Read Tzeltal 2 Reyes 17 Bible Online

2 Reyes 17 - Tzeltal bible

2 Reyes 17

¹Ta slahchayebal (12) ha'bil yochel ta ajwalil yu'un Judá a te Acaz, och ta ajwalil yu'un Israel te Oseas snich'an Ela; ay ta ajwalil baluneb (9) ha'bil ta Samaria.

²Chopol bin la spas ta stojol Jehová, aunque ma sta hich te bin ut'il te yantic ajwaliletic nahil c'axique.

³Te Salmanasar ajwalil yu'un Asiria baht ya'be guerra te Oseas, te ha och ta a'bat yu'un soc la stoj spatan ta stojol.

⁴Pero te ajwalil yu'un Asiria la ya'iy te yac ta schapel sc'op Oseas ta scontrahinel, como sticonej bahel winiquetic ta stojol So ajwalil yu'un Egipto, soc te ma ba yaquix stojbel spatan ta stojol te ajwalil yu'un Asiria hich te bin ut'il ya spas jujun ha'bil. Ha yu'un te ajwalil yu'un Asira la stsac te Oseas soc la yotses ta cárcel.

⁵Patil te ajwalil yu'un Asiria la yochintaybe spisil te q'uinal, soc oxeb ha'bil la sjoytay ta guerra te Samaria.

⁶Ta sbalunebal ha'bil yu'un te Oseas, te ajwalil yu'un Asiria la yich' te Samaria. La yic'ticlan bahel ta chuquel ta Asiria te israeletique. La yac'ticlan nahinicuc ta sq'uinal Halah, ta ti'ti'ha' Habor te muc'ul-ha' ta Gozán, soc ta pueblohetic yu'un te medohetique.

⁷Hich c'oht ta pasel como te snich'nab Israel la sta smulic ta stojol Jehová te Dios yu'unic, te la scoltay loq'uel tal ta sq'uinal Egipto, ta sc'ab faraón ajwalil yu'un Egipto. La sch'uhuntayic yantic diosetic,

⁸soc la st'umbeyic te costumbrehetic yu'un te nacionetic te ch'ojotic loq'uel yu'un Jehová ta stojol te snich'nab Israel, soc te costumbrehetic te hahch spasic te ajwaliletic yu'un Israel.

⁹Te snich'nab Israel muquen la spasic te bin ma tojuc ta stojol Jehová te Dios yu'unic, la spasticlanic toyol awilaletic ta spisil te pueblohetic yu'unic, c'alal ta toyol ts'ahc yu'un ilo-q'uinal c'alal ta pueblohetic joyticlambil ta ts'ahc.

¹⁰Soc la stehc'anic ch'ultesbil tonetic soc loc'ombahetic yu'un Asera ta jujun toyol tsehletic soc ta ye'tal spisil te'etic te ay bayel ya'binal;

¹¹la schiq'uic pom ta spisil te toyol awilaletic hich te bin ut'il la spasic te nacionetic te ch'ojotic loq'uel yu'un Jehová ta stojolic. C'ax chopol bintic la spasic te la shachbeyic yilimba a te Jehová.

¹²La sch'uhuntayic loc'ombahetic te halbotic sc'oblal yu'un Jehová: Ma me hichuc xapasic, xchi.

¹³Te Jehová la scom te Israel soc Judá ta scuenta te jalwanejetic soc spisil te mach'atic ya yilic, hich la yal: Ihquitayahic te chopol behetic, ch'uhunahic te mandariletic cu'un soc te bintic caloj ta mandar, hich te bin ut'il spisil te leyetic te la jca'be te ame'atatic soc te la jticombeyex tal ta scuenta te jalwanejetic, te a'batetic cu'une, xchi.

¹⁴Pero ma ba la yich'ic ta cuenta, mero tulan la yac' sbahic, hich te bin ut'il te sme'static, te ma ba la sch'uhunic te Jehová te Dios yu'unique.

¹⁵Ha la sch'aybeyic te mandariletic, te chapbil-c'op la schap soc te sme'static soc te scomelic te halbotic yu'une. La st'unic diosetic te mayuc stuquic, soc ha nix hich mayuc stuc bahtic yu'un, ha la st'umbeyic stalel te nacionetic ayic ta sjoyobal, te pasotic ta mandar yu'un Jehová te manchuc hich ya spasique.

¹⁶La sch'aybeyic spisil te mandariletic yu'un te Jehová te Dios yu'unique. La spasic cheb sloc'omba jcolel torohetic ta uhltesbil bronce, soc loc'ombahetic yu'un Asera; la sch'uhuntayic spisil te bintic ayic ta ch'ulchan soc la yac' sbahic ta a'batinel yu'un Baal.

¹⁷La yac' c'axuc ta c'ahc' te queremetic soc ach'ixetic yu'unic; la yac' sbahic ta jna'ojel soc jwoyaw; la yac' sbahic ta spasel te bintic chopol ta stojol Jehová, hich la shachbeyic yilimba.

¹⁸Ha yu'un te Jehová bayel ilin ta stojol Israel, hich la sloq'ues ta stojol. Ha xanix hil stuquel te jchahp yu'un Judá.

¹⁹Pero ni ha'uc Judá la sch'uhun te mandariletic yu'un Jehová te Dios yu'unique. Ha nix la st'unic te bintic la spas te Israel.

²⁰Ha yu'un te Jehová la sloq'ues ta stojol spisil te sts'umbal Israel, la ya'be swocolic soc la yac' ta sc'ab jpoj-biluquetic ha to c'alal jc'axel la sloq'ues ta stojol.

