Read Tzeltal 2 Reyes 22 Bible Online

2 Reyes 22 - Tzeltal bible

2 Reyes 22

¹Te Josías waxaqueb ya'bilal a te och ta ajwalil; bulucheb scha'winic (31) ha'bil ay ta ajwalil ta Jerusalén. Jedida sbihil te snane, ha yantsil-nich'an Adaía te talem ta Boscat.

²La spas te bin lec ta stojol Jehová, la st'umbe spisil te be yu'un David te stat, ma ba howiy ta wa'el o ta q'uexam.

³Ta swaxaclajunebal (18) ha'bil yochel ta ajwalil a te Josías, la sticon bahel ta sna Jehová te Safán snich'an Azalía, snich'an Mesulam, te secretario, hich la yalbe:

⁴Bahan ta stojol te muc'ul sacerdote Hilcías, halbeya te ac'a stsob te taq'uin ich'bil tal ta sna Jehová, ha te la stsobeyic te ants-winiquetic te jcanan-ochibaletique.

⁵Ac'a ya'beyic ta sc'abic te mach'atic ay ta scuentahic te a'tel ta sna Jehová, scuenta yu'un ya stojic a te mach'atic yacalic ta a'tel ta schahpanel te banti jihnem te sna Jehová,

⁶ha te carpinterohetic, maestrohetic yu'un a'tel soc te albañiletic, yu'un ya smanic te'etic soc walubil tonetic a yu'un ya yich' xan chahpanel a te Nahe.

⁷Soc ma me sc'ambeyic banti laj te taq'uin a'botic ta sc'abic, como toj yo'tanic yac spaselic te a'tel, xchi.

⁸Te muc'ul sacerdote Hilcías la yalbe te secretario Safán: La jta ta sna Jehová te libro yu'un te Ley, xchi. La ya'be te Safán, ha la yil te libro.

⁹Patil te Safán tal ta stojol te ajwalil, hich c'oht yalbe: Te a'batetic awu'un la stsobiquix te taq'uin te la yich' tahel ta templo, la ya'beyiquix ta sc'abic te mach'atic scuentahinejic schahpanel xan te sna Jehová, xchi.

¹⁰Soc te secretario Safán hich la yalbe xan te ajwalil: La ya'bon jun libro te muc'ul sacerdote Hilcías, xchi. Te Safán la yil te libro ta stojol te ajwalil.

¹¹C'alal la ya'iy te ajwalil te bin ya yal te libro yu'un te Ley, la sch'i' sc'u' yu'un.

¹²Hich la spas ta mandar te Hilcías, Ahicam snich'an Safán, Acbor snich'an Micaías, Safán te secretario, soc Asaías te a'bat yu'un te ajwalil:

¹³Bahan, joc'obeyahic te Jehová ta jcuenta soc ta scuenta spisil Judá sc'oblal bin ya yal te libro ini te la yich' tahel, como muc' te yilimba Jehová te tihlem ta jtojoltic ta scaj te ma ba la yich'ic ta cuenta te jme'jtatic te bin ya yal te libro ini, ma hichuc la spasic te bin ut'il ts'ihbabil tey a, xchi.

¹⁴Ha yu'un te sacerdote Hilcías, Ahicam, Acbor, Safán soc Asaías baht sc'oponic te jalwanej-ants Hulda te yihnam Salum, snich'an Ticva, smam Harhas, te jcanan-c'u'uletic, te nahinem ta Schebal Barrio ta Jerusalén.

¹⁵Hich halbotic yu'un: Hich yaloj te Jehová te Dios yu'un Israel: Halbeya te winic te la sticonex tal ta jtojol:

¹⁶Hich ya yal te Jehová: Ya cac' taluc ta stojol te lugar ini soc ta stojol te mach'atic nahinemic tey a spisil te wocol te ya yal te libro ini, te la yilix te ajwalil yu'un Judá,

¹⁷ta scaj te la yihquitayonic, la schic'beyic pom yantic diosetic, la yaq'uic ilinuc co'tan yu'un spisil bintic la spasic. Tihlemix quilimba ta stojol te lugar ini, ma ba ya xtup'.

¹⁸Pero hich me xawalbeyic te ajwalil yu'un Judá te la sticonex tal ta sjoc'obeyel te Jehová: Hich ya yal te Jehová te Dios yu'un Israel: Te bin ut'il la awich' ta cuenta te bintic ya yal ta libro ini

¹⁹soc te la stijbat awo'tan yu'un soc la apehc'an aba ta stojol Jehová te c'alal la awa'iy te bin la jcal ta scontrahinel te lugar ini soc te mach'atic nahinemic tey a, ha te ya xtal tulan wocol ta stojolic soc c'ax bohloben sc'oblalic ya xc'ohtic, soc te la ach'i'ticlan ac'u' soc oc'at ta jtojol, la jca'iybat te ac'ope, xchi te Jehová.

²⁰Ha yu'un ya cac' te yac ajoquin te chawinic ame'atat,[16] lamal q'uinal yac awich' muquel; ma ba yac awil junuc te wocol ya cac' ta stojol te lugar ini, xchi. Hich la yalbeyic ya'iy te ajwalil te suhtib te c'ope.