Read Tzeltal 2 Reyes 10 Bible Online

2 Reyes 10 - Tzeltal bible

2 Reyes 10

¹Te Acab ay lajuneb schanwinic (70) snich'nab ta Samaria. Te Jehú la sts'ihbay cartahetic, la sticonlan ta Samaria ta stojol te príncipaletic, te mamaletic soc te mach'atic scuentahinejic te snich'nab Acab, hich la yal ta carta:

²Te bin ut'il ay ta acuentahic te snich'nab te ajwalil awu'unic, soc te ay carretahetic awu'unic soc jmoheletic ta cawu, te bin ut'il ay sts'ahcul te pueblo soc ay a'tejibaletic yu'un guerra, ta ora nax te c'alal ya xc'oht ta atojolic te cartahetic ini,

³tsahahic ta yohlil te snich'nab te ajwalil awu'unic te banti mero lec soc te toj ta winiquil yac awilic, ac'ahic ta shuctajib te stat soc a'beyahic guerra ta scoltayel te mach'atic ay yu'un te awajwalique, xchi.

⁴Pero bayel xiwic yu'un, hich la yalic: Teme cheb ajwaliletic ma ba hu' stsalbelic te Jehú, ¿bin ut'il c'an hu'uquix cu'untic a te ho'otique? xchihic.

⁵Ha yu'un te mayordomo yu'un te sna ajwalil, te gobernador yu'un te pueblo, te mamaletic soc te mach'atic scuentahinejic te snich'nab te ajwalil, hich la sticonic ta halbeyel te Jehú: Ha a'batotcotic awu'un, ya jpascotic spisil bintic yac awac' jpascotic. Mayuc mach'a ya cotsescotic ta ajwalil. Pasa te bin ya sc'an awo'tan, xchihic.

⁶Te Jehú hich la sts'ihbabe xan ta schebal buelta: Teme ha'ex jwiniquex soc teme yac ac'anic yac ach'uhumbonic te jmandare, ich'beyahic tal sjolic te squerem-nich'nab te ajwalil awu'unique. Ta hich ora pajel ya me xtalex ta jtojol ta Jezreel, xchi. Te lajuneb schanwinic (70) squerem-nich'nab te ajwalil sjoquinejic te príncipaletic yu'un te pueblo, ha yac scoltesbelic.

⁷Te c'alal c'oht ta stojolic te cartahetic, te príncipaletic la stsaquic te lajuneb schanwinic (70) ta tuhl squerem-nich'nab te ajwalil, la smilticlanic; la yac'ticlambeyic ta moch te sjole, la sticonic bahel ta Jezreel.

⁸Te c'alal c'oht te jal-c'op, hich la yalbe te Jehú: La yich'ticlambeyiquix tal te sjol te snich'nab te ajwalil, xchi. La yal te Jehú: Cha'bus yac awaq'uic ta yochibal te pueblo ha to pajel, xchi.

⁹C'alal sacub q'uinal loc' tal Jehú, la stehc'an sba, hich la yalbe spisil te pueblo: Te ha'exe mayuc amulic. Ho'on te la jchapbe sc'oblal ta milel te cajwal soc te la jmile. Pero ¿mach'a la smilticlan spisil ini?

¹⁰Na'ahic me te mayuc bin ma xc'oht ta pasel te bin yaloj Jehová sc'oblal te mach'atic ay yu'un Acab. Te Jehová spasoj te bin la yal ta scuenta Elías te ya'bate, xchi.

¹¹Te Jehú la smilticlan spisil te mach'atic ay yu'un Acab te hilemic ta Jezreel, spisil te príncipaletic yu'un, te sacerdotehetic yu'un soc te mach'atic jun yo'tanic soc, ha to c'alal mayuc mach'a hil jtuhluc.

¹²Patil loc' bahel tey a, baht ta Samaria. C'oht ta Bet-equed yu'un Jcanan-tuminchijetic,

¹³tey la stahbe a te yermanotac Ocozías ajwalil yu'un Judá, hich la sjoc'obe: ¿Mach'ahex a? xchi. Ha quermanocotic te Ocozías, talemotcotic ta spatbeyel yo'tan te yal-snich'nab te ajwalil soc te yalatac te ajwalil-ants, xchihic.

¹⁴Ha yu'un te Jehú la yal: Cuxul a xatsaquic, xchi. Hich cuxul la stsaquic, la smilticlanic ta nopol pozo yu'un Bet-equed yu'un Jcanan-tuminchijetic. Ay cheb yoxwinic (42) ta tuhl, mayuc mach'a cuxul hilel yu'unic.

¹⁵C'alal loc' bahel tey a te Jehú, la sta sba soc Jonadab snich'nab Recab te tal ta ilel yu'un. Te Jehú la spatbe yo'tan soc hich la yal: ¿Lec bal awo'tan ta jtojol, hich te bin ut'il lec co'tan ta atojol? xchi. Lec, xchi te Jonadab. Teme hiche, a'bon tal ac'ab, xchi te Jehú. Hich la ya'be te sc'abe. Te Jehú la yic' mohel sjoquin ta scarreta,

¹⁶hich la yalbe: Joquinawon, ya me awilbon te xut'et co'tan ta spasel te bin ya sc'an te Jehová, xchi. Hich la yic' ochel ta scarreta.

