Read Tzeltal 2 Reyes 7 Bible Online

2 Reyes 7 - Tzeltal bible

2 Reyes 7

¹Ha yu'un la yal te Eliseo: A'iya awa'iyic te sc'op te Jehová. Hich ya yal te Jehová: Ta hich ora pajel, jsehp nax plata stojol te jun seah[5] lequil harina, soc jsehp nax plata stojol te cheb seah[6] cebada ta yochibal te Samaria, xchi.

²Te príncipal te banti ya yich' yip sc'ab te ajwalil hich la sjac'be sc'op te winic yu'un Dios: Aunque Jehová ya sjamticlambe te ventanahetic yu'un ch'ulchan, ¿hich bal ya xc'oht ta pasel? xchi. Ya me awil ta asit, pero ma ba yac awe', xchi te Eliseo.

³Ta yochibal te pueblo ay chaneb winiquetic te ay sc'a'el-chamelic te talel c'axel hich la yalbe sbahic: ¿Bin yu'un ya jmahliy ya xchamotic li'i?

⁴Teme ya caltic ya x'ochotic bahel ta pueblo, ya xchamotic ta scaj te wi'nal tey a. Teme ya xhilotic li'i, ha nix hich ya xchamotic. Conic ta campamento yu'un te siriahetic: teme ma ba ya smilotic, cuxul ya xhilotic. Teme ya smilotic, ya xlajotic, xchihic.

⁵Hich ta yihc'ubel q'uinal hahchic, bahtic ta campamento yu'un te siriahetique. Pero te c'alal c'ohtic ta yochibal te campamento yu'un te siriahetic mayuc mach'a tey ay a.

⁶Como te Jehová la ya'be ya'iyic sc'op carretahetic, cawuhetic soc ipal soldadohetic ta campamento yu'un te siriahetique. Talel c'axel la yalbe sbahic: Te ajwalil yu'un Israel la schap sc'op soc te ajwaliletic yu'un te heteohetic soc ajwaliletic yu'un te egipciohetic yu'un ya xtal ya'botic guerra, xchihic.

⁷Hich loq'uic bahel ta ahnel ta yihc'ubel q'uinal. La yihquitayic hilel te snahilpaq'uic, cawuhetic, burrohetic soc te campamento hich te bin ut'il ay; ahnic bahel ta scoltayel te scuxlejalique.

⁸C'alal c'ohtic te jc'a'el-chameletic ta campamento, ochic bahel ta jun nahilpac', we' uch'ic tey a, la yich'ic bahel plata, oro soc c'u'uletic, baht snac'ticlanic. Suhtic xan tal, ochic ta yan nahilpac', ha nix hich la yich'ic bahel biluquetic, baht snac'ticlanic.

⁹Pero hich la yalbe sbahic: Ma lecuc te bin yacotic ta spasele. Yo'tic ha sc'ahc'alel te bin lec c'oht ta pasel, pero ho'otic mayuc bin ya caltic. Teme ya jmahliytic ha to c'alal ya sacub te q'uinale, ya me jta jmultic. Conic ta ora, ochucotic bahel, ya ca'betic sna' ta sna ajwalil, xchihic.

¹⁰Hich bahtic, la yawtayic te jcananetic yu'un te yochibal te pueblo, hich la yalbeyic: C'ohotcotiquix ta campamento yu'un te siriahetic, mayuc mach'a tey ay a, ni sc'op winic; ha nax chucajtic te cawuhetic soc burrohetic, soc te campamento hich nix hilem te bin ut'il pasbil yu'unic, xchihic c'ohel.

¹¹Te jcananetic la yalic ta aw bin c'oht ta pasel, la yich' halel ta yutil te sna ajwalil.

¹²Hahch te ajwalil ta ahc'abal, la yalbe te a'batetic yu'un: Ya calbeyex te bin la spasbotic te siriahetique. Sna'ojic te ay jwi'naltic, loq'uemic bahel ta snahilpaq'uic, snac'oj sbahic ta ha'maltic, hich ya yalic: Te c'alal ya xloq'uic tal ta pueblo, cuxul me ya jtsactic, hich ya x'ochic bahel ta pueblo, xchi.

¹³Pero ay jtuhl a'bat yu'un te hich la yal: Ac'a yiq'uic bahel ho'cohtuc te cawuhetic hilemic ta pueblo (como te mach'atic ya xhilic li'i ha nix hich ya xlajic, hich te bin ut'il spisil Israel te lajemixe). Ya jticontic bahel, hich ya quiltic bin ay, xchihic.

¹⁴Hich la schahpanic cheb carretahetic soc cawuhetic yu'un, te ajwalil la sticonlan bahel ta campamento yu'un te siriahetic, hich la yalbe: Bahan, ilawilic, xchi.

¹⁵Hich la st'unic bahel te siriahetic c'alal ta Jordán. La yilic te spisil te be nojel ta c'u'uletic soc yantic biluquetic te la sch'ojticlanic hilel yu'un ahnel. Patil suhtic talel te mach'atic ticombilic, la ya'beyic sna' te ajwalil.

¹⁶Hich te ants-winiquetic loq'uic bahel, la yich'beyic spisil te biluquetic ta campamento yu'un te siriahetique. La yich' chonel ta jsehp plata te jun seah lequil harina, soc la yich' chonel ta jsehp plata te cheb seah cebada, hich te bin ut'il yaloj te Jehová.

¹⁷Te ajwalil la yac' ta yochibal te pueblo te príncipal te ya yich' yip sc'ab a, pero ts'o'ot ta teq'uel yu'un te ants-winiquetic ta yochibal, hich laj, hich te bin ut'il yaloj te winic yu'un Dios te c'alal co tal te ajwalil ta stojol.

¹⁸Hich c'oht ta pasel te bin ut'il yaloj te winic yu'un Dios ta stojol te ajwalil: Cheb seah cebada ya yich' chonel ta jsehp plata, soc jun seah lequil harina ya yich' chonel ta jsehp plata ta hich ora pajel ta yochibal te Samaria, te xchihe.

¹⁹Te príncipal hich la sjac'be sc'op te winic yu'un Dios: Teme Jehová ya sjamticlan ventanahetic ta ch'ulchan, ¿hich bal ya xc'oht ta pasel? xchi. La yalix te Eliseo: Ya me awil ta asit pero ma ba yac awe', xchi.

²⁰Hich c'oht ta pasel, como ts'o'ot ta teq'uel yu'un te ants-winiquetic ta yochibal te pueblo, hich laj.