Read Tzeltal 2 Reyes 13 Bible Online

2 Reyes 13 - Tzeltal bible

2 Reyes 13

¹Ta oxeb scha'winic (23) ha'bil yochel ta ajwalil yu'un Judá a te Joás snich'an Ocozías, te Joacaz snich'an Jehú och ta ajwalil yu'un Israel ta Samaria; huclajuneb (17) ha'bil ay ta ajwalil.

²Chopol bin la spas ta stojol Jehová, ha nix la st'un te muliletic yu'un Jeroboam snich'an Nabat, te la ya'be sta smul a te Israel, ma ba la yihquitay.

³Ha yu'un ilin yo'tan ta stojol Israel te Jehová. Bayel ha'bil la ya'be ta sc'ab Hazael ajwalil yu'un Siria soc ta sc'ab Ben-adad snich'an Hazael.

⁴Te Joacaz la sc'opon te Jehová, a'iybot sc'op yu'un, como la yilbe swocol Israel te a'botic yu'un te ajwalil yu'un Siria.

⁵Te Jehová la ya'be jtuhl jcoltaywanej yu'un te Israel, hich colic ta sc'ab te siriahetique. Hich nahinic ta snahic hich te bin ut'il ta nahil to.

⁶Pero ma ba la yihquitayic te muliletic yu'un te mach'atic ay yu'un Jeroboam, te la ya'be sta smul a te Israel; ha la st'unic bahel; soc te sloc'omba Asera tey hil ta Samaria.

⁷Mayuquix hil winiquetic yu'un Joacaz, ha xanix lajuneb yoxwinic (50) jmoheletic ta cawu, lajuneb carretahetic yu'un guerra, soc jpic soc ho'bahc' (10,000) soldadohetic te ayic ta behel ta yoquic, como ha la yich'ic lajnel yu'un te ajwalil yu'un Siria, hich hilic yu'un te bin ut'il ts'u'lum yu'un tec'ticlanel.

⁸Te bintic xan sc'oblal ya'tel Joacaz soc spisil te bintic la spas soc te bintic hu' yu'un spasel, ts'ihbabil ta libro yu'un te ya'tel ajwaliletic yu'un Israel.

⁹Cham te Joacaz, baht sjoquin ta muquenal te chawinic sme'stat, la smuquic ta Samaria. Ha och ta sjelol ta ajwalil te Joás te snich'ane.

¹⁰Ta shuclajunebal scha'winic (37) ha'bil yochel ta ajwalil yu'un Judá a te Joás, te yan Joás snich'an Joacaz och ta ajwalil yu'un Israel ta Samaria; waclajuneb (16) ha'bil ay ta ajwalil.

¹¹Chopol bin la spas ta stojol Jehová, ma ba la yihquitay te muliletic yu'un Jeroboam snich'an Nabat, te la ya'be sta smul a te Israel; tey behen a.

¹²Te bintic xan sc'oblal ya'tel Joás soc te bintic la spas, soc te bin ut'il la ya'be guerra te Amasías ajwalil yu'un Judá, ts'ihbabil ta libro yu'un te ya'tel te ajwaliletic yu'un Israel.

¹³Cham te Joás, baht sjoquin ta muquenal te chawinic sme'stat, la yich' muquel ta Samaria, ta banti muculic te ajwaliletic yu'un Israel. Ha huhcaj te Jeroboam ta shuctajib.

¹⁴Te Eliseo tahot ta chamel te ha cham yu'une. Te Joás ajwalil yu'un Israel baht yil, la yoq'uetay, hich la yal: ¡Tatil cu'un, tatil cu'un, ha carreta yu'un Israel soc jmoheletic ta cawu yu'un! xchi.

¹⁵Te Eliseo la yalbe: Tsaca t'ihmalte' soc cheb oxebuc ya'tejibalul, xchi. Hich te ajwalil la stsac t'ihmalte' soc cheb oxeb ya'tejibalul.

¹⁶Patil te Eliseo la yalbe te ajwalil yu'un Israel: Tsaca te t'ihmalte', xchi. Hich la stsac. Te Eliseo la scajan sc'ab ta sc'ab te ajwalil,

¹⁷hich la yal: Jama te ventana ay ta stojol banti ya xloc' tal c'ahc'al, xchi. C'alal jam yu'un, la yal te Eliseo: T'ima bahel, xchi. Hich la st'im bahel. La yal te Eliseo: Ha ya'tejibalul t'ihmalte' scuenta colel yu'un Jehová, ha ya'tejibalul t'ihmalte' scuenta stsalel Siria. Como ya me awehchentes te siriahetic ta Afec, ha to c'alal jc'axel yac alajin, xchi.

¹⁸Hich la yalbe xan: Tsaca te ya'tejibalul t'ihmalte', xchi. C'alal la stsaquix a te ajwalil yu'un Israel, hich la yal te Eliseo: Maja a te lum, xchi. Te ajwalil la smaj oxeb buelta te lum, patil la squehchan.

¹⁹Ha yu'un te winic yu'un Dios ilin ta stojol, hich la yalbe: Te lajuc amaj ho'eb waquebuc buelta te lume, hu' awu'un stsalel te siriahetic ha to c'alal mayuc mach'a ya xhil te hichuque. Yo'tic ha nax oxeb buelta yac atsal te Siria, xchi sc'oblal.

²⁰Cham te Eliseo, la smuquic. Ta shahchibal jujun ha'bil ay jpoj-biluquetic moabetic te ya yochintayic te q'uinale.

²¹Ay israeletic te yacalic ta smuquel jtuhl chamen winic a, ora nax la yilic tal jchahp jpoj-biluquetic; hich la sch'ojic ochel te chamen winic ta smuquenal Eliseo. C'alal c'oht sta sba soc te sbaquel Eliseo, cha'cuxaj, la stehc'an sba.

²²Te Hazael ajwalil yu'un Siria la ya'be swocol te Israel te jayeb c'ahc'al cuxul te Joacaz.

²³Pero te Jehová sts'ujet ta yo'tan ta stojolic, la sna'be yo'bolil sbahic yu'un te chapbil-c'op soc Abraham, Isaac soc Jacob. Ma ba la sc'an la slajinlan soc te la sloq'ues ta stojol c'alal ora.

²⁴Cham te Hazael ajwalil yu'un Siria, ha och ta sjelol ta ajwalil te Ben-adad te snich'ane.

²⁵Te Joás snich'an Joacaz la scoltay suhtel ta sc'ab Ben-adad snich'an Hazael te pueblohetic pojbotic yu'un te c'alal tsalot ta guerra te Joacaz te state. Oxeb buelta te Joás la stsal te Ben-adad soc la yich' xan te pueblohetic yu'un Israel.