²¹Te c'alal Jehová la sloq'ues te Israel ta sna David soc te la yotsesic ta ajwalil te Jeroboam snich'an Nabat, te Jeroboam la yac' te Israel la yihquitayic hilel st'unel te Jehová, la ya'be spas muc'ul mulil.

²²Te snich'nab Israel la st'unic spisil te muliletic la spas te Jeroboam, ma ba la yihquitayic

²³ha to c'alal Jehová la sloq'ueslan ta stojol, hich te bin ut'il yaloj ta scuenta spisil te jalwanejetic te a'batetic yu'une. Hich te Israel ic'otic bahel ta chuquel ta Asiria c'alal ora.

²⁴Te ajwalil yu'un Asiria la yic'ticlan tal ants-winiquetic ta Babilonia, Cuta, Ava, Hamat soc Sefarvaim, la yac'ticlan ta nahinel ta pueblohetic yu'un Samaria scuenta sjelol te snich'nab Israel. Hich la yu'untayic te Samaria soc nahinic tey ta pueblohetic yu'unique.

²⁵Te c'alal ochic ta nahinel tey a ma ba la yich'ic ta muc' te Jehová, ha yu'un la sticon tal chojetic ta stojolic te ha milotic yu'unic.

²⁶Ha yu'un la yalbeyic te ajwalil yu'un Asiria: Te ants-winiquetic te la awic'ticlan tal soc te la awac'ticlan ta pueblohetic yu'un Samaria ma sna'ic bin ya yal te ley yu'un te Dios yu'un te q'uinale. Ha la yac' chojetic ta yohlilic te ya smilic te ants-winiquetic, como ma sna'ic bin ya yal te ley yu'un te Dios yu'un te q'uinale, xchihic.

²⁷Ha yu'un te ajwalil yu'un Asiria hich la yal ta mandar: Ticonahic bahel jtuhluc sacerdote te tey nix la aloq'ues tal ta chuquel, ac'a nahinuc tey a soc ac'a yac' ta nopel te ley yu'un te Dios yu'un te q'uinale, xchi.

²⁸Ha yu'un tal jtuhl te sacerdotehetic te tey yic'ojic hahchel ta chuquel ta Samaria, baht ta nahinel ta Bet-el, la ya'be snopic bin ut'il ay ta ich'el ta muc' te Jehová.

²⁹Pero te jujuchahp te talemic ta yantic nacionetic la spasic diosetic yu'unic ta jujun pueblo banti nahinemic, la yaq'uic ta templohetic ta toyol awilaletic te spasojic te mach'atic nahinemic ta Samaria ta nahil to.

³⁰Te mach'atic talemic ta Babilonia la spasbeyic sloc'ombahil Sucot-benot; te mach'atic talemic ta Cuta la spasic Nergal; te mach'atic talemic ta Hamat la spasic Asima;

³¹te mach'atic talemic ta Ava la spasic Nibhaz soc Tartac; te mach'atic talemic ta Sefarvaim la schiq'uic te snich'nabic scuenta smahtan Adramelec soc Anamelec, te diosetic yu'un Sefarvaim.

³²Soc la yich'ic ta muc' te Jehová, pero la slehic sacerdotehetic yu'unic ta yohlilic nix te la yaq'uic milbil mahtaniletic yu'unic ta templohetic ta toyol awilaletic.

³³Aunque la yich'ic ta muc' te Jehová, la yich'ic ta muc' te diosetic yu'unic, hich te bin ut'il scostumbrehic te nacionetic te banti ic'bilic talel.

³⁴C'alal ora hich yac spasbelic te bin ut'il la spasic ta namey: ma ba ya yich'ic ta muc' te Jehová soc ma ba ya sch'uhunic te mandariletic soc spisil te bintic halbil ta mandaril te la yal te Jehová ta stojol te snich'nab Jacob, te la ya'be sbihilin Israel.

³⁵Te c'alal Jehová la schap sc'op soc, hich la spas ta mandar: Ma me xawich'ic ta muc' yantic diosetic, ma me xaquejan abahic ta stojolic, ma me xawac' abahic ta a'batinel yu'unic soc ma me xawa'beyic milbil mahtaniletic.

³⁶Ha nax me xawich'ic ta muc' te Jehová te la sloq'uesex tal ta sq'uinal Egipto ta scuenta smuc'ul yu'el soc te shachoj sc'ab, ya me aquejan abahic ta stojol soc ya me awa'beyic milbil mahtaniletic.

³⁷Te chapbil mandariletic, te bintic yaloj ta mandar, te mandariletic te la sts'ihbabeyex, ya me atsahtayic ta spasel. Ma me xawich'ic ta muc' yantic diosetic.

³⁸Ma me xch'ay ta awo'tanic te chapbil-c'op cu'un ta atojolic soc ma me xawich'ic ta muc' yantic diosetic,

³⁹ya me awich'ic ta muc' te Jehová te Dioson awu'unic; ha me ya scoltayex loq'uel ta sc'ab te acontrahic, xchi.

⁴⁰Pero ma ba la yich'ic ta cuenta, ha nix la spasic bahel te bintic yac spasbelic ta nahil to.

⁴¹Hich la yich'ic ta muc' te Jehová soc la yac' sbahic ta a'batinel ta stojol te loc'ombahetic yu'unique. Ha nix hich te snich'nab soc smamic, te bin la spasic te sme'static, hich yac spasbelic c'alal ora.