Read Tzeltal 2 Reyes 8 Bible Online

2 Reyes 8 - Tzeltal bible

2 Reyes 8

¹Te Eliseo hich la yalbe te ants te la scha'cuxajtesbe yal: Bahan ta nahinel ta yan lugar soc spisil mach'atic ay awu'un, como te Jehová la yalix te ya xtal wi'nal te ya xhalaj huqueb ha'bil ta q'uinal, xchi.

²Ha yu'un te ants hahch spas hich te bin ut'il halbot yu'un te winic yu'un Dios. Baht soc te mach'atic ay yu'un, nahin ta sq'uinal filisteohetic huqueb ha'bil.

³Te c'alal c'ax te huqueb ha'bil, te ants loc' tal ta sq'uinal filisteohetic, baht sc'ambe te ajwalil yu'un Israel te sna soc te sq'uinale.

⁴Te ajwalil yac ta c'op soc a te Giezi te ya'bat te winic yu'un Dios, hich la yal: Halbon ca'iy spisil te bintic bayel yutsil spasoj te Eliseo, xchi.

⁵C'alal te Giezi yac ta yalbeyel a te ajwalil bin ut'il te Eliseo la scha'cuxajtes te mach'a chamen, c'oht te ants te cha'cuxajtesbot yal yu'un ya sc'ambe te ajwalil te sna soc te sq'uinale. Ha yu'un la yal te Giezi: Ajwalil cu'un, ha te ants ya calbat ini soc te yal te cha'cuxajtesbot yu'un te Eliseo, xchi.

⁶Te ajwalil la sjoc'obe te antse, hich te ants la yalbe ya'iy te bin c'oht ta pasel. Ha yu'un te ajwalil hich la spas ta mandar te mach'a ay ya'tel: Ac'a suhtuc spisil te bintic ay yu'un soc spisil te sit yawal-ts'unub ta sq'uinal c'alal la yihquitay hilel te slumal c'alal ora, xchi.

⁷Patil te Eliseo baht ta Damasco. Ay ta chamel a te Ben-adad ajwalil yu'un Siria, hich a'bot sna': Hulemix li'i te winic yu'un Dios, xchi.

⁸Ha yu'un te ajwalil la yalbe te Hazael: Ich'a bahel mahtanil, bahan taha tal te winic yu'un Dios, joc'obeya te Jehová ta scuenta Eliseo: ¿Ya bal xlecubon ta chamel? xchi.

⁹Hich te Hazael la yich' bahel mahtanil te bintic lec ay ta Damasco, cuchbil bahel ta cha'winic (40) ta coht camellohetic, baht ta stahel tal. C'alal c'oht stehc'an sba ta stojol, hich la yal: Te anich'an Ben-adad ajwalil yu'un Siria la sticonon tal ta atojol yu'un ya joc'obat: ¿Ya bal xlecubon ta chamel? xchi c'ohel.

¹⁰La yal te Eliseo: Bahan, halbeya: Ya me xlecubat, xchihat. Pero te Jehová la ya'bon jna' te ya me xcham, xchi.

¹¹Te Eliseo la st'ojan sit ta stojol Hazael ha to c'alal hahch ta q'uexlal yu'un. Patil oc' te winic yu'un Dios.

¹²¿Bin yu'un ya x'oc' te cajwal? xchi te Hazael. La yal te Eliseo: Yu'un ya jna' te bin chopol yac apasbe te Israel. Yac achic'be te pueblohetic yu'unic te joybilic ta ts'ahc, yac amilticlambe ta espada te ach'ix-queremetic yu'unic, yac amajticlambe ta lum te alaletic yu'unic soc yac ajamticlambe sch'uhtic te antsetic swoloj yalic, xchi.

¹³¿Bin ut'il ya xhu' ya spas te bintic muc' ini te a'bat awu'un, te bin ut'il ha nax ts'i'? xchi te Hazael. La sjac' te Eliseo: Te Jehová la ya'bonix jna' te ha'at ya x'ochat ta ajwalil yu'un Siria, xchi.

