Read Tzeltal 1 Crónicas 12 Bible Online

1 Crónicas 12 - Tzeltal bible

1 Crónicas 12

¹Ha'ic ini te talic ta stojol David ta Siclag, te c'alal snac'oj sba a ta scaj Saúl snich'an Cis; ha'ic te mach'atic ma xiwic, te talic ta scoltayel ta yaq'uel guerra.

²Chapalic soc st'ihmalte'ic soc ya xhu' yu'unic sch'ojel ton ta jihmuch'il soc yaq'uel ya'tejibalul t'ihmalte' ta swa'el soc ta sq'uexam-c'abic. Ta yermanotac Saúl, sts'umbal Benjamín, hich ayic:

³Ahiezer te príncipal, patil Joás snich'nab Sema te talem ta Gabaa, Jeziel soc Pelet snich'nab Azmavet, Beraca soc Jehú te talem ta Anatot,

⁴Ismaías te talem ta Gabaón, te mach'a ma xiw te ay ta yohlil te lajuneb cha'winic (30) ta tuhl, soc ha jtsobaw yu'unic, Jeremías, Jahaziel, Johanán, soc Jozabad te talem ta Gedera,

⁵Eluzai, Jerimot, Bealías, Semarías, Sefatías te talem ta Haruf,

⁶Elcana, Isías, Azareel, Joezer soc Jasobeam sts'umbalic Coré,

⁷Joela soc Zebadías snich'nab Jeroham te talem ta Gedor.

⁸Soc ta sts'umbal Gad ay c'axic bahel ta stojol David ta ahnibal ta jochol taquin q'uinal, ha winiquetic te ma xiwic ta yaq'uel guerra, mero ya xhu' yu'unic stuhunel smahquilic soc slanzahic; te sit yelawic hich c'ohemic te bin ut'il yelaw chojetic, soc ya x'ahnimajic hich te bin ut'il chijetic ta witsiltic.

⁹Te primero, ha Ezer, schebal Obadías, yoxebal Eliab,

¹⁰schanebal Mismana, yo'ebal Jeremías,

¹¹swaquebal Atai, shuquebal Eliel,

¹²swaxaquebal Johanán, sbalunebal Elzabad,

¹³slajunebal Jeremías, soc sbuluchebal Macbanai.

¹⁴Ha'ic ini capitanetic yu'un te soldadohetic yu'un sts'umbal Gad. Te mach'a peq'uel yip pajal soc ho'winic (100) ta tuhl, te mach'a bayel yip pajal soc j'ohlil yoxbahc' (1,000) ta tuhl.

¹⁵Ha'ic te sohlic bahel ta Jordán ta shahchibal u yu'un ha'bil, te c'alal ay snojel ha'; soc la yaq'uic ahnuc bahel spisil mach'atic ayic ta spamlejetic ta stojol banti ya xloc' tal c'ahc'al soc ta stojol smahlib c'ahc'al.

¹⁶Soc ay sts'umbal Benjamín soc sts'umbal Judá te talic ta stojol David ta ahnibal.

¹⁷Te David loc' bahel ta stahel, hich la yalbe: Teme talex ta scuenta lamal q'uinal soc teme tal acoltayonic, jun co'tan ta atojolic. Yan teme yu'un tal awac'onic ta sc'ab te jcontratac, te mayuc bin chopol jpasoj, ac'a yil te Dios yu'un te jme'jtatic soc ac'a ya'beyex castigo, xchi.

¹⁸Tal te Espíritu ta stojol Amasai, te jtsobaw yu'un te lajuneb scha'winic (30) ta tuhl, hich la yal: ¡Awu'unotcotic, David! ¡Ya joquinatcotic, snich'anat Isaí! ¡Lamaluc me q'uinal, lamaluc me q'uinal ta atojol, soc ta stojol te mach'atic ya scoltayat, como ya me scoltayat te Dios awu'une! xchi. Te David la yic' ta stojol soc la yac'ticlambe ya'telic soc te yantic jtsobawetic yu'un te soldadohetique.

¹⁹Soc ay sts'umbal Manasés te c'axic ta stojol David te c'alal baht soc te filisteohetic ta ya'beyel guerra te Saúl. (Pero te David ma ba la scoltay te filisteohetic, como te jtsobawetic yu'un te filisteohetic, c'alal stsoboj sbahic, la snopic te ya sticonic bahel te David, hich la yalic: Ya me yich' loq'uesel joltic teme ya xc'ax bahel ta stojol Saúl te yajwale, xchihic yu'un.)

