Read Tzeltal 2 Reyes 19 Bible Online

2 Reyes 19 - Tzeltal bible

2 Reyes 19

¹C'alal hich la ya'iy te ajwalil Ezequías, la sch'i' sc'u' yu'un, la slap ch'ixal pac', och bahel ta sna Jehová.

²Soc la sticon bahel ta stojol te jalwanej Isaías snich'an Amoz, te Eliaquim te mayordomo, Sebna te jts'ihbajel soc te mamal sacerdotehetic, slapojic ch'ixal pac' a,

³yu'un hich ya yalbeyic: Hich yaloj te Ezequías: Ha sc'ahc'alel wocol, tulan halel soc q'uexlal, hich te bin ut'il alaletic te yorahilix ya x'ayinic pero mayuquix yip yu'un ya x'ayinic.

⁴Ya wan ya'iy Jehová te Dios awu'un spisil bintic la yal te jtsobaw soldadohetic te ticombil tal yu'un te ajwalil yu'un Asiria ta sbohlc'optayel te cuxul Dios; te yacuc ya'be castigo yu'un te bintic la yal la ya'iy te Jehová te Dios awu'une. Ha yu'un c'opombeya Dios yu'un te mach'atic cuxul hilemic, xchihic.

⁵C'alal c'ohtic te a'batetic yu'un te ajwalil Ezequías ta stojol te Isaías,

⁶hich halbotic yu'un: Hich me xawalbeyic te ajwalil awu'unic: Hich ya yal te Jehová: Ma xiwat yu'un te sc'op te la awa'iy, te la sbohlc'optayon a te a'batetic yu'un te ajwalil yu'un Asiria.

⁷Ilawil, ho'on ya ca'be jun espíritu, ya me ya'iy c'opetic, hich ya suht bahel ta slumal, tey ya cac' lajuc ta espada a, xchi te Jehová, xchi.

⁸Te c'alal suht bahel te mach'a tulan ya'tel, la ya'iy te loq'uemix tal ta Laquis a te ajwalil yu'un Asiria, c'oht sta yac ta ya'beyel guerra te Libna.

⁹Tey la ya'iy a te ajwalil yu'un Asiria te yac ta talel te Tirhaca ajwalil yu'un Etiopía yu'un ya x'a'bot guerra yu'un. Ha yu'un la sticon bahel jal-c'opetic yan buelta ta stojol Ezequías, hich la yal:

¹⁰Hich yac awalbe te Ezequías ajwalil yu'un Judá: Ma me xawac' slo'loyat te Dios awu'un te ha smuc'ulinej awo'tan, te hich ya yal: Ma ba ya x'och ta sc'ab te ajwalil yu'un Asiria te Jerusalén, te xchihe.

¹¹Awa'iyej te bin la spasticlambeyic te q'uinaletic te la slajinlan te ajwaliletic yu'un Asiria. ¿Ya bal xcolat te ha'ate?

¹²¿Yu'un bal te diosetic yu'unic la scoltayic te nacionetic te lajinotic yu'un te tatiletic cu'un, hich te bin ut'il te Gozán, Harán, Resef soc te snich'nab Bet-edén te nahinemic ta Telasar?

¹³¿Banti ayic te ajwaliletic yu'un Hamat, Arfad, yu'un te pueblo Sefarvaim, Hena soc Iva? xchi.

¹⁴Te Ezequías la yich'be te carta ta sc'ab te jal-c'opetic. C'alal laj yilbel a, mo bahel ta sna Jehová, la slehchan ta stojol te Jehová.

¹⁵Hich la yal ta sc'oponel Jehová te Ezequías: Jehová, Dios yu'un Israel, te huculat ta yohlil te querubinetic, ha'at nax Diosat atuquel ta stojol spisil te ajwaliletic ta bahlumilal, ha'at la apas te ch'ulchan soc te bahlumilal.

¹⁶Ts'ehana achiquin, Jehová, a'iya me; jama asit, Jehová, ilawil; a'iybeya te sc'op la sticon tal te Senaquerib ta sbohlc'optayel te cuxul Dios.

¹⁷Melel, Jehová, te ajwaliletic yu'un Asiria la slajinic te nacionetic soc te q'uinaletic yu'unique;

¹⁸la yotsesbeyic ta c'ahc' te diosetic yu'unic, como ma ha'uc diosetic, ha nax te' o ton, ha ya'tel sc'ab winiquetic, ha yu'un te la slajinic.

¹⁹Ta ora ini, Jehová, Dios cu'untic, awocoluc, coltayawotcotic ta sc'abic scuenta yu'un spisil te nacionetic ta bahlumilal ya me sna'ic te ha'at, Jehová, te Diosat atuquel, xchi.

²⁰Te Isaías snich'an Amoz la sticombe ta halbeyel te Ezequías: Hich ya yal te Jehová te Dios yu'un Israel: La jca'iy te bin la ac'ambon ta jtojol yu'un te Senaquerib ajwalil yu'un Asiria.

