Read Tzeltal 1 Crónicas 11 Bible Online

1 Crónicas 11 - Tzeltal bible

1 Crónicas 11

¹Spisil Israel la stsob sbahic ta stojol David ta Hebrón, hich la yalic: Te ho'otic junax jbaquel soc jbaq'uetaltic.

²Ta nahil to, te c'alal ay ta ajwalil te Saúl, ha'at la awic' loq'uel ta guerra te Israel soc la awic' suhtel tal. Soc hich yalbeyejat te Jehová te Dios awu'un: Ha'at yac acanantay soc ha ajwalil ya xc'ohat ta stojol Israel, te pueblo cu'un, xchihic.

³Tal spisil te mamaletic yu'un Israel ta stojol te ajwalil ta Hebrón; te David la schap sc'op soc te mamaletic ta stojol Jehová. Hich la smalic ta aceite te David scuenta ajwalil yu'un Israel, hich te bin ut'il yaloj Jehová ta scuenta Samuel.

⁴Te David soc spisil Israel bahtic ta Jerusalén, ha te Jebús. Te jebuseohetic nahinemic ta q'uinal tey a.

⁵Te mach'atic nahinemic ta Jebús hich la yalbeyic te David: Ma xhu' x'ochat tal li'i, xchihic. Pero te David la yich' te ahnibal yu'un Sión, te ha Pueblo yu'un David c'oht sbihil.

⁶Hich yalojix te David: Te mach'a nahil ya xmo bahel ta ya'beyel guerra te jebuseohetic ha jtsobaw ya xc'oht yu'un te soldadohetic, xchi. Ha nahil mo bahel te Joab te yal Sarvia, hich och ta jtsobaw.

⁷Te David nahin ta ahnibal ts'ahc, ha yu'un Pueblo yu'un David c'oht te sbihile.

⁸La spas xan te pueblo ta sjoyobal c'alal Milo ha to ta ts'ahc, soc te Joab la scha'pas xan te pueblo ta yutil.

⁹Xquechet ta muc'ubel te yip ya'tel te David, como ha joquimbil yu'un Jehová te scuentahinej spisil.

¹⁰Ha'ic ini te príncipal winiquetic yu'un David te ma xiwic te coltayot yu'unic soc spisil Israel te c'alal ay ta ajwalil a, soc junax la yac' sbahic soc spisil Israel te la yotsesic ta ajwalil, hich te bin ut'il yaloj te Jehová.

¹¹Hich ay sbihilic te winiquetic yu'un David te ma xiwic: Jasobeam snich'an Hacmoni, ha jtsobaw yu'un te lajuneb scha'winic (30)[16] ta tuhl. Ay jun buelta te la smil ho'lajunwinic (300) ta tuhl ta slanza.

¹²Patil te Eleazar snich'an Dodo, te sts'umbal Ahohí, te jtuhl ta yoxebalic te ma xiwique.

¹³Ha la sjoquin David ta Pas-damim te c'alal la stsob sbahic tey a ta ya'beyel guerra te filisteohetic. Ay jsehp q'uinal te banti ts'umbil cebada, tey loq'uic ta ahnel a te israeletic ta stojol te filisteohetic,

¹⁴pero te Eleazar tey la stehc'an sba ta yohlil a te q'uinal, la scoltay te q'uinal soc la stsal te filisteohetic, como coltayot yu'un Jehová ta yaq'uel muc'ul tsalaw.

¹⁵Oxtuhl yu'un te lajuneb scha'winic (30) jtsobawetic cohic bahel ta stojol David ta muc'ul ton ta ch'en yu'un Adulam te c'alal ay ta spamlej yu'un Refaim te campamento yu'un te filisteohetique.

¹⁶Ta hich ora ay ta ahnibal a te David, soc ay jtsohb filisteo soldadohetic ta Belén.

¹⁷Te David ay bin la sc'an yo'tan, hich la yal: ¡Ayuc mach'a ya ya'bon cuch'be ya'lel te pozo ta yochibal te Belén! xchi.

