Read Tzeltal 2 Reyes 18 Bible Online

2 Reyes 18 - Tzeltal bible

2 Reyes 18

¹Ta yoxebal ha'bil yochel ta ajwalil yu'un Israel a te Oseas snich'an Ela, och ta ajwalil yu'un Judá te Ezequías snich'an Acaz.

²Ay ho'eb scha'winic (25) ya'bilal a, ay ta ajwalil ta Jerusalén baluneb scha'winic (29) ha'bil. Abi sbihil te snane, yantsil-nich'an Zacarías.

³Toj bin la spas ta stojol Jehová, hich te bin ut'il spisil bintic la spas te David te namey tatil yu'une.

⁴La sloq'ueslan te toyol awilaletic, la swuyticlan te ch'ultesbil tonetic, la sts'eticlan te sloc'omba Asera, soc la slajin te sloc'omba chan pasbil ta bronce te spasoj te Moisés, como ta hich ora te snich'nab Israel yac schic'belic pom ta stojol; a'bot sbihilin Nehustán te chane.

⁵Te Ezequías la smuc'ulin yo'tan te Jehová te Dios yu'un Israel. Ta spisil te ajwaliletic te nahil c'axic soc te patil ochic ta ajwalil ta Judá, mayuc mach'a hich yo'tanic a te bin ut'il Ezequías.

⁶La st'un te Jehová, mayuc bin ora la spihtes sba ta stojol, la sch'uhun te mandariletic a'bot yu'un Jehová te Moisés.

⁷Joquimbil yu'un Jehová, lec c'oht spisil bintic la spasticlan. Te Ezequías la stoy sba ta stojol te ajwalil yu'un Asiria, ma ba la yaq'uix sba ta a'batinel yu'un.

⁸Soc la stsal te filisteohetic c'alal ta Gaza soc ta sti'il sq'uinal, c'alal ta ilo-q'uinaletic c'alal ta pueblohetic te ay ts'ahculic.

⁹Ta schanebal ha'bil ya'tel ta ajwalil a te Ezequías, te ha shuquebal ha'bil ay ta ajwalil a te Oseas snich'an Ela, ajwalil yu'un Israel, te Salmanasar ajwalil yu'un Asiria tal sjoytay ta guerra te Samaria.

¹⁰Ta yoxebal ha'bil la stsalic. Tsalbil c'oht te Samaria ta swaquebal ha'bil yochel ta ajwalil a te Ezequías, ha te sbalunebal ha'bil yochel ta ajwalil yu'un Israel a te Oseas.

¹¹Te ajwalil yu'un Asiria la yic'ticlan bahel ta chuquel te israeletic ta Asiria, la yac'ticlan ta nahinel ta Halah, ta sti'il muc'ul-ha' Gozán ta Habor, soc ta pueblohetic yu'un te medohetic,

¹²ta scaj te ma ba la yich'ic ta cuenta te sc'op te Jehová te Dios yu'unique. La sc'axuntaybeyic te chapbil-c'op yu'un, ma ba la yich'beyic ta cuenta soc ma ba la spasic spisil bintic pasotic ta mandar yu'un Moisés te a'bat yu'un Jehová.

¹³Ta schanlajunebal (14) ha'bil ya'tel ta ajwalil a te Ezequías, te Senaquerib ajwalil yu'un Asiria la ya'be guerra soc la yich'ticlan spisil te pueblohetic ta Judá te ay sts'ahcul.

¹⁴Ha yu'un te Ezequías ajwalil yu'un Judá la sticombe c'op te ajwalil yu'un Asiria te ay ta Laquis ta hich ora, hich la yalbe: Jtahoj jmul; loc'an ta jtojol, ya jpas spisil bintic yac awa'bon jpas, xchi. Hich te ajwalil yu'un Asiria la sc'ambe taq'uin te Ezequías ajwalil yu'un Judá, ho'lajunwinic (300) talento[14] plata soc lajuneb scha'winic (30) talento[15] oro.

¹⁵Ha yu'un te Ezequías la ya'be spisil te plata la sta ta sna Jehová soc ta yawil c'ulejalil ta sna ajwalil.

¹⁶Ta hich ora te Ezequías la sloq'ues te oro ay ta puertahetic yu'un te templo yu'un Jehová soc smarcohil, te ha nix te Ezequías la spotsticlan ta oro, la ya'be te ajwalil yu'un Asiria.

¹⁷Patil te ajwalil yu'un Asiria la sticon bahel te jtsobaw yu'un soldadohetic, te mach'a muc' ya'tel, te mach'a scuentahinej jc'asesej-copa yu'un, soc bayel soldadohetic ta stojol te ajwalil Ezequías; hahchic bahel ta Laquis, bahtic ta ya'beyel guerra te Jerusalén. C'alal c'ohtic ta Jerusalén la spas scampamentohic ta nopol pasbil be-ha' yu'un te yawil ha' ta toyol, ta sbehlal sq'uinal te sac'ojibal pac'.

¹⁸La sticonic ta iq'uel tal te ajwalil; hich loq'uic tal te Eliaquim snich'an Hilcías te mayordomo yu'un te sna ajwalil, te Sebna te jts'ihbajel, soc Joa snich'an Asaf te secretario.

¹⁹Hich halbotic yu'un te mach'a yich'oj tulan ya'tel: Hich xawalbeyic te Ezequías: Hich ya yal te muc'ul ajwalil yu'un Asiria: ¿Bin smuc'ulinej awo'tan te awich'oj awip a?

