Read Tzeltal 2 Reyes 23 Bible Online

2 Reyes 23 - Tzeltal bible

2 Reyes 23

¹Ha yu'un te ajwalil la sticonlan ta iq'uel tal spisil te mamaletic ta Judá soc ta Jerusalén.

²Patil te ajwalil mo bahel ta sna Jehová soc spisil te winiquetic yu'un Judá soc te mach'atic nahinemic ta Jerusalén, te sacerdotehetic, jalwanejetic soc spisil te pueblo, muc' biq'uitetic. Tey c'ohtic ta ilbeyel ya'iyic a spisil te bintic ya yal te libro yu'un te chapbil-c'op te tahot ta sna Jehová.

³Te ajwalil la stehc'an sba ta sts'ehl te toyol bahlal oy, la yach'ubtes te chapbil-c'op ta stojol Jehová, ha te ya me st'unic te Jehová soc ya sch'uhumbeyic te mandariletic, testigo-c'op soc te chapbil mandariletic yu'un ta spisil yo'tanic soc ta spisil sch'uhlelic, soc te ya sc'ohtesic ta pasel te chapbil-c'op te ts'ihbabil ta libro. Spisil te pueblo la yalic ta jamal te ya sch'uhunic spasel te chapbil-c'op.

⁴Te ajwalil la spas ta mandar te muc'ul sacerdote Hilcías, te scha'chahpal sacerdotehetic, soc te jcanan-ochibaletic te ya me sloq'uesic ta templo yu'un Jehová spisil te bintic la yich' tuhunel ta stojol Baal, Asera soc spisil te bintic ayic ta ch'ulchan. La schic'ticlan ta fuera yu'un Jerusalén ta aquiltic ta sjuclej Cedrón, soc la ya'be yich' bahel te stanul ta Bet-el.

⁵La sloq'ueslan te sacerdotehetic te otsesbilic yu'un te ajwaliletic yu'un Judá yu'un ya schiq'uic pom ta toyol awilaletic ta pueblohetic yu'un Judá soc ta sjoyobal te Jerusalén; soc ha nix hich te mach'atic la schic'beyic pom te Baal, te c'ahc'al, u, planetahetic, soc spisil bintic ayic ta ch'ulchan.

⁶Soc la sloq'uesbe te sloc'omba Asera ta sna Jehová, la schic' ta fuera ta Jerusalén, ta sjuclej Cedrón, la sutp'in ta tan, la slihlin ta sba te muquenaletic yu'un te yajwal te pueblohe.

⁷Soc la sjinticlan te banti la spasbe sbahic mulil te winiquetic ta sna Jehová, ta banti la sjalic paq'uetic yu'un Asera te antsetique.

⁸La yic' tal spisil te sacerdotehetic ta pueblohetic yu'un Judá soc la sbohlobtesbe sc'oblal te toyol awilaletic c'alal ta Geba ha to ta Beerseba, te banti la schiq'uic pom te sacerdotehetique. La sjinticlan te scajtajib ta chiq'uel mahtaniletic yu'un yantic diosetic te ayic ta ochibal yu'un Josué te gobernador yu'un te pueblo, te ay ta q'uexam yu'un te yochibal te pueblo.

⁹Te sacerdotehetic yu'un te toyol awilaletic, aunque ma ba mohic bahel ta scajtajib ta chiq'uel mahtanil yu'un Jehová ta Jerusalén, la swe'ic te pan ma ba yich'oj levadura soc te smohloltac ta sacerdotehile.

¹⁰Soc la sbohlobtesbe sc'oblal te Tofet te ay ta sjuclej yu'un Ben-hinom, scuenta yu'un mayuquix mach'a ya schic' te squerem o yantsil-nich'an ta stojol te Moloc.

¹¹Ha nix la sloq'ues te cawuhetic a'botic yu'un te ajwaliletic yu'un Judá scuenta yich'el ta muc' te c'ahc'al ta yochibal te templo yu'un Jehová, te slac'oj sba soc te jtsahl-na yu'un te Natán-melec te eunuco-winic, soc la schic' te carretahetic te ayic ta scuenta te c'ahc'ale.

