Read Tzeltal 2 Reyes 1 Bible Online

2 Reyes 1 - Tzeltal bible

2 Reyes 1

¹Te c'alal chamix a te Acab, te Moab la stoy sba ta scontrahinel te Israel.

²Te Ocozías yahl cohel ta ventana ta scha'cajal sna te ay ta Samaria, tsahc ta chamel yu'un. Ha yu'un la sticon bahel a'batetic te hich la yalbe: Bahanic, joc'obeya te Baal-zebub te dios yu'un Ecrón teme ya xc'ax cu'un te jchamele, xchi.

³Pero te ch'ul a'bat yu'un Jehová hich la yalbe te Elías te talem ta Tisbe: Hahchan, bahan, taha aba soc te a'batetic yu'un te ajwalil yu'un Samaria, hich xawalbe: ¿Yu'un bal mayuc Dios ta Israel te ya xbahex ta sjoc'obeyel te Baal-zebub te dios yu'un Ecrón?

⁴Ha yu'un hich ya yal te Jehová: Ma ba ya xhahchatix ta awayib te banti metselat, tey ya xchamat a, xchi. Hich baht te Elías.

⁵Te c'alal suhtic tal te a'batetic ta stojol te ajwalil, hich joc'obot: ¿Bin yu'un te suhtex talel? xchi.

⁶La sjaq'uic: Como tal stahotcotic jtuhl winic te hich la yalbotcotic: Bahan, suhtanic bahel ta stojol te ajwalil te la sticonex talel, hich me xawalbeyic: Hich ya yal te Jehová: ¿Yu'un bal mayuc Dios ta Israel te la aticon ta joc'obeyel te Baal-zebub te dios yu'un Ecrón? Ha yu'un ma ba ya xhahchatix ta awayib, tey ya xchamatix a, xchi.

⁷Te ajwalil la sjoc'obe: ¿Bin yilel te winic te loc' tal stahex soc te hich la yalbeyex? xchi.

⁸Ha jtuhl winic te sc'u'inej nuhcul te ay stsotsel, soc schucoj sch'uht ta nuhcul, xchihic. Ha te Elías te talem ta Tisbe, xchi yu'un te ajwalile.

⁹Hich la sticon bahel ta stojol Elías jtuhl capitan-soldado soc lajuneb yoxwinic (50) soldadohetic yu'un. Te c'alal baht ta banti ay te Elías, hucul ta ba tsehl c'oht sta, hich la yalbe: Winicat yu'un Dios, la yal te ajwalil te ya me xcohat tal, xchi.

¹⁰Te Elías la sjac'be te capitán: Teme winicon yu'un Dios, ac'a cohuc tal c'ahc' ta ch'ulchan, ac'a slajinat soc te lajuneb yoxwinic (50) ta tuhl soldadohetic awu'un, xchi. Hich co tal c'ahc' ta ch'ulchan, ha lajinot yu'un soc te lajuneb yoxwinic (50) winiquetic yu'une.

¹¹Te ajwalil la scha'ticon xan yan capitán soc lajuneb yoxwinic xan (50) ta tuhl soldadohetic. Hich c'oht yalbe te Elías: Winicat yu'un Dios, hich la yal te ajwalil: Cohan tal ta ora, la yut.

¹²La sjac' te Elías: Teme winicon yu'un Dios, ac'a cohuc tal c'ahc' ta ch'ulchan, ac'a slajinat soc te lajuneb yoxwinic (50) ta tuhl winiquetic awu'un, xchi. Hich co tal c'ahc' ta ch'ulchan, ha lajinot yu'un soc te lajuneb yoxwinic (50) ta tuhl winiquetic yu'une.

¹³Patil te ajwalil la scha'ticon xan ta yoxebal buelta yan capitán soc lajuneb yoxwinic (50) ta tuhl winiquetic. Pero te yoxebal capitán mo bahel, la squejan sba ta stojol te Elías, la yalbe wocol, hich la yal: Winicat yu'un Dios, ayuc me sc'oblal awu'un te jcuxlejal soc te scuxlejalic te lajuneb yoxwinic (50) ta tuhl a'batetic awu'une.

¹⁴Cohemix tal c'ahc' ta ch'ulchan, lajinotic te cheb capitanetic soc te lajlajuneb yoxwinic (50) soldadohetic yu'un. Ayuc me sc'oblal te jcuxlejal ta atojol, xchi.

¹⁵Te ch'ul a'bat yu'un Jehová hich la yalbe te Elías: Cohan bahel soc, ma me xaxi', xchi sc'oblal. Hich hahch, co bahel soc te capitán ta stojol te ajwalil.

¹⁶Hich c'oht yalbe te ajwalil: Hich ya yal te Jehová: Te bin ut'il la aticon bahel a'batetic ta sjoc'obeyel Baal-zebub te dios yu'un Ecrón, te hich c'ohem te bin ut'il mayuc Dios ta Israel te yac ajoc'obe te sc'ope, ha yu'un ma ba ya xhahchatix ta awayib, ya me xchamat, xchi.

¹⁷Hich cham te Ocozías, hich te bin ut'il halbot yu'un Jehová ta scuenta Elías. Te bin ut'il mayuc snich'an te Ocozías, ha la sjelolin ta ajwalil te Joram ta schebal ha'bil yochel ta ajwalil ta Judá a te Joram snich'an Josafat.

¹⁸Te bintic xan sc'oblal te Ocozías soc te bintic la spas, ts'ihbabil ta libro yu'un te ya'tel ajwaliletic yu'un Israel.