Read Tzeltal 2 Reyes 4 Bible Online

2 Reyes 4 - Tzeltal bible

2 Reyes 4

¹Ay jtuhl me'ba' ants te ha yihnam jtuhl winic yu'un te jchahp jalwanejetic, hich la yalbe wocol te Eliseo: Te a'bat awu'un, ha te jmamalal, chamix; ana'oj te xi'oj te Jehová. Yo'tic talix te jc'an-betil yu'un ya yic'bon bahel smosohin te cheb calatac, xchi.

²Joc'obot yu'un te Eliseo: ¿Bin ya xhu' ya jpasbat? Halbon ca'iy bin ay awu'un ta ana, xchi sc'oblal. Te a'bat awu'un mayuc bin ay ta jna, ha nax jun vasija aceite, xchi.

³La yal te Eliseo: Bahan, majambeya svasija spisil apat-axuhc, bayel jochol vasijahetic.

⁴Ochan, maca aba ta ana soc te awalatac, nojesa ta aceite spisil te vasijahetic, parte yac awac'ticlan te nojemique, xchi sc'oblal.

⁵Hich baht te ants, la smac sba ta na soc te yalatac. Ha'ic la yich'beyic tal te vasijahetic, hich te ants la snojeslan ta aceite.

⁶C'alal noj spisil te vasijahetic, la yalbe te jtuhl yal: Ich'bon tal yan vasija, xchi. Mayuquix yan, xchi te quereme. Hich quehchaj te aceite.

⁷Hich te ants baht yalbe te winic yu'un Dios bin c'oht ta pasel, hich halbot yu'un: Bahan, chona te aceite, toja a te abete. Te jayeb xan ya xhil, ha ya xcuxajat a soc te awalatac, xchi sc'oblal.

⁸Ay jun c'ahc'al c'ax ta Sunem te Eliseo. Ay jtuhl ants tey a te ich'bil ta muc', te bayel buelta la yic' te Eliseo yu'un yacuc xc'ax ta we'el. Ha yu'un te jujun buelta ya xc'ax tey a te Eliseo ya x'och ta we'el ta sna.

⁹Te ants hich la yalbe te smamalal: Ya jna' te ha ch'ul winic yu'un Dios te mach'a spisil ora ya xc'ax ta jnatic.

¹⁰Awocoluc, jpasbetic stut cuarto ta scha'cajal jnatic. Ya ca'betic junuc wayibal, mesa, silla soc scajtajib c'ahc', scuenta yu'un te c'alal ya xc'ax te banti ayotic, tey ya xhul a, xchi.

¹¹Ay jun c'ahc'al hul tey a te Eliseo, c'oht ta scuarto, tey way a.

¹²Hich la yalbe te Giezi te a'bat yu'une: Ic'a tal te sunem-ants, xchi. Hich la yic' talel, c'alal hul stehc'an sba ta stojol,

¹³te Eliseo la yalbe te ya'bat: Halbeya: La awac' ta ilel te ay ta awo'tan te yac awa'botcotic spisil bintic ya xtuhun cu'uncotic. ¿Bin yac ac'an ya jpasbat ha'at? ¿Ya bal ac'an ya jc'opombat te ajwalil o te jtsobaw yu'un soldadohetic? xchi. Ya xnahinon ta yohlil te jlumal, xchi te antse.

¹⁴¿Bin ya xhu' ya jpasbetic te antse? xchi te Eliseo. La sjac' te Giezi: Mayuc yal, soc mamalix te smamalal, xchi.

¹⁵Ic'a tal, xchi te Eliseo. Hich te a'bat baht yic' tal, c'oht stehc'an sba ta ti'nahil te antse.

¹⁶Te Eliseo hich la yalbe: Ta yan ha'bil, ta hich ora, ya me apet awal, xchi. La sjac' te ants: Ma'uc, cajwal, winicat yu'un Dios, ma me xatse'lay te a'bat awu'une, xchi.

¹⁷Pero hahch yal te ants, ayin yal ta yan ha'bil, ha nix ta yorahil te halbot yu'un te Eliseo.

¹⁸Muc'ub te alale. Pero jun buelta loc' bahel ta yilel te stat te sjoquinej te jc'ajojetique.

¹⁹Hahch yawtay te stat: ¡Ay, ha'i joli! ¡Ha'i joli! xchi. Te stat la yalbe te ya'bat: Ic'a bahel ta banti ay snan, xchi.

²⁰Hich te a'bat la yic' bahel ta banti ay snan; te alal huhcaj ta sjol yacan te snan ha to c'alal ta ohlil c'ahc'al; tey cham a.

²¹Ha yu'un te ants la yich'be mohel te schamen baq'uet, la yac' ta swayib te winic yu'un Dios, la smac hilel te puerta, loc' bahel.

²²La yic' tal te smamalal, hich la yalbe: Awocoluc, ac'a sjoquinon bahel jtuhl a'bat soc jcoht me' burra, yu'un ya xbohon tal ta ahnimal ta ban ay te winic yu'un Dios, xchi.

²³La yal te smamalal: ¿Bin yu'un ya xbaht awil yo'tic? Ma yorahiluc yach'il u o sc'ahc'alel cux-o'tanil, xchi. Ma xamel awo'tan, xchi te antse.