¹²Soc te ajwalil la sjin te scajtajib ta chiq'uel mahtaniletic te la spasic te ajwaliletic yu'un Judá ta stoyolil stsalul na yu'un Acaz; soc te scajtajib ta chiq'uel mahtaniletic te la spas Manasés ta schebal te amaq'uiletic ta sna Jehová, la swuyticlan soc la sch'oj ochel ta sjuclej Cedrón te sts'ubile.

¹³Te ajwalil ha nix hich la sbohlobtesbe sc'oblal te toyol awilaletic te ayic ta stojol sloq'uib c'ahc'al yu'un Jerusalén, ta stojol sur yu'un te Wits yu'un Jinel,[17] te la yich' pasel yu'un te Salomón ajwalil yu'un Israel ta stojol Astoret te loc'omba yu'un te sidoniohetic te ilobtic sba, soc te Quemos te loc'omba yu'un Moab, soc te Milcom te loc'omba yu'un te snich'nab Amón te ilobtic sba.

¹⁴La swuyticlan te ch'ul tonetic, la sjinticlan te loc'ombahetic yu'un Asera, la snojeslan ta sbaquel ants-winiquetic te lugar yu'unique.

¹⁵Ha nix hich te scajtajib ta chiq'uel mahtanil ta Bet-el soc te lugartic spasoj te Jeroboam snich'an Nabat, te la ya'be sta smul a te Israel, la schic', la sutp'in ta tan soc la ya'be sc'ahc'al te sloc'omba Asera.

¹⁶Te Josías, c'alal la suht sba yil te muquenaletic te tey nix ayic ta tut wits, la sticon ta loq'ueslanel te baquetic te ayic ta muquenaletic, la schic'ticlan ta sba te scajtajib ta chiq'uel mahtanil yu'un ya sbohlobtesbe sc'oblal, hich te bin ut'il te sc'op Jehová te yal te winic yu'un Dios te ya xc'oht ta pasele.

¹⁷Te ajwalil la sjoc'oy: ¿Mach'a smuquenal te ya quile? xchi. Te mach'atic yu'un te pueblo la yalbeyic: Ha smuquenal te winic yu'un Dios te talem ta Judá te la yalbe sc'oblal te bintic la apasix ta stojol te scajtajib ta chiq'uel mahtanil yu'un Bet-el, xchihic.

¹⁸Hich la yal te ajwalil: Hiluc; ma me ayuc mach'a ya stijbe sbaquel, xchi. Hich stalel hil te sbaquel soc te sbaquel te jalwanej te talem ta Samaria.

¹⁹Te Josías ha nix hich la sloq'ues spisil te nahetic yu'un te toyol awilaletic te ayic ta Samaria, te la yich'ic pasel yu'un te ajwaliletic yu'un Israel, te hich la shachbeyic yilimba a te Jehová, la spasticlambe hich te bin ut'il la spas ta Bet-el.

²⁰Soc la smilticlan ta sba te scajtajib ta chiq'uel mahtaniletic spisil te sacerdotehetic yu'un te toyol awilaletic te tey ayic a. La schic'ticlambe sbaquel ants-winiquetic ta sba. Patil suht bahel ta Jerusalén.

²¹Te ajwalil hich la spas ta mandar spisil te pueblo: Pasahic te Q'uin Pascua yu'un Jehová te Dios awu'unic, hich te bin ut'il ts'ihbabil ta libro yu'un te chapbil-c'op ini, xchi.

²²Mayuc hich yich'oj pasel a te Q'uin Pascua ha to c'alal cuentahimbil yu'un te juecetic te Israel soc spisil te yorahil te ajwaliletic yu'un Israel soc Judá.

²³Ta swaxaclajunebal (18) ha'bil yochel ta ajwalil a te Josías la yich' pasel te Q'uin Pascua yu'un Jehová ta Jerusalén.

