Read Tzeltal 2 Reyes 15 Bible Online

2 Reyes 15 - Tzeltal bible

2 Reyes 15

¹Ta shuquebal scha'winic (27) ha'bil yochel ta ajwalil yu'un Israel a te Jeroboam, och ta ajwalil ta Judá te Azarías snich'an Amasías.

²Ay waclajuneb (16) ya'bilal a te och ta ajwalil, lahchayeb yoxwinic (52) ha'bil ay ta ajwalil ta Jerusalén. Jecolías sbihil te snane, talem ta Jerusalén.

³Toj bin la spas ta stojol Jehová, hich te bin ut'il la spas te Amasías te state.

⁴Pero ma ba la yich' loq'uesel te toyol awilaletic, yu'un te pueblo la to yaq'uic milbil mahtaniletic soc la to schiq'uic pom ta toyol awilaletic.

⁵Te Jehová la ya'be sc'a'el-chamel te ajwalil, ay sc'a'el-chamel a ha to c'alal cham. Parte banti nahin. Te Jotam te snich'an la scuentahin te sna ajwalil soc la scuentahin te pueblo.

⁶Te bintic xan ya'tel Azarías soc spisil te bintic la spas, ts'ihbabil ta libro yu'un te ya'tel ajwaliletic yu'un Judá.

⁷Cham te Azarías, baht sjoquin ta muquenal te chawinic sme'stat, la smuquic ta Pueblo yu'un David. Ha och ta sjelol ta ajwalil te Jotam te snich'ane.

⁸Ta swaxaclajunebal scha'winic (38) ha'bil yochel ta ajwalil yu'un Judá a te Azarías, te Zacarías snich'an Jeroboam och ta ajwalil yu'un Israel ta Samaria; waqueb u ay ta ajwalil.

⁹Chopol bin la spas ta stojol Jehová, hich te bin ut'il la spasic te sme'stat; ma ba la yihquitay te muliletic yu'un Jeroboam snich'an Nabat, te la ya'be sta smul a te Israel.

¹⁰Te Salum snich'an Jabes la schapbe sc'oblal ta milel te Zacarías. La yehchentes ta stojol te pueblo, la smil, ha och ta sjelol ta ajwalil.

¹¹Te bintic xan ya'tel te Zacarías ts'ihbabil ta libro yu'un te ya'tel ajwaliletic yu'un Israel.

¹²Hich c'oht ta pasel a te bin yaloj Jehová ta stojol Jehú, te hich la yalbe: Ta schancajal ats'umbal ya me xhuhcajic ta huctajibal yu'un Israel, xchi.

¹³Te Salum snich'an Jabes och ta ajwalil te c'alal ayix balunlajuneb scha'winic (39) ha'bil yochel ta ajwalil yu'un Judá a te Uzías; jun u ay ta ajwalil ta Samaria,

¹⁴como te Manahem snich'an Gadi hahch ta Tirsa, tal ta Samaria, la yehchentes te Salum, la smil; ha och ta sjelol ta ajwalil.

¹⁵Te bintic xan ya'tel te Salum soc te la schapbe sc'oblal ta milel Zacarías, ts'ihbabil ta libro yu'un te ya'tel ajwaliletic yu'un Israel.

¹⁶Te Manahem la sjin te Tifsa soc spisil mach'atic tey ayic a soc ta sjoyobal, como ma ba la sjambeyic te ochibaletic; la sjamticlambe sch'uhtic spisil te antsetic swoloj yalic.

¹⁷Ta balunlajuneb scha'winic (39) ha'bil yochel ta ajwalil yu'un Judá a te Azarías, och ta ajwalil yu'un Israel te Manahem snich'an Gadi; lajuneb ha'bil halaj ta ajwalil ta Samaria.

¹⁸Chopol bintic la spas ta stojol Jehová, te jayeb c'ahc'al cuxul ma ba la yihquitay te muliletic yu'un Jeroboam snich'an Nabat, te la ya'be sta smul a te Israel.

¹⁹Te Pul[11] te ajwalil yu'un Asiria la yochintay te q'uinal. Te Manahem la ya'be j'ohlil yoxbahc' (1,000) talento[12] plata scuenta yu'un yacuc xcoltayot yu'un ta ya'beyel xan yip a te ya'tel ta ajwalil.

