Read Tzeltal 2 Reyes 9 Bible Online

2 Reyes 9 - Tzeltal bible

2 Reyes 9

¹Te jalwanej Eliseo la yic' tal jtuhl te jchahp jalwanejetic, hich la yalbe: Chahpana aba, ich'a bahel te yawil aceite ini, bahan ta Ramot yu'un Galaad.

²C'alal ya xc'ohat tey a, ya me ale te Jehú snich'an Josafat, snich'an Nimsi. Ochan bahel te banti ay, loq'uesa ta yohlil te yermanotac, ic'a bahel ta yan stsalul na.

³Tsaca te yawil aceite, malbeya ta sjol, soc hich yac awal: Hich ya yal te Jehová: Ho'on la jmalat ta aceite yu'un ya x'ochat ta ajwalil yu'un Israel, xchihat. Patil jama te puerta, loc'an ta ahnel, ma me xatehc'an aba, xchi sc'oblal.

⁴Hich te querem jalwanej baht ta Ramot yu'un Galaad, hich te bin ut'il pasot ta mandar.

⁵C'alal c'oht tey a, huhcajtic a c'oht sta te capitanetic yu'un soldadohetic, hich la yal: Ay bin ya calbat, capitán, xchi. ¿Mach'a a ta jpisilcotic? xchi te Jehú. Ha'at, capitán, xchi.

⁶Hich hahch te Jehú, och bahel ta na. Te jalwanej la smalbe te aceite ta sjol soc hich la yalbe: Hich ya yal te Jehová te Dios yu'un Israel: Ho'on la jmalat ta aceite yu'un ya x'ochat ta ajwalil yu'un Israel, te pueblo yu'un Jehová.

⁷Ya me alajimbe mach'atic ay yu'un te awajwal Acab, yu'un ya jsutbe spacol a te sch'ich'el te jalwanejetic cu'un soc te sch'ich'el spisil te a'batetic yu'un Jehová te malbot ta scuenta sc'ab te Jezabel.

⁸Ya me xlaj spisil te mach'atic ay yu'un Acab, jc'axel me xalajin ta Israel spisil te winiquetic yu'un Acab, a'batetic soc mach'atic libre ayic.

⁹Hich ya jpasbe te mach'atic ay yu'un Acab te bin ut'il la jpasbe te mach'atic ay yu'un Jeroboam snich'an Nabat soc te mach'atic ay yu'un Baasa snich'an Ahías.

¹⁰Te Jezabel ya me xti'ot ta ts'i' ta sq'uinal Jezreel, mayuc mach'a ya xmucot yu'un, xchi te Jehová, xchi. Ora la sjam te puerta, loc' ta ahnel.

¹¹C'alal loc' tal te Jehú ta stojol te capitanetic yu'un te yajwal, joc'obot yu'unic: ¿Ay bal lamal q'uinal? ¿Bin yu'un tal slehat me jsohquejole? xchihic. Ha'ex ana'beyejic sba soc bin ut'il ya xc'opoj, xchi te Jehú.

¹²Alot; hala ca'iycotic spisil, xchihic. La yal te Jehú: Hich ay soc hich la yalbon: Hich ya yal te Jehová: Ho'on la jmalat ta aceite yu'un ya x'ochat ta ajwalil yu'un Israel, xchi.

¹³Ora la scholic te smehyil paq'uic ta tuhlultuhl, la slimbeyic ta sba te cajalcaj mohel ta banti ay te Jehú, la yoq'uesinic xulubil soc awonic: ¡Ha ajwalil te Jehú! xchihic ta aw.

¹⁴Te Jehú snich'an Josafat, snich'an Nimsi, la schapbe sc'oblal ta milel te Joram. (Te Joram soc spisil Israel ayic ta scoltayel a te Ramot yu'un Galaad, ta scaj te Hazael ajwalil yu'un Siria.

¹⁵Pero suhtemix bahel ta Jezreel a te Joram ta spoxtayel te yehchen a'bot te c'alal la ya'be sbahic guerra soc Hazael ajwalil yu'un Siria.) Te Jehú la yal: Teme hich awo'tanic, ma me ayuc mach'a ya xloc' ta pueblo yu'un ya xbaht ta Jezreel ta yalel bin c'oht ta pasel, xchi.

¹⁶Ha yu'un te Jehú mo ta carreta, baht ta Jezreel, yu'un tey ay a te Joram te ay ta chamel. Ha nix hich tey ay a te Ocozías ajwalil yu'un Judá te talem ta yilel te Joram.

¹⁷Te j'il-q'uinal te ay ta ilo-q'uinal ta Jezreel la yil te jchahp soldadohetic yu'un Jehú yaquic ta talel, hich awon: Yac quilbel jchahp soldadohetic, xchi. La yal te Joram: Ticona bahel jtuhl jmohel ta cawu te ya sta soc ya sjoc'obe: ¿Ay bal lamal q'uinal? xchi.

