Read Tzeltal 2 Reyes 2 Bible Online

2 Reyes 2 - Tzeltal bible

2 Reyes 2

¹C'alal c'oht yorahil yu'un Jehová te ya yic' bahel ta ch'ulchan te Elías ta sutu-ic', te Elías soc Eliseo loq'uic bahel ta Gilgal.

²Te Elías hich la yalbe te Eliseo: Hilan li'i, yu'un ya sticonon bahel ta Bet-el te Jehová, xchi. ¡Yiloj Jehová, soc cuxulat! ma ba ya quihquitayat, xchi te Eliseo. Hich mohic bahel ta Bet-el.

³Te jchahp jalwanejetic te ayic ta Bet-el loq'uic ta stahel te Eliseo, hich la yalbeyic: ¿Ana'oj bal te yo'tic ya x'ic'otix bahel yu'un Jehová te maestro awu'une? xchihic. Hich, jna'ojix, pero ma me ayuc bin xawalic te ha'exe, xchi te Eliseo.

⁴Te Elías la yalbe xan: Hilan li'i, Eliseo, yu'un ya sticonon ta Jericó te Jehová, xchi. ¡Yiloj Jehová, soc cuxulat! ma ba ya quihquitayat, xchi te Eliseo. Hich bahtic ta Jericó.

⁵Te jchahp jalwanejetic te ayic ta Jericó, loq'uic ta stahel te Eliseo, hich la yalbeyic: ¿Ana'oj bal te yo'tic ya x'ic'otix bahel yu'un Jehová te maestro awu'une? xchihic. Hich, jna'ojix, pero ma me ayuc bin xawalic te ha'exe, xchi te Eliseo.

⁶Te Elías la yalbe: Awocoluc, hilan li'i, yu'un ya sticonon ta muc'ul-ha' Jordán te Jehová, xchi. ¡Yiloj Jehová, soc cuxulat! ma ba ya quihquitayat, xchi te Eliseo. Hich baht schebalic.

⁷Lajuneb yoxwinic (50) jalwanejetic namal la stehc'an sbahic ta stojolic te c'alal schebalic la stehc'an sbahic ta sti'il Jordán.

⁸Te Elías la stsac te smehyil-pac', la spac, la smaj a te ha'e. La sjam sba te ha' ta jujujehch; ta schebalic sohlic bahel ta taquin lum.

⁹Te c'alal sohliquix bahel a, te Elías la yalbe te Eliseo: C'ambon te bin yac ac'an te ya jpasbat ta acuenta, te ma to ba quihquitayejate, xchi. La yal te Eliseo: Awocoluc, ihquitaybon hilel cheb buelta a te espíritu awu'une, xchi.

¹⁰Mero wocol te bin la ac'ane. Teme yac awilon te c'alal ya x'ic'oton bahel, hich me ya xc'oht. Yan teme ma ba yac awilon, ma hichuc ya xc'oht, xchi te Elías.

¹¹Te c'alal yacalic ta bahel soc te yacalic ta c'op a, repente nax chicnaj c'ahc' te hich yilel bin ut'il carreta, soc c'ahc' te hich yilel bin ut'il cawuhetic, te la ya'be spit sbahic. Hich mo bahel ta ch'ulchan te Elías ta sutu-ic'.

¹²C'alal hich la yil te Eliseo hich awon: ¡Tatil cu'un, tatil cu'un! ¡Ha carretahetic yu'un Israel soc jmoheletic ta cawu yu'un! xchi ta aw. Mayuquix bin ora la yil xan te Elías. La stsac sc'u', la sch'i' ta ohlil.

¹³Patil la stambe te smehyil-pac' Elías te hil yu'un, suht bahel, la stehc'an sba ta ti' ha' Jordán.

¹⁴La stsac te smehyil-pac' Elías te hil yu'un, la smaj a te ha'e, hich la yal: ¿Banti ay te Jehová, te Dios yu'un Elías? xchi. C'alal la smaj te ha', la sjam sba ta jujujehch, sohl bahel te Eliseo.

¹⁵C'alal la yilic te jchahp jalwanejetic te ayic ta Jericó, hich la yalic: Te espíritu yu'un Elías hil ta stojol te Eliseo, xchihic. Hich baht stahic tal, la squejan sbahic ta stojol,

¹⁶hich la yalbeyic: Ilawil, li' ay ta yohlil te a'batetic awu'un lajuneb yoxwinic (50) winiquetic te ay yipique. Ac'a bahticuc ta slehel te maestro awu'une; ha wan licot hahchel yu'un te espíritu yu'un Dios soc ac'ot hilel ta ba wits o ta sjuclej, xchihic. Ma'uc, ma me ayuc mach'a yac aticonic bahel, xchi te Eliseo.

¹⁷Pero la sujic ha to c'alal q'uexaw yu'un, hich la yal: Ticonahic bahel, xchi. Ha yu'un la sticonic bahel te lajuneb yoxwinic (50) ta tuhl winiquetic. Oxeb c'ahc'al la slehic te Elías, pero ma ba la stahic.

¹⁸C'alal suhtic tal ta stojol Eliseo te hilem ta Jericó, hich halbotic yu'un: ¿Ma bal lajuc calbeyex te ma me xbahex? xchi sc'oblalic.

¹⁹Te winiquetic yu'un te pueblo hich la yalbeyic te Eliseo: Ilawil, te pueblo ini buen lec, hich te bin ut'il yac yilbel te cajwal, pero ma ba lec te ha' soc mayuc bin ya xcol a te lume, xchihic.

²⁰Ich'bonic tal yach'il vasija soc ac'ahic ats'am tey a, xchi te Eliseo. C'alal la yich'beyic tal

²¹te Eliseo baht te banti ya xloc' tal te ha'etic, la sch'oj ochel tey a te ats'ame, hich la yal: Hich ya yal te Jehová: Ho'on la jlecubtesix te ha'e. Mayuc mach'a ya xchamix yu'un soc ayix bin ya xcol a te lume, xchi.

²²Hich lecub te ha'etic c'alal ora, hich te bin ut'il la yal te Eliseo.

²³Patil te Eliseo baht ta Bet-el. C'alal yac ta mohel bahel ta be a, loc' tal queremetic ta pueblo. Hahch slabanic, hich la yalic: ¡Mohan bahel, t'ax jol! ¡Mohan bahel, t'ax jol! xchihic.

²⁴Te Eliseo la sut sba, la yil soc la sc'ambe chopol c'oblalil ta scuenta sbihil Jehová. Ora loc' talel ta ha'mal cha'coht osohetic te la stuch'ticlanic cheb yoxwinic (42) ta tuhl queremetic.

²⁵Hahch bahel tey a te Eliseo, baht ta wits Carmelo, patil suht bahel ta Samaria.