²⁴La yac' ta chahpanel te me' burra, soc la yalbe te a'bat: Conic, ic'a bahel. Ma me xawac' xhalajon ta be, ha to teme ya calbat, xchi.

²⁵Hich baht te ants ta banti ay te winic yu'un Dios ta wits Carmelo. Te winic yu'un Dios, c'alal la yil ta namal te ants, hich la yalbe te Giezi te a'bat yu'une: Yac ta talel te sunem-ants.

²⁶Bahan ta ahnimal ta stahel tal soc joc'obeya: ¿Lec bal ayat? ¿Lec bal ay te amamalal soc te awale? xchi. Lec ay, xchi te ants ta stojol te a'bat.

²⁷C'alal c'oht te banti ay te winic yu'un Dios ta wits, la spetbe yoc. Nohpoj tal te Giezi, c'an sjits loq'uel, pero te winic yu'un Dios la yal: Ihquitaya, como ay ta wocol ta mel-o'tan. Te Jehová smucoj, ma ba ya'beyejon jna' bin scuentahil, xchi.

²⁸Hich la yal te antse: ¿Ho'on bal la jc'ambat cal, cajwal? ¿Ma bal lajuc calbat te ma me xatse'layon? te xchihone, xchi.

²⁹Te Eliseo hich la yalbe te Giezi: Chuca ach'uht, ich'a te jnahbate', bahan me. Teme ay mach'a yac ata ta be, ma me xapatbe yo'tan; teme ay mach'a ya spatbat awo'tan, ma me xajac'be. Cajambeya ta yelaw te alal te jnahbate', xchi.

³⁰Hich la yal te snan te alale: ¡Yiloj Jehová, soc cuxulat! ma ba ya quihquitayat, xchi. Hich hahch te Eliseo, la st'un bahel te antse.

³¹Te Giezi nahilij bahel yu'unic soc la scajambe ta yelaw te alal te nahbate'el, pero te alal ma ba c'opoj, ma ba chican seña te cuxul. Ha yu'un te Giezi baht sta tal te Eliseo, hich c'oht yalbe: Ma ba cux yo'tan te alale, xchi.

³²C'alal c'oht ta na te Eliseo, te alal chamenix a soc xach'al ta swayib.

³³Hich och bahel te Eliseo, la smac te puerta ta stojol te Giezi soc te ants, la sc'opon te Jehová.

³⁴Patil mo ta wayibal, la spahcan sba ta sba te alal, tey la yac' ye a ta banti ye, soc tey la yac' sit a ta banti sit, soc tey la yac' sc'ab a ta banti sc'ab te alale. C'alal la spahcan sba ta sba, hahch ta q'uixnajel te sbaq'uetal te alale.

³⁵Te Eliseo hahch, och ta comcom behel tey ta yutil cuarto, patil cha'mo xan ta wayibal, c'oht scha'pahcan xan sba ta sba te alale. A'bot ha'tsiham huqueb buelta, wihc' sit te alale.

³⁶Te Eliseo la yic' tal te Giezi, hich la yalbe: Ic'a tal te sunem-ants, xchi. Hich la yic' talel. C'alal och talel te sunem-ants, hich halbot yu'un te Eliseo: Ic'a te awale, xchi.

³⁷Och tal te ants, la squejan sba ta ye'tal yoc te Eliseo. Patil la stsac te yal, loc' bahel.

³⁸Te Eliseo suht bahel ta Gilgal ta yorahil bayel wi'nal ta q'uinal. C'alal joquimbil yu'un te jchahp jalwanejetic, la yalbe te a'bat yu'un: Otsesa ta c'ahc' te muc'ul oxom, chahpambeya swe'elic te jchahp jalwanejetic, xchi.

³⁹Loc' bahel jtuhl ta ha'maltic ta slehel itaj. La sta jpeht ha'mal ch'ox, la stulbe sit, pajal soc ch'um yilel, la schuy bahel ta smehyil. C'alal suht tal, c'oht sesen ochel ta oxom, pero ma ba la sna' bin a.

⁴⁰Patil la ya'be swe' te winiquetique. C'alal ochic ta swe'el te we'elil, hahchic ta aw: ¡Winic yu'un Dios, ay lajel ta oxom! xchihic. Ma ba hu' swe'belic.

⁴¹Ich'bonic tal harina, xchi te Eliseo. La yotses ta oxom, hich la yal: A'beya swe'ic, xchi. Mayuquix bin chopol hil ta oxom.

⁴²Patil tal jtuhl winic te talem ta Baal-salisa. Yich'beyej talel te winic yu'un Dios jtahb (20) ta pehch pan yu'un sba sit cebada, soc yach'il trigo. La yal te Eliseo: A'beya swe'ic, xchi.

⁴³Pero la sjac' te a'bat yu'un: ¿Bin ut'il ya ca'be swe'ic ho'winic (100) ta tuhl? xchi. La sjac' te Eliseo: A'beya swe'ic, como hich ya yal te Jehová: Ya xwe'ic soc ay sobra ya xhil, xchi.

⁴⁴Ha yu'un la ya'be ta stojolic, la swe'ic soc ay to hil, hich te bin ut'il la yal te Jehová.