¹⁴Hich baht te Hazael, tal ta stojol te ajwalil yu'un, hich joc'obot yu'un: ¿Bin la yalbat te Eliseo? xchi. La yalbon te ya me xlecubat, xchi.

¹⁵Pero ta schebal c'ahc'al te Hazael la stsac pac', la yotses ta ha', la ya'be ta yelaw te ajwalil, hich laj. Ha och ta sjelol ta ajwalil te Hazael.

¹⁶Ta yo'ebal ha'bil yochel ta ajwalil yu'un Israel a te Joram snich'an Acab, soc te ay ta ajwalil yu'un Judá a te Josafat, te Joram snich'an Josafat la yich' ya'tel ta ajwalil yu'un Judá.

¹⁷Ay lahchayeb scha'winic (32) ya'bilal a te och ta ajwalil; waxaqueb ha'bil halaj ta ajwalil ta Jerusalén.

¹⁸La st'umbe sbe te ajwaliletic yu'un Israel, hich te bin ut'il la spas te mach'atic ay yu'un Acab, como ha la yic'be yihnamin jtuhl yantsil-nich'an Acab. Chopol bin la spas ta stojol Jehová.

¹⁹Pero te Jehová ma ba la sc'an la slajin te Judá ta scaj sc'uxul ta yo'tan te David te ya'bat, como yalbeyej te ya me xhil tsumbil c'ahc' yu'un soc yu'un te sts'umbal ta spisil ora.

²⁰Ta yorahil te Joram la stoy sba te Edom te ma ba la scanix cuentahinel yu'un Judá, la yotsesic ajwalil yu'unic.

²¹Ha yu'un te Joram baht ta Zair soc spisil te carretahetic yu'une. Te edometic la sjoytayic tey a te Joram soc te capitanetic yu'un te carretahetique. Ha yu'un te Joram ta ahc'abal hahch ya'be guerra te edometic, pero te soldadohetic yu'un bahtic ta ahnel ta snahilpaq'uic.

²²Hich te Edom la sloq'ues sba ta cuentahinel yu'un Judá c'alal ora. Soc ha nix ta yorahil a la stoy sba te Libna.

²³Te bintic xan sc'oblal te Joram soc spisil te bintic la spasticlan, ts'ihbabil ta libro yu'un te ya'tel ajwaliletic ta Judá.

²⁴Cham[7] te Joram, la yich' muquel ta Pueblo yu'un David. Ha och ta sjelol ta ajwalil te Ocozías te snich'ane.

²⁵Ta slahchayebal ha'bil yochel ta ajwalil yu'un Israel a te Joram snich'an Acab, och ta ajwalil yu'un Judá te Ocozías snich'an Joram, ajwalil yu'un Judá.

²⁶Ay cheb scha'winic (22) ya'bilal a te och ta ajwalil te Ocozías, junax ha'bil ay ta ajwalil ta Jerusalén. Atalía sbihil te snan, ha sts'umbal Omri te ajwalil yu'un Israel.

²⁷Te Ocozías la st'umbe sbe te mach'atic ay yu'un Acab. Chopol bin la spas ta stojol Jehová, hich te bin ut'il te sts'umbal Acab, como ha snihal te mach'atic ay yu'un Acab.

²⁸Te Ocozías baht soc Joram snich'an Acab ta Ramot yu'un Galaad ta ya'beyel guerra te Hazael ajwalil yu'un Siria. Te siriahetic la yehchentesic te Joram.

²⁹Te ajwalil Joram suht bahel ta Jezreel ta spoxtayel te yehchen a'bot yu'un te siriahetic ta Ramot, te c'alal la ya'be guerra te Hazael ajwalil yu'un Siria. Te bin ut'il ay ta chamel te Joram snich'an Acab, hich co bahel te Ocozías snich'an Joram ajwalil yu'un Judá ta yula'tayel ta Jezreel.