Read Tzeltal 2 Reyes 16 Bible Online

2 Reyes 16 - Tzeltal bible

2 Reyes 16

¹Ta shuclajunebal (17) ha'bil yochel ta ajwalil a te Peka snich'an Remalías, och ta ajwalil yu'un Judá te Acaz snich'an Jotam.

²Ay jtahb (20) ya'bilal a te c'alal och ta ajwalil; waclajuneb (16) ha'bil ay ta ajwalil ta Jerusalén. Ma ba toj bin la spas ta stojol Jehová te Dios yu'un, ma hichuc te bin ut'il la spas te David, te namey tatil yu'une.

³Ha la st'umbe sbe te ajwaliletic yu'un Israel, ha nix hich la yac' c'axuc ta c'ahc' te snich'an, hich te bin ut'il ya spasic te bin ilobtic sba te nacionetic te ch'ojotic loq'uel yu'un Jehová ta stojol te snich'nab Israel.

⁴Soc la yac' milbil mahtanil soc la schic' pom ta toyol awilaletic ta tsehletic soc ta ye'tal spisil te'etic te bayel ya'binal.

⁵Ha yu'un te Rezín ajwalil yu'un Siria soc te Peka snich'an Remalías, ajwalil yu'un Israel, mohic bahel ta Jerusalén ta ya'beyel guerra, ta sjoytayel te Acaz; pero ma ba hu' yu'unic stsalel.

⁶Ta hich ora te ajwalil yu'un Edom la yich' xan te Elat, la stenic loq'uel ta Elat te judiohetique. Te edometic talic ta nahinel tey a c'alal ora.

⁷Ha yu'un te Acaz la sticon bahel winiquetic ta stojol te Tiglat-pileser ajwalil yu'un Asiria, hich la yal: Ho'on awa'baton soc anich'anon. La', coltayawon ta sc'ab te ajwalil yu'un Siria soc te ajwalil yu'un Israel, te yac ya'belonic guerra, xchi.

⁸Te Acaz la stsac te plata soc oro te ay ta sna Jehová soc te c'ulejalil ay ta sna ajwalil, la sticombe smahtanin te ajwalil yu'un Asiria.

⁹Te ajwalil yu'un Asiria la yich'be ta cuenta, hich la ya'be guerra te Damasco, soc la stsal. La yic' bahel ta chuquel te mach'atic nahinemic tey a, la sticonlan bahel ta Kir, soc la smil te Rezín.

¹⁰Patil baht ta Damasco te ajwalil Acaz, yu'un ya sta te Tiglat-pileser ajwalil yu'un Asiria. C'alal la yil te scajtajib ta chiq'uel mahtanil tey ta Damasco, la sticombe te sacerdote Urías te splanohil.

¹¹Te Urías la spas te scajtajib ta chiq'uel mahtanil, hich te bin ut'il ticombil tal yu'un te ajwalil Acaz ta Damasco. Hich la spas te sacerdote Urías te c'alal ma to ba talem ta Damasco a te Acaz.

¹²C'alal suht tal ta Damasco te ajwalil, la yil te scajtajib ta chiq'uel mahtanil, nohpoj bahel, la yac' milbil mahtaniletic tey a;

¹³la schic' te scohtol chic'bil mahtanil soc mahtanil harina yu'un, la smal te malbil mahtanil soc la stsihtsin a te scajtajib ta chiq'uel mahtanil te sch'ich'el te milbil mahtanil scuenta lamal q'uinal.

¹⁴La sloq'ues te scajtajib ta chiq'uel mahtanil pasbil ta bronce te ay ta stojol Jehová, ta ohlil yu'un te templo soc te yach'il scajtajib ta chiq'uel mahtanil, la yac' ta xuhc ta stojol norte yu'un te yach'il scajtajib ta chiq'uel mahtanil.

¹⁵Patil, te ajwalil Acaz hich la spas ta mandar te sacerdote Urías: Tey ta muc'ul scajtajib ya me achic' te scohtol chic'bil mahtanil ta sab soc te mahtanil harina ta tibiltic, te scohtol chic'bil mahtanil soc te mahtanil harina yu'un te ajwalil, soc ha nix hich te scohtol chic'bil mahtanil yu'un spisil te pueblo, soc te mahtanil harina soc te malbil mahtanil yu'unique. Soc ya me atsihtsin ta scajtajib spisil sch'ich'el te scohtol chic'bil mahtanil soc sch'ich'el te milbil mahtanil. Te scajtajib ta chiq'uel mahtanil pasbil ta bronce, ho'on cu'un scuenta yu'un ay bin ya joc'obe a te Jehová, xchi.

¹⁶Te sacerdote Urías la spas spisil te bintic pasot ta mandar yu'un te ajwalil Acaz.

¹⁷Te ajwalil Acaz la xot' loq'uel te joyob lehchel taq'uin yu'un te scajtajibic yawil ha'etic soc la sloq'ues te yawil te ha'e; soc la sloq'ues te muc'ul yawil ha' ta sba te torohetic pasbilic ta bronce te ayic ta ye'tal, la scajan ta sba tonetic.

¹⁸Ta scaj te ajwalil yu'un Asiria, la sloq'ues ta templo yu'un Jehová te smuhquil[13] te yich'oj pasel tey a te ya xtuhun ta sc'ahc'alel cux-o'tan, soc la sloq'ues te ochibal te ha yu'un te ajwalil.

¹⁹Te bintic xan ya'tel Acaz te la spas, ts'ihbabil ta libro yu'un te ya'tel ajwaliletic yu'un Judá.

²⁰Cham te Acaz, baht sjoquin ta muquenal te chawinic sme'stat, la yich' muquel ta Pueblo yu'un David. Ha och ta sjelol ta ajwalil te Ezequías te snich'ane.