Read Tzeltal 2 Reyes 6 Bible Online

2 Reyes 6 - Tzeltal bible

2 Reyes 6

¹Te jchahp jalwanejetic hich la yalbeyic te Eliseo: Ilawil, tut te banti nahinemotic.

²Conic ta Jordán, jujutuhl ya quich'cotic jujuch'ix te' yu'un ya jpastic na tey a te banti ya xnahinotic, xchihic. Bahanic, xchi te Eliseo.

³Awocoluc, joquina bahel te a'batetic awu'un, xchi te jtuhle. Ya xbohon, xchi.

⁴Hich baht soc. C'alal c'ohtic ta Jordán la sts'eticlanic te te'etique.

⁵Ay jtuhl, te c'alal yac ta sts'etel a te te'e, ch'ay cohel ta ha' te echej. Hich la yal ta aw: ¡Ay, cajwal! ¡Majambil cu'un! xchi.

⁶¿Banti ch'ay ochel? xchi te winic yu'un Dios. La ya'be yil banti. Hich te Eliseo la xot' jun te', la sch'oj ochel tey a, hich la yac' lichotuc mohel tal te echej.

⁷Tsaca, xchi te Eliseo. Te winic la shach bahel sc'ab, la stsac.

⁸Te ajwalil yu'un Siria ay ta guerra soc Israel. C'alal yac ta snopel soc te capitanetic yu'un, hich la yal: Tey ya jpas a te campamento cu'un, xchi.

⁹Hich te winic yu'un Dios la sticon ta halbeyel te ajwalil yu'un Israel: Ma me xc'axat tey a yu'un tey ya xbahtic a te siriahetic, xchi.

¹⁰Ha yu'un te ajwalil yu'un Israel la sticon bahel tey ta lugar te halbot yu'un te winic yu'un Dios. Hich la spas che'oxeb buelta, hich la scoltay sba a.

¹¹Te ajwalil yu'un Siria ilin yo'tan yu'un. La yic'ticlan tal te capitanetic yu'un, hich la yalbe: ¿Ma bal jamaluc yac awalic mach'a a te ay ta cohliltic te jun ay soc te ajwalil yu'un Israel? xchi.

¹²La sjac' jtuhl capitán: Mayuc, cajwal. Te jalwanej Eliseo te ay ta Israel, ha ya yalbe te ajwalil yu'un Israel te bin muquen yac awal ta cuarto awu'un, xchi.

¹³Hich la yal ta mandar te ajwalil: Bahan, ilawil banti ay, scuenta yu'un ya jticon ta stsaquel tal, xchi. Ay mach'a hich la yal: Ay ta Dotán, xchi.

¹⁴Ha yu'un te ajwalil la sticon bahel tey a jmoheletic ta cawu, carretahetic soc bayel soldadohetic. C'ohtic ta ahc'abal soc la sjoytayic te pueblohe.

¹⁵Te a'bat yu'un te winic yu'un Dios hahch ta sab soc loc' bahel. C'alal la yil te soldadohetic, te jmoheletic ta cawu soc te carretahetic te sjoytayejic te pueblo, la yalbe te Eliseo: ¡Ay, cajwal! ¿bin ya jpastic? xchi.

¹⁶La sjac' te Eliseo: Ma xiwat, yu'un c'ax hich a te mach'atic sjoquinejotic te bin ut'il te mach'atic sjoquinejic stuquelic, xchi.

¹⁷Hich la yal ta sc'oponel Dios te Eliseo: Awocoluc, Jehová, jambeya sit scuenta yu'un ya yil, xchi. Hich te Jehová la sjambe sit te a'bat, hich la yil te wits nojel ta jmoheletic ta cawuhetic soc carretahetic yu'un c'ahc' ta sjoyobal te Eliseo.

¹⁸Te c'alal cohic talel te siriahetic ta stojol, te Eliseo la sc'opon te Jehová: Awocoluc, macbeya sitic te winiquetic ini, xchi. Hich te Jehová la smacbe sitic hich te bin ut'il c'ambot yu'un te Eliseo.