²⁰Hich te c'alal suht ta Siclag te David, te sts'umbal Manasés te c'axic tal ta stojol: ha te Adnas, Jozabad, Jediael, Micael, Jozabad, Eliú, Ziletai, capitanetic yu'un jujumil sts'umbal Manasés.

²¹Ha'ic te la scoltayic David ta scontrahinel te jpoj-biluquetic, como spisilic ma xiwic soc ha capitanetic yu'un soldadohetic yu'un.

²²Jujun c'ahc'al yaquic ta talel yantic ta stojol David, ha to c'alal bayel c'ohtic, hich te bin ut'il soldadohetic yu'un Dios c'ohtic.

²³Ha'ic ini te soldadohetic te chapalic yu'un yaq'uel guerra, te talic ta stojol David ta Hebrón yu'un ya sc'asesbeyic te ya'tel ta ajwalil te Saúl ta stojol David, hich te bin ut'il yaloj te Jehová.

²⁴Te sts'umbal Judá te yich'ojic smahquilic soc slanzahic, ha huclajunbahc' (6,800) ta tuhl winiquetic chapalic yu'un yaq'uel guerra.

²⁵Te sts'umbal Simeón, ho'lajunwinic swaxaclajunbahc' (7,100) ta tuhl winiquetic te ma xiwic, te chapalic yu'un yaq'uel guerra.

²⁶Te sts'umbal Leví, lajunwinic slahchaybahc' (4,600) ta tuhl;

²⁷te Joiada, príncipal yu'un te sts'umbal Aarón, soc ho'winic slajunbahc' (3,700) ta tuhl;

²⁸soc Sadoc, querem te ma xiw soc ay yip, soc cheb scha'winic (22) príncipaletic yu'un te mach'atic ay yu'un te state.

²⁹Te sts'umbal Benjamín, te yermanotac Saúl, lajunwinic swaxacbahc' (3,000) ta tuhl, te ta nahil to ay tsobolic te jun yo'tanic ta stojol te mach'atic ayic yu'un Saúl.

³⁰Te sts'umbal Efraín, cha'pic soc lahchaybahc' (20,800) ta tuhl winiquetic te ma xiwic soc ay yipic, te ay sc'oblalic ta sna sme'static.

³¹Te j'ohlil sts'umbal Manasés, cha'pic soc ho'bahc' (18,000) ta tuhl winiquetic te tsahbilic yu'un ya xtal yotsesic ta ajwalil te David.

³²Te sts'umbal Isacar, lajunwinic (200) ta tuhl príncipaletic te ya sna'ic stsahtaybeyel yorahil soc ya sna'ic bin ya sc'an ya spas te Israel, spisil te yermanotac ch'uhumbil mandar yu'unic.

³³Te sts'umbal Zabulón, wacpic soc ho'bahc' (50,000) ta tuhl te ora nax chapalic ta yaq'uel guerra soc spisil ta chahp a'tejibaletic yu'un guerra, soc jun yo'tanic ya scoltayic ta guerra te David.

³⁴Te sts'umbal Neftalí, lajunwinic yoxbahc' (1,000) ta tuhl capitanetic soc chanpic soc lajunwinic yoxlajunbahc' (37,000) ta tuhl winiquetic te yich'ojic smahquilic soc slanzahic.

³⁵Te sts'umbal Dan, oxpic soc lajunwinic slahchaybahc' (28,600) ta tuhl chapalic ta yaq'uel guerra.

³⁶Te sts'umbal Aser, ho'pic (40,000) ta tuhl chapalic ta yaq'uel guerra.

³⁷Te sts'umbalic Rubén, Gad soc j'ohlil sts'umbal Manasés ta jehch muc'ul-ha' Jordán, ho'lajunpic (120,000) winiquetic chapalic ta spisil ta chahp a'tejibaletic yu'un guerra.

³⁸Spisil ha'i winiquetic yu'un guerra ini chapalic ta yaq'uel guerra, jun yo'tanic talic ta Hebrón yu'un ya yotsesic ta ajwalil te David ta stojol Israel. Ha nix hich spisil Israel, jun yo'tanic ya yotsesic ta ajwalil te David.

³⁹Oxeb c'ahc'al la sjoquinic te David ta we'el uch'el, como chahpambil te swe'elic yu'un te yermanotac.

⁴⁰Ha nix hich te spat-xuhquic c'alal Isacar, Zabulón soc Neftalí, la scuchic tal we'eliletic ta burrohetic, camellohetic, machohetic soc ta j'a'tel-wacaxetic. Ay bayel we'eliletic la schahpanic tal: harina, higohetic, pasas, vino, aceite, torohetic soc tuminchijetic, como bayel tse'el-o'tanil ta Israel.