²⁴Te Josías jc'axel la sloq'ueslan te jna'ojeletic, j'ac'-chameletic soc te loc'ombahetic ta nahetic, soc spisil bintic ilobtic sba ta ilel ta Judá soc ta Jerusalén. Hich la spas scuenta yu'un hich ya xc'oht ta pasel a te bin ya yal te Ley te ts'ihbabil ta libro la sta te sacerdote Hilcías ta sna Jehová.

²⁵Mayuc yan ajwalil ta nahil o ta patil yu'un te hich la suhtes yo'tan ta stojol Jehová ta spisil yo'tan, ta spisil sch'uhlel soc ta spisil yip, hich te bin ut'il ya yal spisil te ley yu'un Moisés.

²⁶Aunque hich la spas, te Jehová ma ba laj te smuc'ul yilimba te tihlem ta stojol Judá ta scaj spisil bintic la spas te Manasés te la yac' ilinuc yu'une.

²⁷Hich la yal te Jehová: Ya jloq'ues ta jtojol te Judá, hich te bin ut'il la jloq'ues te Israel, soc ya jp'aj te Jerusalén te tsahbil cu'un soc te templo te hich la jcalbe sc'oblal: Tey ya xc'oht a te jbihile, xchi.

²⁸Te bintic xan sc'oblal te ya'tel Josías soc spisil bintic la spas, ts'ihbabil ta libro yu'un te ya'tel ajwaliletic yu'un Judá.

²⁹Ta hich ora te faraón Necao ajwalil yu'un Egipto mo bahel ta muc'ul-ha' Éufrates ta ya'beyel guerra te ajwalil yu'un Asiria. Te ajwalil Josías loc' tal ta a'beyel guerra; pero te Necao, c'alal la yil te Josías, la smil ta Meguido.

³⁰Te a'batetic yu'un Josías la ya'beyic ta carreta te schamen baq'uet, la yich'beyic hahchel ta Meguido c'alal ta Jerusalén, tey la smuquic ta smuquenal a. Te pueblo la yiq'uic te Joacaz snich'an Josías, la smalbeyic ta aceite, la yotsesic ta ajwalil scuenta sjelol te state.

³¹Te Joacaz ay oxeb scha'winic (23) ya'bilal a te och ta ajwalil; oxeb u ay ta ajwalil ta Jerusalén. Hamutal sbihil te snane, yantsil-nich'an Jeremías te talem ta Libna.

³²Chopol bin la spas ta stojol Jehová, hich te bin ut'il la spas te sme'state.

³³Te faraón Necao la yotses ta cárcel te Joacaz ta Ribla ta sq'uinal Hamat scuenta yu'un hich ma x'a'tej ta ajwalil ta Jerusalén a. Soc te Necao la ya'be stoj Judá ho'winic (100) talento[18] plata soc jun talento[19] oro.

³⁴Te faraón Necao la yotses ta ajwalil te Eliaquim snich'an Josías scuenta sjelol te state. La sjelbe sbihil, Joacim c'oht yu'un. La yic' bahel te Joacaz ta Egipto, tey cham a.

³⁵Te Joacim la ya'be Necao te plata soc oro te la sc'ane. Pero la sc'an ya ya'be stoj spatanic te yajwal te q'uinal scuenta yu'un ya yich' tsobel te taq'uin te c'ambot yu'un faraón; la yich'be te plata soc oro yu'un te ants-winiquetic ha chican bin smuc'ul te sq'uinal, yu'un ya ya'be te faraón Necao.

³⁶Te Joacim ay ho'eb scha'winic (25) ya'bilal a te och ta ajwalil; bulucheb (11) ha'bil ay ta ajwalil ta Jerusalén. Zebuda sbihil te snane, yantsil-nich'an Pedaías te talem ta Ruma.

³⁷Chopol bin la spas ta stojol Jehová, hich te bin ut'il la spas te sme'state.