²⁰Te Manahem la ya'be stoj Israel, spisil te jc'ulejetic; jujutuhl la stojic lajuneb yoxwinic (50) ta sehp plata yu'un ya ya'be te ajwalil yu'un Asiria.

²¹Te bintic xan ya'tel te Manahem soc spisil bintic la spas, ts'ihbabil ta libro yu'un te ya'tel ajwaliletic yu'un Israel.

²²Cham te Manahem, baht sjoquin ta muquenal te chawinic sme'stat; ha och ta sjelol ta ajwalil te Pekaía te snich'ane.

²³Ta lajuneb yoxwinic (50) ha'bil yochel ta ajwalil yu'un Judá a te Azarías, och ta ajwalil yu'un Israel te Pekaía snich'an Manahem; cheb ha'bil ay ta ajwalil ta Samaria.

²⁴Chopol bintic la spas ta stojol Jehová, ma ba la yihquitay te muliletic yu'un te Jeroboam snich'an Nabat, te la ya'be sta smul a te Israel.

²⁵Ay jtuhl capitán yu'un, Peka sbihil, snich'an Remalías, la schapbe sc'oblal ta milel, hich la yehchentes ta sna ajwalil ta Samaria, joquinot yu'un Argob soc Arie soc lajuneb yoxwinic (50) galaadetic. La smil soc ha och ta sjelol ta ajwalil.

²⁶Te bintic xan ya'tel te Pekaía soc spisil bintic la spas, ts'ihbabil ta libro yu'un te ya'tel ajwaliletic yu'un Israel.

²⁷Ta lahchayeb yoxwinic (52) ha'bil yochel ta ajwalil yu'un Judá a te Azarías, och ta ajwalil yu'un Israel ta Samaria te Peka snich'an Remalías; ay ta ajwalil jtahb (20) ha'bil.

²⁸Chopol bin la spas ta stojol Jehová, ma ba la yihquitay te muliletic yu'un te Jeroboam snich'an Nabat, te la ya'be sta smul a te Israel.

²⁹Te c'alal ay ta ajwalil yu'un Israel a te Peka, tal te Tiglat-pileser ajwalil yu'un Asiria, la stsal te Ijón, Abel-bet-maaca, Janoa, Cedes, Hazor, Galaad, Galilea soc spisil te sq'uinal Neftalí; la yic'ticlambe bahel ta chuquel ta Asiria te mach'atic nahinemic tey a.

³⁰Te Oseas snich'an Ela la schapbe sc'oblal ta milel te Peka snich'an Remalías; hich la smil, ha och ta sjelol ta ajwalil, ayix jtahb (20) ha'bil yochel ta ajwalil a te Jotam snich'an Uzías.

³¹Te bintic xan ya'tel Peka soc spisil bintic spasoj, ts'ihbabil ta libro yu'un te ya'tel ajwaliletic yu'un Israel.

³²Ta schebal ha'bil yochel ta ajwalil yu'un Israel a te Peka snich'an Remalías, och ta ajwalil yu'un Judá te Jotam snich'an Uzías.

³³Ay ho'eb scha'winic (25) ya'bilal a te och ta ajwalil; waclajuneb (16) ha'bil ay ta ajwalil ta Jerusalén. Jerusa sbihil te snane, ha yantsil-nich'an Sadoc.

³⁴Toj bin la spas ta stojol Jehová, hich te bin ut'il la spas te Uzías te state.

³⁵Pero ma ba la yich' loq'uesel te toyol awilaletic, como te pueblo la to yaq'uic milbil mahtaniletic soc la to schiq'uic pom ta toyol awilaletic. Ha la spas te puerta ta ahc'ol ta sna Jehová.

³⁶Te bintic xan ya'tel Jotam soc spisil bintic la spas, ts'ihbabil ta libro yu'un te ya'tel ajwaliletic yu'un Judá.

³⁷Ha yorahil a te Jehová hahch sticonlan ta scontrahinel Judá te Rezín ajwalil yu'un Siria soc te Peka snich'an Remalías.

³⁸Cham te Jotam, baht sjoquin ta muquenal te chawinic sme'stat, la yich' muquel ta Pueblo yu'un David. Ha och ta sjelol ta ajwalil te Acaz te snich'ane.