²⁰Hich yac awal (pero tojol bin yac awal): Ay bin jnopoj soc ay quip yu'un guerra, xchihat. Pero ¿bin smuc'ulinej awo'tan te atoyoj aba ta jtojol a?

²¹Ya quil te ha smuc'ulinej awo'tan te Egipto, te nahbate'el waq'uem jalal, teme ay mach'a ya yich' yip a, ya x'och ta sc'ab, tamp'as ya sohl a. Hich c'ohem te faraón ajwalil yu'un Egipto ta stojol spisil mach'atic ha smuc'ulinej yo'tanic.

²²Teme hich yac awalbonic: Ha smuc'ulinej co'tancotic te Jehová te Dios cu'uncotic, teme xchihexe, ¿ma bal ha'uc yu'un Dios te toyol awilaletic soc scajtajib ta chiq'uel mahtaniletic te la sjinticlan te Ezequías, soc te hich la yalbe te Judá soc te Jerusalén: Ha nax yac ach'uhuntayic ta stojol ha'i scajtajib mahtanil ini ta Jerusalén, te xchihe?

²³Ta ora ini chapa ac'opic soc te cajwal, ha te ajwalil yu'un Asiria: ho'on ya ca'bat ho'bahc' (2,000) cawuhetic teme ya xhu' awu'un slehel mach'atic ya xmohic a.

²⁴¿Bin ut'il ya xhu' awu'un yac aten suhtel jtuhl capitán te c'ax peq'uel ay ta stojol te a'batetic yu'un te cajwal, aunque ha smuc'ulinej awo'tan te Egipto soc te carretahetic soc te jmoheletic ta cawu yu'une?

²⁵¿Yu'un bal ma ba sticonejon tal li'i te Jehová ta sjinel? Hich la yalbon te Jehová: Mohan bahel ta q'uinal ini yu'un yac ajin, xchi.

²⁶Te Eliaquim snich'an Hilcías, te Sebna soc te Joa hich la yalic ta stojol te mach'a tulan ya'tel: Awocoluc, c'opona ta arameo-c'op te a'batetic awu'un, como ya ca'iycotic. Ma xac'oponotic ta hebreo-c'op te ya ya'iyic te mach'atic ayic ta ba ts'ahc, xchihic.

²⁷Te mach'a tulan ya'tel hich la yal: ¿Yu'un bal ha sticonejon tal te cajwal ta yalel te c'op ini ta atojol soc ta stojol te awajwal, te ma ha'uc ta stojol te winiquetic te ayic ta ba ts'ahc, te ya me slo' stsa'ic soc ya me yuch' schuxic pajal soc te ha'exe? xchi.

²⁸Ha yu'un te mach'a tulan ya'tel la stehc'an sba, tulan c'opoj ta hebreo-c'op: A'iya awa'iyic te bin ya yal te muc'ul ajwalil yu'un Asiria.

²⁹Hich yaloj te ajwalil: Ma me xawac' slo'loyex te Ezequías, como ma xhu' yu'un scoltaybelex ta jc'ab.

³⁰Ma me xya'beyex smuc'ulin awo'tanic te Jehová te Ezequías te hich ya yal: Ta mero melel ya me yac'otic ta libre te Jehová soc ma ba ya yac' te ya x'och ta sc'ab ajwalil yu'un Asiria te pueblo ini, te xchihe.

³¹Ma me xawa'iybeyic sc'op te Ezequías, como hich ya yal te ajwalil yu'un Asiria: Lamaluc me q'uinal ac'a ca'iytic soc loc'anic tal ta jtojol, hich jujutuhlex yac awe'beyic sit te ts'usubil soc te higuera awu'unic, soc yac awuch'ic ya'lel te pozo awu'unique,

³²ha to c'alal ya xtal quiq'uex bahel ta yan q'uinal te pajal soc te awu'unic, ha q'uinal yu'un trigo soc ts'usubiletic, te banti ay pan soc vino, ha q'uinal yu'un oliva, aceite soc chab. Ya xcuxajex, ma ba ya xchamex. Ma me xawa'iybeyic sc'op te Ezequías, como ya slo'loyex te c'alal hich ya yal: Ya me yac'otic ta libre te Jehová, te xchihe.

³³¿Ay bal junuc te diosetic yu'un te nacionetic te la yac' ta libre te sq'uinal ta sc'ab te ajwalil yu'un Asiria?

³⁴¿Banti ay te diosetic yu'un Hamat soc yu'un Arfad? ¿Banti ay te diosetic yu'un Sefarvaim, Hena soc Iva? ¿Hu' bal yu'unic scoltaybel ta jc'ab te Samaria?

³⁵¿Mach'a diosil ta spisil te diosetic yu'un te q'uinaletic ini te hu' scoltaybel loq'uel ta jc'ab? ¿Bin ut'il ya xhu' yu'un te Jehová te ya scoltay loq'uel ta jc'ab te Jerusalén? xchi.

³⁶Mayuc bin la yal te pueblo, mayuc jp'ahluc la sjac'beyic, como yalojix ta mandar te ajwalil: Ma me xajac'beyic, xchi.

³⁷Te mayordomo Eliaquim snich'an Hilcías, te Sebna te jts'ihbajel soc Joa te secretario talic ta stojol Ezequías, sch'i'ojix sc'u'ic a la yalbeyic ya'iy te bin la yal te mach'a tulan ya'tel.