Read Tzeltal 2 Reyes 21 Bible Online

2 Reyes 21 - Tzeltal bible

2 Reyes 21

¹Te Manasés ay lahchayeb (12) ya'bilal a te c'alal och ta ajwalil; ho'lajuneb yoxwinic (55) ha'bil ay ta ajwalil ta Jerusalén. Hepsiba sbihil te snane.

²Chopol bintic la spas ta stojol Jehová, ha nix hich la spas te bintic ilobtic sba la spasic te nacionetic te ch'ojotic loq'uel yu'un Jehová ta stojol te snich'nab Israel.

³La scha'pas xan te toyol awilaletic te la sjinticlan te Ezequías te state. La spasbe scajtajib ta chiq'uel mahtaniletic te Baal; la spasbe sloc'omba te Asera, hich te bin ut'il la spas te Acab ajwalil yu'un Israel; soc la sch'uhuntay soc la yich'ticlan ta muc' spisil te bintic chican ta ilel ta ch'ulchan.

⁴Soc la spasticlan scajtajib ta chiq'uel mahtaniletic ta sna Jehová te hich yalbeyej sc'oblal te Jehová: Ya cac' jbihil ta Jerusalén, te xchihe.

⁵Soc la spasticlan scajtajib ta chiq'uel mahtaniletic ta cheb yamaq'uil te sna Jehová scuenta sch'uhuntayel spisil bintic ay ta ch'ulchan.

⁶Soc la yac' ta chiq'uel te snich'an; la spasbe seña ta ilel soc j'ac'-chamel, la sc'oponlan te mach'a ya sc'opon ch'uhlelaletic soc te j'ilojel. Hich p'ohl yu'un te bin chopol ta stojol Jehová te la shachbe yilimba a.

⁷Soc la yotses ta sna Jehová te sloc'omba Asera te pasbil yu'un, te hich halbotic yu'un Jehová te David soc te Salomón te snich'an: Ho'on ya cac' te jbihil spisil ora ta na ini, ta Jerusalén te tsahbil cu'un ta yohlil spisil ta chahp Israel.

⁸Ma ba ya cac' xan loc'uc te Israel tey ta q'uinal la jca'be te sme'static teme ya sch'uhunic spasel spisil bintic la jcalbe ta mandar, ha spisil te mandariletic te pasotic ta mandar yu'un te ca'bat Moisés, te xchihe.

⁹Pero ma ba la yich'ic ta cuenta. Te Manasés la yac' te c'ax hich la spasic bintic chopol a te bin ut'il te yantic nacionetic lajinotic yu'un Jehová ta stojol te snich'nab Israel.

¹⁰Ha yu'un te Jehová c'opoj ta scuenta te a'batetic yu'un, ha te jalwanejetic, hich la yal:

¹¹Ta scuenta bin ut'il te Manasés la spasticlan te bintic ilobtic sba soc te c'ax hich chopol bintic la spas a te bin ut'il te amorreohetic te nahil ayic yu'un, soc te la ya'be sta smulic te Judá ta scuenta te loc'ombahetic yu'une,

¹²ha yu'un hich yaloj te Jehová te Dios yu'un Israel: Ilawil, ya cac' taluc wocol ta stojol Jerusalén soc ta stojol Judá te ya me xc'opoj schiquin yu'un te mach'a ya ya'iye.

¹³Te bin la jp'is a te Samaria, ha nix ya jp'is te Jerusalén, soc ya ca'be te plomo te la jp'is a te mach'atic ay yu'un Acab. Ya jpoc te Jerusalén hich te bin ut'il ya yich' poquel jun plato te ya yich' cusel soc nujanel.

¹⁴Ya jpihtes te jayeb xan ya xhil cu'un soc ya cac' ta sc'ab scontra; ya yich' tsaquel soc ya xpojbot sbiluquic yu'un,

¹⁵ta scaj te bin chopol spasojic ta jtojol soc te la shachesbon quilimba, c'alal loq'uic tal ta Egipto te sme'static ha to c'alal ora, xchi te Jehová.

¹⁶Soc ha nix hich te Manasés bayel la smalbe sch'ich'el te mach'atic mayuc smulic, la yac' nojuc ta ch'ich' te Jerusalén ta jehch ta jehch; soc nix te muliletic te la ya'be sta te Judá, te hich la spasic bintic chopol ta stojol Jehová.

¹⁷Te bintic xan sc'oblal te ya'tel Manasés, spisil te bintic spasoj soc te mulil la spas, spisil ts'ihbabil ta libro yu'un te ya'tel ajwaliletic yu'un Judá.

¹⁸Cham te Manasés, baht sjoquin ta muquenal te chawinic sme'stat, la yich' muquel ta ts'umbil nichimaltic ta sna, ha te ts'umbil yu'un Uza. Ha och ta sjelol ta ajwalil te Amón te snich'ane.

¹⁹Te Amón ay cheb scha'winic (22) ya'bilal a te och ta ajwalil; cheb ha'bil ay ta ajwalil ta Jerusalén. Mesulemet sbihil te snane, ha yantsil-nich'an Hazur te talem ta Jotba.

²⁰Chopol bintic la spas ta stojol Jehová, hich te bin ut'il Manasés te state.

²¹Ha nix la st'umbe te behetic yu'un te state. La sch'uhuntay soc la yac' sba ta a'batinel ta stojol te loc'ombahetic te yac'oj sba ta a'batinel yu'unic te state.

²²Hich la yihquitay te Jehová te Dios yu'un te sme'stat, ma ba la st'un te behetic yu'un te Jehová.

²³Te a'batetic yu'un te Amón la schap sc'opic ta smilel, hich la smilic ta sna te ajwalil.

²⁴Hich te ants-winiquetic yu'un te q'uinal la smilic spisil te mach'atic la schap sc'opic ta smilel te ajwalil Amón. La yotsesic ta sjelol ta ajwalil te Josías te snich'ane.

²⁵Te bintic xan sc'oblal te ya'tel Amón soc te bintic la spas, ts'ihbabil ta libro yu'un te ya'tel ajwaliletic yu'un Judá.

²⁶La yich' muquel ta muquenal ta ts'umbil nichimaltic yu'un Uza. Ha och ta sjelol ta ajwalil te Josías te snich'ane.