¹⁷C'alal c'oht ta Samaria te Jehú, la smilticlan spisil te mach'atic hilemic yu'un Acab tey a, ha to c'alal jc'axel la slajin, hich te bin ut'il yaloj Jehová ta scuenta Elías.

¹⁸Patil te Jehú la stsob spisil te pueblo, hich la yalbe: Te Acab jteb nax la yich' ta muc' te Baal, pero te Jehú bayel me ya yich' ta muc'.

¹⁹Ha yu'un ic'bonic tal spisil te jalwanejetic yu'un Baal, spisil te a'batetic soc te sacerdotehetic yu'un, ma me ayuc mach'a ya xhil, como ya ca'be muc'ul milbil mahtanil te Baal. Te mach'a ma ba ya xtal, ya me xlaj, xchi. Pero te Jehú hich la spas yu'un ya slo'loy a, scuenta yu'un hich ya slajin spisil te mach'atic yich'ojic ta muc' te Baal.

²⁰Patil la yal te Jehú: Ch'ultesahic jun c'ahc'al scuenta q'uin yu'un Baal, xchi. Hich la spasic.

²¹Te Jehú la sticon bahel jal-c'opetic ta spisil sq'uinal Israel; hich tal spisil te a'batetic yu'un Baal, mayuc mach'a ma ba tal. Ochic bahel ta templo yu'un Baal, noj te templo ta jehch ta jehch.

²²Te Jehú hich la yalbe te mach'a scuentahinej sq'uejel te c'u'uletic: Loq'uesa c'u'uletic yu'un spisil te a'batetic yu'un Baal, xchi. Hich la sloq'ues.

²³Te Jehú soc te Jonadab snich'an Recab ochic bahel ta templo yu'un Baal. Te Jehú hich la yalbe te a'batetic yu'un Baal: Ilawilic teme mayuc jtuhluc ya'bat Jehová ta awohlilic, te ha nax ay a'batetic yu'un Baal, xchi.

²⁴C'alal ochic bahel ta yaq'uel milbil mahtaniletic soc scohtol chic'bil mahtaniletic, te Jehú la yihquitay hilel chanwinic (80) ta tuhl winiquetic ta spat, hich la yalbe: Mach'ayuc a te cuxul ya yihquitay te winiquetic te la jca'beyex ta ac'abic, ha me ya stojbe scuxlejal ta scuxlejal, xchi.

²⁵C'alal laj yo'tanic ta yaq'uel te scohtol chic'bil mahtanil, te Jehú la yalbe te jcananetic soc te capitanetic yu'un: ¡Ochanic, milticlanahic! ¡Ma me ayuc mach'a ya xcol bahel jtuhluc! xchi. Hich te jcananetic soc te capitanetic la smilticlanic ta espada soc la sch'ojticlanic loq'uel. Ochic bahel c'alal ta ch'ul awilal ta templo yu'un Baal,

²⁶la sloq'uesic te loc'ombahetic ta templo yu'un Baal soc la schic'ticlanic.

²⁷La swuyic te sloc'omba Baal, la sjinic te templo yu'un, la sutp'inic ta tsa'najibal c'alal ora.

²⁸Te Jehú hich la slajin te Baal ta Israel.

²⁹Pero te Jehú ma ba la yihquitay te muliletic la spas te Jeroboam snich'an Nabat, te la ya'be sta smul a te Israel. La yihquitay hilel te jcolel torohetic pasticlambilic ta oro te ay ta Bet-el soc ta Dan.

³⁰Te Jehová hich la yalbe te Jehú: Te bin ut'il lec te awa'tel ta jtojol soc te la apasbe te mach'atic ay yu'un Acab spisil bintic ay ta co'tan, ha yu'un te anich'nab ya me xhuhcajic ta huctajibal yu'un Israel ha to c'alal ta schancajal, xchi.

³¹Pero te Jehú ma ba ta spisil yo'tan la stsahtay sba ta spasel te smandar Jehová te Dios yu'un Israel, soc ma ba la yihquitay te muliletic la spas Jeroboam te la ya'be sta smul a te Israel.

³²Ha yorahil a te Jehová hahch stutubtes te sq'uinal Israel. Te Hazael la stsalticlan ta spisil sti'il sq'uinalic:

³³c'alal ta stojol sloq'uib c'ahc'al yu'un Jordán, spisil te sq'uinal Galaad, Gad, Rubén soc te Manasés, c'alal ta Aroer te ay ta nopol sjuclej Arnón, ha to ta Galaad soc ta Basán.

³⁴Te bintic xan sc'oblal te Jehú, spisil bintic la spas soc spisil bintic hu' yu'un spasel, ts'ihbabil ta libro yu'un te ya'tel ajwaliletic yu'un Israel.

³⁵Cham te Jehú, baht sjoquin ta muquenal te chawinic sme'stat, la smuquic ta Samaria. Ha och sjelolin ta ajwalil te Joacaz te snich'ane.

³⁶Te Jehú halaj ta ajwalil yu'un Israel waxaqueb scha'winic (28) ha'bil ta Samaria.