¹⁸Hich te jmohel ta cawu baht ta sjoc'obeyel: Ya yal te ajwalil: ¿Ay bal lamal q'uinal? xchi. La sjac' te Jehú: ¿Bin awochel a teme lamal q'uinale? La', t'unawon bahel, xchi. La yal xan te j'il-q'uinal: Te mach'a ticombil c'ohtix ta stojolic, pero ma ba ya suht tal, xchi.

¹⁹Te ajwalil la scha'ticon yan jmohel ta cawu te c'oht sjoc'obe: Hich ya yal te ajwalil: ¿Ay bal lamal q'uinal? xchi. ¿Bin awochel a teme lamal q'uinale? La', t'unawon bahel, xchi te Jehú.

²⁰Te j'il-q'uinal la yal xan: Ha nix hich c'oht ta stojolic, pero ma ba ya suht tal. Te bin ut'il ya stij te carreta hich yilel te bin ut'il ya stij carreta te Jehú snich'an Nimsi, como ya stij hich te bin ut'il jtuhl jsohquejol, xchi.

²¹Ha yu'un te Joram la yal: Chahpana te jcarreta, xchi. Te c'alal chapalix a te scarreta, loq'uic bahel te Joram ajwalil yu'un Israel soc Ocozías ajwalil yu'un Judá, tuhlultuhl ta scarreta, baht stahic tal te Jehú. La stahic ta sq'uinal Nabot ta Jezreel.

²²Te Joram c'alal la yil te Jehú, hich la yal: ¿Scuenta bal lamal q'uinal talat, Jehú? xchi. ¿Bin ut'il ay lamal q'uinal yu'un te bayel antsinel soc ilojel yu'un te anan Jezabel? xchi te Jehú.

²³Te Joram la sut scarreta, baht ta ahnel, soc la yalbe te Ocozías: ¡Ocozías, j'ac'aw ta c'abal! xchi.

²⁴Pero te Jehú la st'im bahel te ya'tejibal st'ihmalte', och ta spat te Joram, c'ax ta yo'tan, hich puch' bahel ta sba scarreta.

²⁵Te Jehú la yalbe te Bidcar te capitán yu'un: Tsaca soc ch'oja bahel ta sq'uinal Nabot ta Jezreel. Na'a me te c'alal yacotic ta bahel soc a te winiquetic yu'un Acab te stat Joram te bin ut'il Jehová hich la yal te bin ya xc'oht ta scuenta:

²⁶Wojey la jquilbe te sch'ich'el Nabot soc sch'ich'el te snich'nab, soc li' ta q'uinal ini ya me ca'bat atoj, xchi te Jehová. Ha yu'un tsaca, ch'oja bahel ta sq'uinal Nabot, hich te bin ut'il yaloj te Jehová, xchi.

²⁷C'alal hich la yil te Ocozías ajwalil yu'un Judá, baht ta ahnel ta stojol Bet-hagan. Pero nutsot yu'un te Jehú soc hich la yal: ¡Ha nix hich, milahic! xchi. Hich la yehchentesic ta scarreta ta mohel yu'un Gur, ta nopol Ibleam. Pero te Ocozías baht ta ahnel ta Meguido, tey c'oht ta lajel a.

²⁸Te a'batetic yu'un la yich'beyic bahel sbaq'uetal ta carreta ta Jerusalén, tey la smuquic a ta smuquenal sme'stat ta Pueblo yu'un David.

²⁹Ta sbuluchebal (11) ha'bil yochel ta ajwalil yu'un Israel a te Joram snich'an Acab, och ta ajwalil yu'un Judá te Ocozías.

³⁰Te Jehú baht ta Jezreel. C'alal hich la ya'iy te Jezabel, la sbon sit, la sch'ahl sjol, baht yil ta ventana.

³¹C'alal och talel ta yochibal te pueblo te Jehú, hich la yal te Jezabel: ¿Lamal bal q'uinal talat, Zimri, te la amilix te awajwale? xchi.

³²La yil mohel te ventana, hich la yal: ¿Mach'a a te jun yo'tan ta jtojol? ¿Mach'a a? xchi. Cha'oxtuhl eunuco winiquetic la yilic cohel ta ventana.

³³La yal te Jehú: ¡Ch'ojahic cohel tal te antse! xchi. Hich la sch'ojic cohel, ay ts'iht sch'ich'el ta pahc' soc ta cawuhetic te la sts'o'ts'o'tec' te Jezabel.

³⁴Te Jehú och bahel, baht ta we'el uch'el, soc hich la yal: Bahan, ilawilic te chopol ants, mucahic, como ha yantsil-nich'an ajwalil, xchi.

³⁵Pero c'alal c'oht yilic yu'un ya smuquic, ha xanix c'oht stahbeyic te sbaquel sjol, yoc soc te stahn sc'abe.

³⁶Hich suhtic ta yalbeyel ya'iy te Jehú. La yal te Jehú: Ha te bin yaloj Dios ta scuenta te ya'bat Elías te talem ta Tisbe: Ta sq'uinal Jezreel ya xti'ot ta ts'i'etic te sbaq'uetal te Jezabel,

³⁷soc hich ya xc'oht te bin ut'il tsa' ta sba te q'uinal yu'un Jezreel, te mayuc mach'a hich ya xhu' ya yal: Ha Jezabel ini, xchi.