stojol yan diosetic soc yac ach'uhuntayic,

⁷ya jloq'ues te Israel tey ta q'uinal te ca'beyeje. Soc te Na ini te la jch'ultes scuenta jbihil ya jch'oj loq'uel ta jtojol, soc te Israel ya xhahch labanel c'op ta stojol soc ya x'och ta labanel yu'un spisil pueblohetic.

⁸Te Na ini te ich'bil ta muc', spisil te mach'atic ya xc'axic tey a, xcham yo'tanic yu'un soc ya me slabanic soc hich me ya yalic: ¿Bin yu'un te hich la spas te Jehová ta stojol te q'uinal soc te Na ini? xchihic me.

⁹Hich ya xhalbotic: Scaj te la yihquitayic te Jehová te Dios yu'unic te loq'uesotic tal yu'un ta Egipto te sme'static, och sch'uhuntayic yantic diosetic, la yich'ic ta muc' soc la yac' sbahic ta a'batinel yu'unic, ha yu'un te Jehová la yac' taluc ta stojolic spisil bintic chopol ini, xchi te Jehová.

¹⁰C'alal ts'acay jtahb (20) ha'bil hu'ix ta pasel yu'un a te Salomón schebal te nahetic, ha te sna Jehová soc te sna ajwalil,

¹¹te ha ich'bot tal yu'un te Hiram ajwalil yu'un Tiro te cedro soc ciprés soc te jayeb oro te la sc'an, te ajwalil Salomón la ya'be jtahb (20) pueblohetic ta sq'uinal Galilea.

¹²Pero c'alal baht yil te pueblohetic a'bot yu'un Salomón te Hiram, ma ba la smulan.

¹³Hich la yal: ¿Bin xanix pueblohiletic a ini te la awa'bon, hermano cu'un? xchi. La ya'be sbihilin Sq'uinal Cabul,[32] te hich sbihil c'alal ora.

¹⁴Te Hiram sticombeyejix Salomón wacwinic (120) talento[33] oro.

¹⁵Hich ay te cuenta yu'un te sujel ta a'tel yu'un te ajwalil Salomón yu'un spasel te sna Jehová soc te na yu'un, te Milo soc te sts'ahcul te Jerusalén, te Hazor, Meguido soc Gezer.

¹⁶(Te faraón ajwalil yu'un Egipto ayix ora te tal yu'untay te Gezer; la schic' soc la smilticlan te cananeohetic te nahinemic tey a. Patil la sq'uebembe hilel te yantsil-nich'an, ha te yihnam Salomón.)

¹⁷Hich te Salomón la scha'pas xan te Gezer soc te Bet-horón te ay ta ahlan,

¹⁸Baalat, soc Tadmor te ay ta jochol taquin q'uinal;

¹⁹soc spisil te pueblohetic te banti la sq'uej we'elil, soc te pueblohetic yu'un te carretahetic yu'un guerra soc te jmoheletic ta cawu, soc spisil bintic la sc'an la spas ta Jerusalén, ta Líbano soc ta spisil te q'uinal banti scuentahinej.

²⁰Spisil te pueblohetic te hilic yu'un te amorreo, heteo, ferezeo, heveo soc jebuseohetic, te ma ha'uc yu'un te snich'nab Israel,

²¹ha te sts'umbalic te hilemic ta q'uinal te ma ba hu' yu'unic te snich'nab Israel te ya slajinic, ha la sujticlan ta a'tel te Salomón, hich ay ta pasel c'alal ora.

²²Pero mayuc jtuhluc snich'nab Israel te ac'ot ta mosohil yu'un Salomón; ha winiquetic yu'un guerra stuquelic, soc a'batetic, príncipaletic, capitanetic, jtsobawetic yu'un carretahetic, soc jmoheletic ta cawu.

²³Te jcuentahinwanejetic yu'un te a'tel yu'un Salomón ay lajuneb swaxacwinic scha'bahc' (550) ta tuhl te la scuentahinic yaq'uel ta pasel te a'tele.

²⁴Te yantsil-nich'an faraón hahch bahel ta Pueblo yu'un David, sohl bahel ta sna te pasbot yu'un Salomón; patil te Salomón hahch spas te Milo.

²⁵Te Salomón oxeb buelta ta jujun ha'bil la yac' scohtol chic'bil mahtaniletic soc mahtaniletic scuenta lamal q'uinal ta scajtajib ta chiq'uel mahtanil te la spasbe te Jehová, soc la schic'be pom ta scajtajib te ay ta stojol Jehová, te c'alal hu'ix ta pasel a te Templohe.

²⁶Te ajwalil Salomón la spasticlan barcohetic ta Ezión-geber te ay ta nopol Elat ta sti'il te Mar Rojo, ta sq'uinal Edom.

²⁷Te Hiram la sticonlan a'batetic yu'un te ya sna'ic lec behel ta mar, te la sjoquinic te a'batetic yu'un Salomón.

²⁸Bahtic ta sq'uinal Ofir, la yich'ic tal tey a jbahc' soc jtahb (420) talento[34] oro ta stojol te ajwalil Salomón.