Read Tzeltal 1 Crónicas 10 Bible Online

1 Crónicas 10 - Tzeltal bible

1 Crónicas 10

¹Te filisteohetic tal ya'beyic guerra te Israel. Te israeletic loq'uic ta ahnel ta stojolic, bayel lajic ta wits Gilboa.

²Te filisteohetic la snutsic bahel te Saúl soc te snich'nab, la smilic te Jonatán, Abinadab soc Malquisúa.

³Tulanij te guerra ta stojol Saúl, tahot yu'un te j'ac'-t'ihmalte'ic, ha ehchentesot yu'unic.

⁴Ha yu'un te Saúl la yalbe te jcuch-a'tejibal yu'un: Loq'uesa te espada awu'un, lowahon a, scuenta yu'un ma ba ya xtal slabanon te mach'atic ma ba yich'ojic circuncisión, xchi. Pero te jcuch-a'tejibal yu'un ma ba la sc'an, como bayel la xi'. Ha yu'un te Saúl la stsac te espada yu'un, la syahltes cohel sba ta sni'il.

⁵C'alal la yil te jcuch-a'tejibal yu'un te lajix te Saúl, ha nix hich la syahltes sba ta sni'il te espada yu'un, hich laj.

⁶Hich laj te Saúl soc te oxtuhl snich'nab; spisil mach'atic ay yu'un pajal laj soc.

⁷Spisil te israeletic te nahinemic ta spamlej, c'alal la yil te ahnemiquix bahel te soldadohetic soc te lajix te Saúl soc te snich'nab, la yihquitayic hilel te pueblohetic yu'unic, loq'uic ta ahnel. Hich tal te filisteohetic, tey nahinic a.

⁸Ta schebal c'ahc'al, te c'alal bahtic te filisteohetic ta spojel tal bintic ay yu'un te mach'atic lajemic, la stahbeyic sbaq'uetal te Saúl soc te snich'nab te xach'ajtic ta lum ta wits Gilboa.

⁹La spojbeyic te bintic ay yu'un, la yich'beyic bahel sjol soc te ya'tejib yu'un guerra. Soc la sticonic bahel jal-c'opetic ta spisil sq'uinal te filisteohetic yu'un ya ya'iyic soc te diosetic yu'unic te bin c'ohtix ta pasel.

¹⁰La yaq'uic te ya'tejib yu'un guerra ta templo yu'un te diosetic yu'unic, soc la sjoc'ambeyic sjol te Saúl ta templo yu'un Dagón.

¹¹C'alal la ya'iyic spisil te mach'atic ayic ta Jabes yu'un Galaad te bin la spasbeyic Saúl te filisteohetic,

¹²hahchic spisil te winiquetic te ay yip yo'tanic, baht yich'beyic tal te sbaq'uetal Saúl soc snich'nab, la yich'ic tal ta Jabes; tey la smucbeyic sbaq'uetalic a ta ye'tal jihte', soc la scom swe'elic huqueb c'ahc'al.

¹³Hich laj te Saúl ta scaj te ma ba jun yo'tan ta stojol Jehová, ma ba la scanantaybe sc'op te Jehová soc baht sjoc'obe jtuhl jna'ojel ants,

¹⁴ma ha'uc la sjoc'obe te Jehová; ha scuentahil te Jehová la yac' lajuc te Saúl soc la ya'be ya'tel ta ajwalil te David snich'an Isaí.