²¹Hich ay te sc'op Jehová te la yalbe sc'oblal te ajwalil yu'un Asiria: Te ach'ix yu'un Sión, mayuc ac'oblal ya ya'iy soc ya stse'layat. Te ach'ix yu'un Jerusalén, ya sjimulan sjol c'alal ya suhtat bahel.

²²¿Mach'a a te la awixta'c'optay, soc mach'a a te la abohlc'optay? ¿Mach'a a te la atoy ac'op ta scontrahinel, soc te la ahach mohel asit scuenta toybahil? ¡Ha la acontrahin te Ch'ul Dios yu'un Israel!

²³Ta scuenta te jal-c'opetic awu'un la awixta'c'optay te Jehová. Hich la awal: Mohon bahel ta stoyolil te witsetic soc te ipal carretahetic cu'un, ta mero stoyolil te witsetic ta Líbano. La jts'etbe te toyol cedrohetic yu'un, te tsahbil cípresetic yu'une. C'ohon c'alal ta mero namal lugar yu'un ta banti ay c'ax lequil te'etic yu'un.

²⁴La joc' pozohetic ta yantic q'uinaletic, soc la jcuch'be ya'lel. Ta stahn coc la jcac' taquijuc spisil te muc'ul-ha'etic ta Egipto, xchihat.

²⁵¿Ma bal ayuc awa'iyej te ta namey tal la jcac' c'ohtuc ta pasel? Nameyix chapal cu'un, yo'tic la jcaq'uix c'ohtuc ta pasel: Ha'at yac awac' te busajtic ya xhilic pueblohetic joybilic ta ts'ahc.

²⁶Mayuc yipic te mach'atic nahinemic tey a, ya xiwic soc ya xq'uexawic. Hich c'ohtic te bin ut'il ha'mal ta aquiltic, pajalic soc yaxal ac; hich te bin ut'il ha'mal ya xcol ta ba na te ya xcham ta c'ahc'al te ma to stahoj smuc'ul a.

²⁷Jna'oj banti huculat, spisil banti ya xbahat, soc te sc'ahc'al awo'tan ta jtojol.

²⁸Te bin ut'il ilinemat ta jtojol soc te c'ohtix ta jchiquin te atoybahil, ya cotsesbat te argolla cu'un ta ani' soc te freno cu'un ta awe; ya cac'at suhtel tey ta banti behil talat, xchi sc'oblal yu'un te Jehová.

²⁹Ha seña ini te ya xc'oht ta atojol, Ezequías: Ta ha'bil ini yac awe'ic bintic hich nax ya xcol, soc ta schebal ha'bil te bintic hich nax ya xcol. Pero ta yoxebal ha'bil yac ats'unic soc yac ac'ajic, yac ats'un ts'usubiletic soc yac alo'beyic sit.

³⁰Te mach'atic hilemic yu'un Judá, ya me xcha'col slohp'ic ta ye'tal soc ya me scha'ac' sitic ta ahc'ol.

³¹Como ya xloq'uic ta Jerusalén te mach'atic hilemic, soc ta wits Sión te mach'atic ya xcolic. Ha ya sc'ohtes ta pasel ini te xut'et yo'tan te Jehová te scuentahinej spisil.

³²Ha yu'un te Jehová hich ya yalbe sc'oblal te ajwalil yu'un Asiria: Ma ba ya x'och ta pueblo ini, ma ba ya ya'be ya'tejibalul t'ihmalte'; ma ba ya xtal ta stojol soc mahquilal yu'un guerra, ma ba ya sbusambe lum scuenta smohibal sts'ahcul.

³³Te be ta banti tal, tey nix ya suht bahel a; ma ba ya x'och li' ta pueblo ini, xchi te Jehová.

³⁴Ho'on ya jcanantay te pueblo ini, ya me xcol cu'un, ta scuenta sc'uxul jba ta co'tan soc ta scuenta sc'uxul ta co'tan te ca'bat David, xchi.

³⁵Ha nix ta ahc'abal a te loc' ch'ul a'bat yu'un Jehová, baht smilticlan oxeb scha'winic ta pic soc j'ohlil yoxbahc' (185,000) ta tuhl ta campamento yu'un te asiriahetique. C'alal hahchic ta sab, tey ayic a te mach'atic chamenic.

³⁶Ha yu'un te Senaquerib ajwalil yu'un Asiria suht bahel ta Nínive, tey hil a.

³⁷Te c'alal yac ta sch'uhuntayel ta templo yu'un te sdios Nisroc a, te Adramelec soc Sarezer te snich'nab la smilic ta espada soc loq'uic ta ahnel ta sq'uinal Ararat. Ha och ta sjelol ta ajwalil te Esarhadón te snich'ane.