Read Tzeltal 2 Reyes 12 Bible Online

2 Reyes 12 - Tzeltal bible

2 Reyes 12

¹Ta shuquebal ha'bil yochel ta ajwalil a te Jehú och ta ajwalil te Joás; cha'winic (40) ha'bil ay ta ajwalil ta Jerusalén. Sibia sbihil te snan, talem ta Beerseba.

²Te Joás toj bin la spas ta stojol Jehová te jayeb c'ahc'al p'ijubtesot yu'un te sacerdote Joiada.

³Pero ma ba la sloq'ues te toyol awilaletic, como te ants-winiquetic la to yaq'uic milbil mahtaniletic soc la to schiq'uic pom ta toyol awilaletic.

⁴Te Joás hich la yalbe te sacerdotehetic: Tsobahic spisil te taq'uin te ch'ultesbil te ya yich'ic tal ta sna Jehová, ha te taq'uin te ay ta scuentahic yaq'uel ta tuhlultuhl, soc spisil te taq'uin te ta sc'anojel yo'tanic tuhlultuhl ya yich'ic tal ta sna Jehová,

⁵ac'a yich'ic te sacerdotehetic ta sc'abic te mach'atic scuentahinejic sq'uejel te taq'uin, ac'a yich' tuhunel ta schahpanel te banti jihnem te Templo, xchi.

⁶Pero ta oxeb scha'winic (23) ha'bil yochel ta ajwalil te Joás, te sacerdotehetic ma to ba schahpanejic a te banti jihnem te Templohe.

⁷Ha yu'un te ajwalil Joás la yic' tal te sacerdote Joiada soc te yantic sacerdotehetic, hich la yalbe: ¿Bin yu'un ma ba yac achahpanic te banti jihnem te Templo? Yo'tic ma xawich'iquix xan taq'uin yu'un te amohloltac, ya me awaq'uic taq'uin scuenta yu'un ya yich' chahpanel a te banti jihnem te Templo, xchi.

⁸Te sacerdotehetic lec la ya'iyic te ma ba ya yich'beyiquix staq'uin te pueblo soc te ma ba ya xhil ta scuentahic schahpanel te banti jihnem te Templo.

⁹Te sacerdote Joiada la stsac jun caja, la shotbe smahquil, la yac' ta wa'el yu'un te scajtajib ta chiq'uel mahtanil, ha ta wa'el ya yilic te c'alal ya x'ochic ta templo yu'un Jehová. Te sacerdotehetic te ya scanantayic te yochibal te Templo tey la yotsesic a spisil te taq'uin ya yich'ic tal ta sna Jehová.

¹⁰C'alal la yilic te ayix bayel taq'uin ta caja, tal te secretario yu'un te ajwalil soc te muc'ul sacerdote, la yahtayic te taq'uin te ay ta templo yu'un Jehová, soc la sq'uejic.

¹¹La ya'beyic te mach'atic scuentahinejic te a'tel ta sna Jehová. La stojic a te carpinterohetic soc te mach'atic ya sna'ic spasel te yac ta schahpanel te sna Jehová,

¹²soc te albañiletic soc te jwaluyej-tonetic; soc yu'un ya smanic te'etic a soc walubil tonetic yu'un ya yich' chahpanel a te banti jihnem te sna Jehová, soc la stojic spisil te bintic ya xtuhun yu'un chahpanel te Nahe.

¹³Pero te taq'uin la yich'ic talel ta sna Jehová, ma ba tuhun yu'un spasel tazahetic ta plata, set'ojbil sc'ahq'uemal mecha, muc'ul tazahetic, cornetahetic, o yantic bintic ya xtuhun ta templo yu'un Jehová te pasbil ta oro soc ta plata,

¹⁴como ha la ya'beyic te mach'atic ay ta scuentahic te a'tel, ha la stuhunic scuenta schahpanel te sna Jehová.

¹⁵Ma ba c'ambotic te winiquetic banti lajic te taq'uin te ya stojic a te mach'atic yac ta spasel te a'tele, como toj yacalic ta a'tel.

¹⁶Te taq'uin yu'un te mahtaniletic yu'un stojel mulil soc yu'un te mahtaniletic yu'un stahel falta ma ba la yich'ic tal ta sna Jehová, como ha yu'unic te sacerdotehetique.

¹⁷Ha ta yorahil a te Hazael ajwalil yu'un Siria la ya'be guerra te Gat soc la stsal. Patil la snop te ya xmo bahel ta ya'beyel guerra te Jerusalén.

¹⁸Ha yu'un te Joás ajwalil yu'un Judá la yich' spisil te ch'ultesbil mahtaniletic te la yaq'uic te Josafat, Joram soc Ocozías, te namey tatiletic yu'un, ha te ajwaliletic yu'un Judá, soc te ha nix yac'oj, soc spisil te oro te ay ta yawil c'ulejalil yu'un te sna Jehová soc ta sna ajwalil, la sticombe bahel te Hazael ajwalil yu'un Siria, hich loc' bahel ta Jerusalén.

¹⁹Te bintic xan sc'oblal ya'tel Joás soc spisil te bintic la spas, ts'ihbabil ta libro yu'un te ya'tel ajwaliletic yu'un Judá.

²⁰Te a'batetic yu'un la schapbeyic sc'oblal ta milel, hich la smilic te Joás ta sna Milo ta sbehlal Sila.

²¹Hich te Josacar snich'an Simeat soc Jozabad snich'an Somer, te a'batetic yu'un, la yehchentesic soc la smilic te Joás. La smuquic soc te chawinic sme'stat ta Pueblo yu'un David. Ha och ta sjelol ta ajwalil te Amasías te snich'ane.