Read Tzeltal 2 Reyes 24 Bible Online

2 Reyes 24 - Tzeltal bible

2 Reyes 24

¹Te c'alal ay ta ajwalil a te Joacim, te Nabucodonosor ajwalil yu'un Babilonia tal yochintay te q'uinale. Te Joacim ha a'bat c'oht yu'un oxeb ha'bil, patil la stoy sba ta scontrahinel.

²Te Jehová la sticon bahel ta scontrahinel te Joacim te caldeohetic, siriahetic, moabetic soc amonetic. La sticonlan ta scontrahinel Judá yu'un ya slajinic, hich te bin ut'il yaloj te Jehová ta scuenta te jalwanejetic te a'batetic yu'une.

³Hich me c'oht ta pasel ta stojol Judá ta scuenta smandar te Jehová, scuenta yu'un ya sloq'ues ta stojol, ta scaj spisil te muliletic la spas te Manasés

⁴soc ta scaj te la smalbe sch'ich'el te mach'a mayuc smul, ha noj ta ch'ich' te Jerusalén. Ha yu'un te Jehová ma ba la sc'an la spasbe perdón.

⁵Te bintic xan sc'oblal te ya'tel Joacim soc spisil te bintic spasoj, ts'ihbabil ta libro yu'un te ya'tel te ajwaliletic yu'un Judá.

⁶Cham te Joacim, baht sjoquin ta muquenal te chawinic sme'stat, ha och ta sjelol ta ajwalil te Joaquín te snich'ane.

⁷Te ajwalil yu'un Egipto mayuc bin ora te loq'uix bahel ta sq'uinal como te ajwalil yu'un Babilonia la yich'be spisil te sq'uinal c'alal ta uc'um yu'un Egipto ha to ta muc'ul-ha' Éufrates.

⁸Te Joaquín ay waxaclajuneb (18) ya'bilal a te och ta ajwalil, oxeb u ay ta ajwalil ta Jerusalén. Nehusta sbihil te snane, yantsil-nich'an Elnatán te talem ta Jerusalén.

⁹Chopol bin la spas ta stojol Jehová, hich te bin ut'il la spas te sme'state.

¹⁰Ha yorahil a te soldadohetic yu'un Nabucodonosor ajwalil yu'un Babilonia mohic bahel ta ya'beyel guerra te Jerusalén, la yich' joytayel.

¹¹Te c'alal joytaybilix yu'unic a, tal te Nabucodonosor ajwalil yu'un Babilonia.

¹²Te Joaquín ajwalil yu'un Judá, te snan, te a'batetic yu'un, te príncipaletic soc te mach'atic ay ya'telic yu'un, la yac' sbahic ta sc'ab te ajwalil yu'un Babilonia. Ta swaxaquebal ha'bil yochel ta ajwalil a chucot bahel yu'un te ajwalil yu'un Babilonia.

¹³Te Nabucodonosor la sloq'ues spisil te c'ulejalil ta sna Jehová soc ta sna ajwalil, hich te bin ut'il la yal te Jehová, soc la swuyticlan spisil te biluquetic pasticlambil ta oro te ay ta sna Jehová te pasticlambil yu'un Salomón ajwalil yu'un Israel.

¹⁴La yic'ticlan bahel ta chuquel spisil mach'atic ayic ta Jerusalén: spisil te príncipaletic soc spisil te winiquetic te ay yipic, spisil te mach'atic ay bintic ya sna'ic spasel soc herrerohetic, ha jpic soc ho'bahc' (10,000) ta tuhl ta spisilic. Mayuc mach'a hil, ha xanix hilic te mach'atic pobrehetic ta q'uinal.

¹⁵Ha nix hich la yic' bahel ta chuquel ta Babilonia te Joaquín, te snan, te antsetic yu'un, te mach'atic ay ya'telic yu'un soc te mach'atic ay yipic ta q'uinal.

¹⁶Ta spisil te winiquetic yu'un guerra, j'ohlil swaxaclajunbahc' (7,000) ta tuhl la yic' bahel te ajwalil yu'un Babilonia, soc j'ohlil yoxbahc' (1,000) ta tuhl te mach'atic ay bintic ya sna'ic spasel soc te herrerohetic, spisil winiquetic te ay yipic ta yaq'uel guerra, chucotic bahel yu'un te ajwalil yu'un Babilonia.

¹⁷Ha la yotses ta sjelol ta ajwalil te Joaquín te Matanías te stajun. La sjelbe sbihil, Sedequías c'oht yu'un.

¹⁸Te Sedequías ay jun scha'winic (21) ya'bilal a te c'alal och ta ajwalil; buhlucheb (11) ha'bil ay ta ajwalil ta Jerusalén. Hamutal sbihil te snane, ha yantsil-nich'an Jeremías te talem ta Libna.

¹⁹Chopol bin la spas ta stojol Jehová, hich te bin ut'il la spas te Joacim.

²⁰Ha yu'un te Jehová ilin ta stojol Jerusalén soc ta stojol Judá, ha to c'alal la sch'ojticlan loq'uel ta stojol. Patil te Sedequías la stoy sba ta scontrahinel te ajwalil yu'un Babilonia.