¹⁸Ha yu'un te oxtuhlic la yochintaybeyic te scampamento te filisteohetic, la sloq'uesic te ha' ta pozo te ay ta yochibal Belén, la yich'beyic tal te David. Pero te David ma ba la sc'an la yuch', la smal ta stojol Jehová,

¹⁹hich la yal: Ma ba ya jpas ini, Dios cu'un. ¿Ya bal cuch'be sch'ich'elic te oxtuhl winiquetic te la sloq'ues sba ta yo'tanic soc scuxlejalic te c'oht yich'ic tal? xchi. Hich ma ba la sc'an la yuch'. Hich la spasic te oxtuhlic te ma xiwique.

²⁰Te Abisai yermano te Joab, ha jtsobaw yu'un te lajuneb scha'winic (30) ta tuhl. Ay la smil ta slanza ho'lajunwinic (300) ta tuhl winiquetic, hich pajal sc'oblal c'oht soc te oxtuhlique.

²¹C'ax hich sc'oblal c'oht a te bin ut'il te lajuneb scha'winic (30) ta tuhl, ha jtsobaw c'oht yu'unic, pero ma ba la spajbe sc'oblal te oxtuhlique.

²²Te Benaía snich'an Joiada, ha jtuhl winic te ma xiw, te talem ta Cabseel, bayel bintic muc' spasoj. Ha la smil cha'tuhlic ta Moab te hich c'ohemic te bin ut'il choj. Soc ha nix yorahil a te yac ta yahlel me'sic, co bahel ta ch'en, tey la smil jcoht choj a.

²³Soc ta yan buelta la smil jtuhl egipcio-winic te ho'eb xuhc'ubil[17] snahtil, te yich'oj slanza te hich smuc'ul te bin ut'il ste'el jalabil; pero te Benaía baht ya'be te'. Ha la sloq'uesbe te slanza ta sc'ab, ha nix la smil a.

²⁴Hich la spas te Benaía snich'an Joiada; ha muc' sc'oblal c'oht ta yohlil te oxtuhlic te ma xiwique.

²⁵Ha muc' xan sc'oblal a te bin ut'il te lajuneb scha'winic (30), pero ma ba la spaj te oxtuhlique. Te David la yotses ta jtsobaw yu'un te soldadohetic te ya xcanantayot yu'une.

²⁶Ha'ic ini te soldadohetic te ma xiwic: Asael yihts'in Joab, Elhanán snich'an Dodo te talem ta Belén,

²⁷Samot te talem ta Harod, Heles, pelon-winic,

²⁸Ira snich'an Iques te talem ta Tecoa, Abiezer te talem ta Anatot,

²⁹Sibecai te talem ta Husa, Ilai sts'umbal Ahohí,

³⁰Maharai te talem ta Netofa, Heled snich'an Baana te talem ta Netofa,

³¹Itai snich'an Ribai te talem ta Gabaa te ay ta sq'uinal Benjamín, Benaía te talem ta Piratón,

³²Hurai te talem ta uc'um yu'un Gaas, Abiel te talem ta Arba,

³³Azmavet te talem ta Baharum, Eliaba te talem ta Saalabín,

³⁴te snich'nab Hasem te talem ta Gizón, Jonatán snich'an Sage te ararat-winic,

³⁵Ahíam snich'an Sacar te ararat-winic, Elifal snich'an Ur,

³⁶Hefer te mequerat-winic, Ahías te talem ta Pelon,

³⁷Hezro te talem ta Carmel, Naarai snich'an Esbai,

³⁸Joel te yermano Natán, Mibhar snich'an Hagrai,

³⁹Selec te talem ta Amón, Naharai te talem ta Beerot, jcuch-a'tejibal yu'un Joab te yal Sarvia,

⁴⁰Ira te itra-winic, Gareb te itra-winic,

⁴¹Urías te hitita-winic, Zabad snich'an Ahlai,

⁴²Adina snich'an Siza, sts'umbal Rubén, ha príncipal yu'un te sts'umbal Rubén, soc lajuneb scha'winic (30) te sjoquinejic,

⁴³Hanán snich'an Maaca, Josafat te mitna-winic,

⁴⁴Uzías te talem ta Astarot, Sama soc Jehiel snich'nab Hotam te talem ta Aroer,

⁴⁵Jediael snich'an Simri, soc te yermano Joha te talem ta Tiz,

⁴⁶Eliel te talem ta Mahanaim, Jerebai soc Josavía snich'nab Elnaam, Itma te talem ta Moab,

⁴⁷Eliel, Obed soc Jaasiel te mesobab-winiquetic.