¹⁹Patil te Eliseo hich la yalbeyic: Ma ha'uc te be ini soc ma ha'uc te pueblo ini; t'unawonic bahel, ho'on ya jtojobtesex bahel te banti ay te winic yac alehic, xchi. Hich la yic'ticlan bahel ta Samaria.

²⁰C'alal c'ohtic ta Samaria hich la yal te Eliseo: Jehová, jambeya sitic scuenta yu'un ya xhu' ya yilic q'uinal, xchi. Te Jehová la sjambe sitic, la yilic te ayiquix ta yutil te Samaria.

²¹C'alal ilotic yu'un te ajwalil yu'un Israel, la sjoc'obe te Eliseo: ¿Jtatic, ya bal jmilticlan? xchi.

²²La yal te Eleseo: Ma me xamilticlan. ¿Ya bal amil te mach'atic atsacoj ta guerra ta scuenta te espada awu'un soc ta scuenta at'ihmalte'? A'beya we'elil soc ha' yu'un ya xwe' x'uch'ic, patil ac'a suhtuc bahel ta stojol te yajwalique, xchi.

²³Ha yu'un la schahpambe bayel we'elil. C'alal laj yo'tanic ta we'el uch'el la sticonlan bahel, hich suhtic bahel ta stojol te yajwalique. Mayuc bin ora talic xan ta sq'uinal Israel te jpoj-biluquetic yu'un Siria.

²⁴Ta patil te Ben-adad ajwalil yu'un Siria la stsob spisil te soldadohetic yu'un, baht sjoytay te Samaria.

²⁵Ay bayel wi'nal ta Samaria ta scaj te joytaybil. Hich ay swocolic te bin ut'il te sjol burro la yich' chonel ta chanwinic (80) ta sehp plata, soc jun cuarto cab[4] stsa' stsuhmut ta ho'eb ta sehp plata.

²⁶C'alal yac ta behel ta sba ts'ahc a te ajwalil yu'un Israel, awtayot yu'un jtuhl ants, hich la yal: ¡Coltayawon, ajwalil cu'un! xchi.

²⁷La sjac' te ajwalil: Teme ma ba ya scoltayat te Jehová, ¿bin ya cut ya jcoltayat ho'on? ¿Ya bal xhu' ya ca'bat te bin ya xloc' ta sq'uiyojibal trigo o ta spits'ojibal ts'usub? xchi.

²⁸Soc la yal xan: ¿Bin la apas? xchi. La sjac' te ants: Te ants ini hich la yalbon: Ic'a tal te awale, ya jwe'tic yo'tic, pajel ya jwe'tic te cu'une, xchi.

²⁹Hich la jpaycotic te cal soc la jwe'cotic. Ta yan c'ahc'al la jcalbe: Ic'a tal te awal yu'un ya jwe'tic, xchihon, pero snac'ojix te yale, xchi.

³⁰C'alal la ya'iy te ajwalil te bin la yal te antse, la sch'i' sc'u' yu'un, hich behen bahel ta sba te ts'ahque. Te pueblo la yil te slapoj ch'ixal pac' ta ye'tal te sc'u'e.

³¹Hich la yal te ajwalil: ¡Hich ac'a spasbon te Dios, soc c'axuc to xan hich a, teme ya to xhil sjol yo'tic te Eliseo snich'an Safat! xchi.

³²Te Eliseo hucul ta sna a soc te mamaletic. Te ajwalil la sticon bahel jtuhl winic ta stojol. Pero te c'alal ma to ba c'ohem a te mach'a ticombile, te Eliseo la yalbe te mamaletic: ¿Ma bal lajuc awilic te jmilaw ini te yac sticombel tal xot'bon loq'uel jol? Ilawil, te c'alal ya xtal te mach'a ticombil, macahic te ti'nahil, ma me xawaq'uic ochel tal. ¿Ma bal chicanuc ta a'iyel te yoc te yajwal te mach'a ticombile? xchi.

³³Yac to ta c'op soc a, tal ta stojol Eliseo te mach'a ticombil, hich la yalbe: Spisil te bintic wocol ini tal ta stojol Jehová. ¿Bin ya jmahliy xan yu'un te Jehová? xchi.